Komaduan Timoteo 3:1-17
3 Balet amtaen mo iya, a diad kaunoran iran agew+ et onsabi iray mapeligro tan mair-irap a panaon.
2 Ta saray totoo et magmaliw a maaro ed sarili ra, maaro ed kuarta, mapasirayew, mapaatagey, managmudmora, agmatulok ed atateng da, agda amtay misalamat, aliwa ran matoor,
3 anggapoy panangaro ra ed kapamilyaan da, agda labay so mipaknaan, managpauges ira, anggapoy kontrol da ed sarili ra, masesebeg ira, agda aaroen so kamaongan,
4 traidor ira, anawet so ulo ra, makinon ira, maaro ira ed panliliket imbes a maaro ed Dios,
5 singano walay takot da ed Dios balet agnapatnagan ed kabibilay da so pakayari na satan;*+ arawian mo iraya.
6 Saraya so panlalapuan na saray lalakin agnaliklikas ya onloloob ed saray sankaabungan tan aayaten da ray makapuy a bibiin nabebelatan ed saray kasalanan da, a nasasagyat ed nanduruman pilalek
7 tan naynay a manaaral, ingen ta agdan balot nagagamoran so suston kakabatan ed katuaan.
8 Singa ed samay insumpa nen Janes tan Jambres ed si Moises, ontan met so isusumpa na sarayan lalaki ed katuaan. Aderal lay kanonotan da tan ag-ira naabobonan nipaakar ed pananisia.
9 Anggaman ontan, agda la nituloy so gagawaen da, ta mapatpatnag la ed amin so inkamakulangkulang da, a singa ed saraman a duan lalaki.+
10 Balet sika et maapit mon tinumbok so ibabangat ko, kabibilay ko,+ gagalak, pananisiak, panag-anos ko, panangarok, panagsungdok,
11 tan amtam met iray panamasegsegang tan irap a singa saramay naeksperiensyak diad Antioquia,+ Iconio,+ tan Listra.+ Sinungdoan ko irayan panamasegsegang, tan inliktar ak na Katawan ed sarayan amin.+
12 Diad tua, amin a malabay a manbilay a walaay debosyon ed Dios bilang disipulo nen Kristo Jesus et napasegsegang met.+
13 Balet saray mauges a totoo tan saray impostor et magmaliw a lalon mauges, a mamapalikdo tan napapalikdo ira.+
14 Balet sika, mantultuloy ka ed saray bengatlan naaralan mo tan akatangguyor ed sikan manisia,+ lapud kabat mo no siopa ray akaaralan mo ed saraya
15 tan manlapud inkaugaw mo+ et naamtaan mo la ray masanton sulat,+ ya akatulong ed sikan magmaliw a marunong parad kililiktar diad panamegley na pananisia ed si Kristo Jesus.+
16 Say interon Kasulatan et impuyan na Dios+ tan makagunggona parad panagbangat,+ pananimbawa, panangipetek, panagdisiplina unong ed inkatunong,+
17 pian say too na Dios et sigpot a makayari, ya akaparaan a maong parad amin a maabig a gawa.
Paimanod leksab
^ Literal, “agda bibidbiren so pakayari na satan.”
