Komaduan Samuel 9:1-13
-
Matoor a panangaro nen David ed si Mefiboset (1-13)
9 Insan inkuan nen David: “Anggapo ta lay akera ed sankaabungan nen Saul a pangipatnagan koy matoor a panangaro nisengeg ed si Jonatan?”+
2 Natan et walay sakey a lingkor ed sankaabungan nen Saul a manngaray Ziba.+ Kanian sikatoy pinaonla rad si David, tan sikatoy tinepetan na ari: “Sika si Ziba?” Inyebat to: “Siak so lingkor mo.”
3 Inkuan ni na ari: “Anggapo ta lay akera ed sankaabungan nen Saul a pangipatnagan koy matoor a panangaro na Dios?” Oniay inyebat nen Ziba ed ari: “Wala ni sakey ya anak nen Jonatan; lupoy* so duaran sali to.”+
4 Sikatoy tinepetan na ari: “Kawalaan to?” Inmebat si Ziba ed ari: “Sikatoy walad abung nen Makir+ ya anak nen Amiel diad Lo-debar.”
5 Angibakin tampol si Arin David na mangala ed sikato diad abung nen Makir ya anak nen Amiel diad Lo-debar.
6 Sanen akasabid si David si Mefiboset ya anak nen Jonatan ya anak nen Saul, sikatoy tampol a tinmalimukor tan dinmakmomo. Insan inkuan nen David: “Mefiboset!” a diad saman et inyebat to: “Wadia ak a lingkor mo.”
7 Inkuan nen David ed sikato: “Agka natatakot, ta ipatnag kod sika so matoor a panangaro+ nisengeg ed si Jonatan ya amam, tan ipawil kod sika so amin a dalin nen Saul a lakim, tan naynay kan ondungo* ed lamisaan ko.”+
8 Diad saman et sikatoy dinmakmomo tan inkuan to: “Siopa ta so lingkor mo, ya inimanom ni anta singa ak sakey ya inatey ya aso?”+
9 Tinawag natan na ari si Ziba a lingkor nen Saul, tan inkuan tod sikato: “Amin a kayarian nen Saul tan say interon sankaabungan to et iter kod apo na katawan mo.+
10 Sika, saray ananak mo, tan saray lingkor mo so ondalus ed dalin parad sikato, tan anien yo so bunga na satan pian onkanan naakan na saray kabiangay pamilya na apo na katawan mo. Balet si Mefiboset ya apo na katawan mo et naynay ya ondungo ed lamisaan ko.”+
Si Ziba et walaay 15 lalakin ananak tan 20 lingkor.+
11 Insan inkuan nen Ziba ed ari: “Gawaen na lingkor mo so amin ya ingganggan na katawan kon ari ed lingkor to.” Kanian diad lamisaan nen David* so papanganan nen Mefiboset a singa sakey ed saray ananak na ari.
12 Si Mefiboset et walaay kalangweran ya anak a laki a manngaray Mica;+ tan amin iramay manaayam ed abung nen Ziba et nagmaliw a lingkor nen Mefiboset.
13 Tan nanayam ed Jerusalem si Mefiboset, tan diad lamisaan na ari so papanganan to;+ tan lupoy so duaran sali to.+
