Komaduan Samuel 6:1-23
6 Tinipon lamet nen David iray sankamaongan a sundalo ed Israel, 30,000 lalaki.
2 Insan linmay David tan amin a lalakin kaiba to diad Baal-juda pian alaen da diman so Kaban na tuan Dios,+ a diad arapan na satan et ontatawag iray totoo ed ngaran nen Jehova na saray armada,+ ya akayurong ed trono diad tagey* na saray kerubin.+
3 Balet inlugan day Kaban na tuan Dios ed balon kariton+ pian iyalis itan manlapud abung nen Abinadab,+ a walad pukdol; tan si Uzah tan si Ahio ya ananak nen Abinadab so mangipapaguyor ed balon kariton.
4 Kanian inyalis day Kaban na tuan Dios manlapud abung nen Abinadab, a walad pukdol, tan manaakar ed unaan na Kaban si Ahio.
5 Nanselebra ed arapan nen Jehova si David tan say interon sankaabungan na Israel diad panamegley na amin a klase na panagtogtog a gawad kiew ya enebro, saray arpa, arum nin nandeles ya instrumento,+ tamburin,+ sistro, tan saray piangpiang.+
6 Balet kasabi rad panag-ilikan nen Nacon, inyunat nen Uzah so lima to ed Kaban na tuan Dios tan inegnaan to,+ ta naplag lawari itan lapud saray baka.
7 Diad saman et dinmalang so sanok nen Jehova ed si Uzah, tan sikatoy kinabil diman na tuan Dios+ lapud agmarespeton kiwas+ to, kanian sikatoy inatey ed abay na Kaban na tuan Dios.
8 Balet akapasnok* si David lapud biglan insanok nen Jehova ed si Uzah; tan satan a pasen et tinawag a Perez-uzah* anggad sayan agew.
9 Kanian tinmakot si David ed si Jehova+ ed saman ya agew tan inkuan to: “Panon kasin niyakar ed ayaman ko so Kaban nen Jehova?”+
10 Aglabay nen David a say Kaban nen Jehova et niyakar ed kawalaan to diad Syudad nen David.+ Kanian impaiyakar to itan ed abung nen Obed-edom+ a Gitita.
11 Taloy bulan a nansiansiad abung nen Obed-edom a Gitita so Kaban nen Jehova, tan nantultuloy a benendisyonan nen Jehova si Obed-edom tan say interon sankaabungan to.+
12 Oniay nibalita ed si Arin David: “Benendisyonan nen Jehova so sankaabungan nen Obed-edom tan amin a kayarian to nisengeg ed Kaban na tuan Dios.” Kanian malikeliket a linmay David pian alaen tod abung nen Obed-edom so Kaban na tuan Dios tan iyakar tod Syudad nen David.+
13 Sanen aka-anemiran kupbang iramay mangaawit+ ed Kaban nen Jehova, sikatoy nambagat na sakey a kalakian a baka tan pinataban ayep.
14 Pinasyay impansayaw-sayaw nen David ed arapan nen Jehova; kaleganan na satan et akasulong* si David na linen ya efod.+
15 Maneyag ed liket+ si David tan say interon sankaabungan na Israel tan papaknolen da so tambuyog+ legan dan itatatdang so Kaban+ nen Jehova.
16 Balet sanen akaloob ed Syudad nen David so Kaban nen Jehova, tinmandag ed bintana si Mical+ ya anak nen Saul tan anengneng toy Arin David a manlukso tan mansasayaw-sayaw ed arapan nen Jehova; tan sikatoy minudmora to ed puso to.+
17 Kanian inloob da so Kaban nen Jehova tan inlira da ed pasen tod loob na tolda ya impaalagey nen David parad satan.+ Insan angiyapay si David na saray apay a popoolan+ tan bagat a pandurungoan+ diad arapan nen Jehova.+
18 Sanen niyapay la nen David iray apay a popoolan tan bagat a pandurungoan, benendisyonan to ray totoo diad ngaran nen Jehova na saray armada.
19 Ontan met, binunogan to so amin a totoo, say interon ulop na Israel, balang laki tan bii, na kurti-singsing a tinapay, bibingkan datiles, tan bibingkan pasas, insan anempet lan amin so totoo, balang sakey diad dilin abung to.
20 Sanen sinmempet si David pian bendisyonan toy sankaabungan to, sikatoy inabet nen Mical+ ya anak nen Saul. Inkuan to: “Agaylay impangigloria na ari na Israel ed sarili to ed sayan agew sanen nilakseb toy kawes to ed arap na saray bibiin aripen na saray lingkor to, a singa sakey a toon anggapoy-isip!”+
21 Diad saman et inkuan nen David ed si Mical: “Diad arapan nen Jehova so nanselebraan ko, ta pinili to ak imbes a say amam tan say interon sankaabungan to, tan tinuro to ak a magmaliw a lider na Israel a totoo nen Jehova.+ Kanian manselebra ak ed arapan nen Jehova,
22 tan manpaabeba ak ni nen say saya tan anggan ed dilin pakanengneng ko. Balet nigloria ak ed panamegley na saramay aripen a bibiin binitlam.”
23 Kanian si Mical+ ya anak nen Saul et ag-awalaay ananak anggad agew na impatey to.
Paimanod leksab
^ Odino posiblin, “pegley.”
^ Odino “naingongotan.”
^ Kabaliksan toy “Dinmalang so Sanok ed si Uzah.”
^ Literal, “akabalkes.”
