Komaduan Samuel 8:1-18
8 Ag-abayag, tinalo nen David iray Filisteo+ tan sinakop to ra,+ tan inala nen David ed sikara so Meteg-ama.
2 Tinalo to iray Moabita+ tan pinarukol to ra diad dalin tan sinukat to ra ed panamegley na lubir a panagsukat. Duaran sukat na lubir so karukey na dasig na saramay pateyen, tan sakey a sukat na lubir so karukey na dasig na saramay pansiansiaen a mabilay.+ Tan nagmaliw a lingkor nen David iray Moabita tan angiter ira na buis* ed sikato.+
3 Tinalo nen David si Hadadezer ya anak nen Rehob ya ari na Zoba,+ sanen sikatoy linma pian ipawil so pakauley to diad Ilog Eufrates.+
4 Asamsam nen David ed sikato so 1,700 a lalakin de-kabayoan tan 20,000 sundalon manaakar. Insan nilupoy nen David so amin a kabayo na karwahe+ likud labat ed 100 ed saratan.
5 Sanen sinmabi iray Siryano a nanlapud Damasco+ pian ontulong ed si Arin Hadadezer na Zoba, pinapatey nen David so 22,000 ed saray Siryano.+
6 Insan angipuesto si David na saray bantay a sundalo diad teritorya na saray Siryano ed Damasco, tan saray Siryano et nagmaliw a lingkor nen David tan angiter ira na buis ed sikato. Impanalo* nen Jehova si David inerman so nila to.+
7 Ontan met, inala nen David ed saray lingkor nen Hadadezer iray malimpek a panagsamper a gawad balitok tan inawit tod Jerusalem.+
8 Angalay Arin David na dakdakel a gansa diad Beta tan Berota, saray syudad nen Hadadezer.
9 Natan et nadngelan nen Arin Toi na Hamat+ a tinalo nen David so interon armada nen Hadadezer.+
10 Kanian imbaki nen Toi so anak ton si Joram ed si Arin David pian kumustaen tan ibalikas so pililiket to lapud nilabanan tan tinalo toy Hadadezer (ta si Hadadezer et naynay a milalaban ed si Toi), tan sikatoy angawit na saray kagawaan a pilak, balitok, tan gansa.
11 Pinasanto iraya nen Arin David parad si Jehova a singa saramay pilak tan balitok a nanlapud amin a nasyon ya asakop to:+
12 manlapud Sirya tan Moab,+ manlapud saray Ammonita, Filisteo,+ Amalekita,+ tan manlapud saray asamsam ed si Hadadezer+ ya anak nen Rehob ya ari na Zoba.
13 Nanggawa met na ngaran si David sanen pinmawil manlapud impamatey tod 18,000 Edomita diad Lawak na Asin.+
14 Sikatoy angipuesto ed Edom na saray bantay a sundalo. Diad interon Edom so angipuestoan tod sikara, tan nagmaliw a lingkor nen David so amin ya Edomita.+ Impanalo* nen Jehova si David inerman a nila to.+
15 Nantultuloy a nanuley si David ed interon Israel,+ tan sikatoy mangipapaakseb na hustisya tan inkatunong+ parad amin a totoo to.+
16 Si Joab+ ya anak nen Zeruia so pangulo na armada, tan si Jehosafat+ ya anak nen Ahilud so managrekord na saray nagagawa.
17 Saray saserdote et si Zadok+ ya anak nen Ahitub tan si Ahimelec ya anak nen Abiatar, tan say sekretaryo et si Seraias.
18 Si Benaias+ ya anak nen Jehoiada so pangulo na saray Kereteo tan Peleteo;+ tan saray ananak nen David so nagmaliw a manunan opisyal.*
Paimanod leksab
^ Odino “saray regalo.”
^ Odino “Inliktar.”
^ Odino “Inliktar.”
^ Literal, “nagmaliw a saray saserdote.”
