Komaduan Samuel 7:1-29
7 Sanen manaayam la so ari ed dilin abung*+ to tan sikatoy impanpainawa la nen Jehova manlapud amin ya akapaliber a kalaban to,
2 inkuan na ari ed si propetan Natan:+ “Manaayam ak ed abung a gawad sedro,+ balet say Kaban na tuan Dios et nipasen ed pegley na saray abel a tolda.”+
3 Oniay ebat nen Natan ed ari: “Gawam so antokaman a walad pusom, ta walad sika si Jehova.”+
4 Diad saman a labi et sinmabi so mensahe nen Jehova ed si Natan, ya inkuan to:
5 “La ka tan ibagam ed si David a lingkor ko, ‘Oniay inkuan nen Jehova: “Kasin ipaalageyan mo ak na abung a panayaman ko?+
6 Ta manlapud samay agew ya impaway kod Ehipto so totoo na Israel anggad sayan agew et agak nanayam ed sakey ya abung,+ noagta nanalis-alis* ak ed tolda tan tabernakulo.+
7 Diad amin a panaon a kaibak so amin ya Israelita,* wala tay imbagak ed siopaman a pangulo ed saray tribu na Israel a tinurok a manpastol ed Israel a totook, ya inkuan kon, ‘Akin et agyo ak impaalageyan na abung a gawad sedro?’”’
8 Kanian ibagam natan ed si David a lingkor ko, ‘Oniay inkuan nen Jehova na saray armada: “Inala ta kad saray panagpastolan, diad pangaasikasom na pulok,+ pian magmaliw a lider na Israel a totook.+
9 Tan wala ak ed sika diad inerman a laen mo,+ tan paandien kod arapan mo so amin a kalaban mo;+ tan gawaen kon bantog so ngaran mo+ a singa saray bantog a totoo ed dalin.
10 Mamili ak na sakey a pasen parad Israel a totook tan pansiansiaen ko ra ditan, tan manayam ira ditan tan agla ran balot nagonigon; tan agla ra pairapen lamet na saray mauges a totoo a singa agawad apalabas,+
11 manlapud agew ya anuro ak na saray ukom+ a mangidaulo ed Israel a totook. Tan pampainawaen ta ka manlapud amin ya akapaliber a kalaban mo.+
“‘“Imbaga met nen Jehova a sakey a sankaabungan* so iletneg nen Jehova parad sika.+
12 Sano manampot la ray agew mo+ tan sano manpainawa ka la a kaiba na saray inmuunan atateng mo, turoen ko so ilalak mo,* say mismon anak mo,* tan iletneg kon malet so panarian to.+
13 Sikato so mangipaalagey na abung parad ngaran ko,+ tan iletneg kon malet so trono na panarian to ya anggad angga.+
14 Siak so magmaliw ya ama to, tan sikatoy magmaliw ya anak ko.+ Sano sikatoy manggaway aliwa, ipetek ko ed panamegley na lewet na saray totoo tan ed panamegley na saray bakbak na ananak na totoo.*+
15 Agnaandi ed sikato so matoor a panangarok ya inekal ko lad si Saul,+ a sikatoy inekal ko ed arapan mo.
16 Say sankaabungan mo tan say panarian mo et magmaliw a maligen ya anggad angga; say tronom et niletneg a malet diad anggad angga.”’”+
17 Amin irayan salita tan sayan interon pasingawey et impasabi nen Natan ed si David.+
18 Diad saman et linmoob si Arin David tan yinmurong ed arapan nen Jehova tan inkuan to: “O Soberanon Katawan a Jehova, siopa ak tan say sankaabungan ko, ya ontan lay kabaleg na ginawam parad siak?+
19 Tan singa aliwa ni yan magenap, O Soberanon Katawan a Jehova, ta imbagam met a mansiansia so sankaabungan na lingkor mo anggad mabayag nin arapen. O Soberanon Katawan a Jehova, saya so bilin* parad interon katooan.
20 Anto ni nibagad sika na lingkor mon David, ta kabkabat mo ak,+ O Soberanon Katawan a Jehova?
21 Nisengeg ed salitam tan unong ed panlabayan na pusom* et ginawam irayan amin a makapadinayew a bengatla tan impaamtam iraya ed lingkor mo.+
22 Kanian saya so rason no akin et makapadinayew ka,+ O Soberanon Katawan a Jehova. Anggapoy makapipara ed sika,+ tan anggapo lay arum a Dios noag sika labat;+ paneknekan iya na amin a nadngelan mi.
23 Tan wala ta ni arum a nasyon ed dalin a mipara ed Israel a totoom?+ Dinondon ira na Dios bilang totoo to,+ tan nanggaway ngaran parad sikato+ diad impanggawa toy makapadinayew tan makapakelkelaw iran bengatla parad sikara.+ Pinataynan mo ray nasyon tan saray dirios da nisengeg ed saray totoom a dinondon mod Ehipto.
24 Ginawam so Israel bilang totoom diad amin a panaon;+ tan sika, O Jehova, so nagmaliw a Dios da.+
25 “Natan, O Jehova a Dios, sumpal mo ed amin a panaon so insipan mo nipaakar ed lingkor mo tan say sankaabungan to, tan gawaen mo komon so unong ed insipan mo.+
26 Komon ta say ngaran mo et nitandoro ya anggad angga,+ pian ibaga na totoo, ‘Si Jehova na saray armada so Dios na Israel,’ tan komon ta niletneg a malet ed arapan mo so sankaabungan nen David a lingkor mo.+
27 Ta impaamtam ed lingkor mo, O Jehova na saray armada a Dios na Israel, ya inkuan mon, ‘Mangiletneg ak na sankaabungan* parad sika.’+ Kanian say lingkor mo et nampakpel* a mangibalikas ed sayan pikakasi ed sika.
28 O Soberanon Katawan a Jehova, sika so tuan Dios, tan saray salitam et katuaan,+ tan insipan mod lingkor mo irayan maabig a bengatla.
29 Kanian panliketan mo komon a bendisyonan so sankaabungan na lingkor mo, tan mansiansia komon itan ed arapan mo ya anggad angga;+ ta sika so angisipan, O Soberanon Katawan a Jehova, tan lapud panamendisyon mo et nabendisyonan komon ya anggad angga so sankaabungan na lingkor mo.”+
Paimanod leksab
^ Odino “palasyo.”
^ Literal, “manaakar.”
^ Literal, “lalakin ananak nen Israel.”
^ Odino “dinastiya.”
^ Literal, “binim.”
^ Literal, “samay ompaway ed akindalem mo.”
^ Odino posiblin, “ananak nen Adan.”
^ Odino “ganggan.”
^ Odino “unong ed linawam.”
^ Odino “dinastiya.”
^ Literal, “aromog to so puso to.”
