Komaduan Samuel 5:1-25
5 Asabi panaon, amin a tribu na Israel et linmad si David diad Hebron+ tan inkuan da: “Sikami so pukel tan laman mo.*+
2 Diad apalabas, sanen si Saul ni ari mi, sika lay mangidadaulo ed saray pilalaban na Israel.*+ Tan inkuan nen Jehova ed sika: ‘Sikay manpastol ed Israel a totook, tan magmaliw kan lider na Israel.’”+
3 Kanian amin a mamatatken na Israel et linmad ari diad Hebron, tan akisipanan si Arin David ed sikara+ diad Hebron ed arapan nen Jehova. Insan nilanaan day David bilang ari na Israel.+
4 Mantaon na 30 si David sanen sikatoy nagmaliw ya ari, tan 40 taon a nanuley.+
5 Inuleyan toy Juda ed loob na 7 taon tan 6 bulan legan a walad Hebron, tan inuleyan toy interon Israel tan Juda ed loob na 33 taon legan a walad Jerusalem.+
6 Tan linmad Jerusalem so ari tan saray totoo to pian onsumpad saray Jebuseo+ a manaayam ed saman a dalin. Kinantiawan day David, ya inkuan da: “Agkan balot makaloob dia! Pataynanen ka na anggan saray bulag tan piley.” Inisip da, ‘Agbalot makaloob si David dia.’+
7 Balet sinakop nen David so apadiran a syudad na Sion, a tatawagen la natan a Syudad nen David.+
8 Kanian inkuan nen David ed saman ya agew: “Nepeg ya ondalan iramay onataki ed saray Jebuseo diad agusay danum ed dalem na dalin pian pateyen da iray ‘piley tan bulag,’ a kabkabusol nen David!”* Kanian walay panangibagan: “Agbalot makaloob ed abung iray bulag tan piley.”
9 Insan nanayam si David ed saman ya apadiran a syudad, tan tinawag itan* a Syudad nen David; tan nampaalagey si David ed kaliberliber manlapud Pukdol*+ anggad paloob.+
10 Kanian nantultuloy a binmiskeg si David,+ tan walad sikato si Jehova a Dios na saray armada.+
11 Si Arin Hiram+ na Tiro et angibaki na saray mensahero ed si David pian ikdan to na saray troso na sedro,+ karpentero, tan saray mason parad pangipaalagey na padir, tan angipaalagey ira na abung* parad si David.+
12 Kanian amta nen David ya inletneg a malet nen Jehova so inkaari to ed Israel+ tan intandoro toy panarian to+ nisengeg ed Israel a totoo To.+
13 Angala ni si David na saray bibii bilang asawa tan onkokomaduan asawa+ diman ed Jerusalem kasabi to manlapud Hebron, tan si David et awalaan ni na saray ananak a lalaki tan bibii.+
14 Niraya so ngaran na ananak to ya inyanak diad Jerusalem: Samua, Sobab, Natan,+ Solomon,+
15 Ibhar, Elisua, Nefeg, Jafia,
16 Elisama, Eliada, tan Elifelet.
17 Sanen nadngelan na saray Filisteo a si David et nilanaan bilang ari na Israel,+ linma ran amin a mananap ed sikato.+ Sanen nadngelan itan nen David, sikatoy linmad salimbengan.+
18 Insan sinmabi iray Filisteo tan nantatayak ira ed Lawak* na Refaim.+
19 Oniay intepet nen David ed si Jehova:+ “Kasin onla ak a milaban ed saray Filisteo? Kasin iyawat mo rad limak?” Diad saman et inkuan nen Jehova ed si David: “La ka, ta seguradon iyawat kod limam iray Filisteo.”+
20 Kanian linmay David ed Baal-perazim, tan tinalo ira nen David diman. Diad saman et inkuan to: “Dinederal nen Jehova iray kalaban ko+ ed unaan ko, a singa ra intetebag na danum.” Kanian tinawag to iman a pasen a Baal-perazim.*+
21 Intilak diman na saray Filisteo iray idolo ra, kanian inekal iratan nen David tan saray totoo to.
22 Ag-abayag et tinmatdang lamet iray Filisteo tan nantatayak ira ed Lawak* na Refaim.+
23 Nantepet si David ed si Jehova, balet inkuan To: “Agka onaataki ed arapan. Liber ka ed benegan da, tan atakim ira diad arap na saray tanaman a baca.
24 Tan sano narengel moy tanol na panmamartsa a manlalapud toktok na saray tanaman a baca, kiwas kayon tampol, ta si Jehova et linma lad unaan mo pian taloen so armada na saray Filisteo.”
25 Kanian ginawa nen David so unong ed ingganggan nen Jehova ed sikato, tan tinalo to iray Filisteo+ manlapud Geba+ ya anggad Gezer.+
Paimanod leksab
^ Odino “so kakanayon mo.”
^ Literal, “mangipapaway tan mangiloloob ed Israel.”
^ Odino “na kamarerwa nen David.”
^ Odino posiblin, “tan tinawag to itan.”
^ Odino “Milo.” Hebreon salita a mankabaliksay “tambak.”
^ Odino “palasyo.”
^ Odino “Abeban Patar.”
^ Kabaliksan toy “Katawan na Saray Panagderal.”
^ Odino “Abeban Patar.”
