Aggeo 1:1-15
1 Diad komaduan taon nen Arin Dario, diad unonan agew na komanem a bulan, sinmabi ed panamegley nen propeta Aggeo*+ so mensahe nen Jehova ed si Zerubabel+ ya anak nen Sealtiel, say gobernador na Juda, tan ed si Josue ya anak nen Jehozadak ya atagey a saserdote:
2 “Oniay inkuan nen Jehova na saray armada, ‘Ibabaga na sarayan totoo, “Agni asabi so panaon ya ipaalagey* so abung* nen Jehova.”’”+
3 Tan sinmabi lamet so mensahe nen Jehova diad panamegley nen propeta Aggeo:+
4 “Saya kasi panaon pian manayam kayod mararakep ya abung yo, anta say abung ko et apaulyanan ya ageraygeray?+
5 Oniay inkuan natan nen Jehova na saray armada, ‘Imano yo* iray paraan yo.
6 Dakerakel so intanem yon bukel, balet daiset so inani yo.+ Mamangan kayo, balet agkayo napepesel. Oniinum kayo, balet agkayo napepenek. Mansusulong kayoy kawes, balet agkayo napepetangan. Samay mantratrabaho et iiyan tod abutaw-butaw a supot so upa to.’”
7 “Oniay inkuan nen Jehova na saray armada, ‘Imano yo* iray paraan yo.’
8 “‘Tatdang kayod palandey tan mangala kayoy troso.+ Tan ipaalagey yo so abung ko,+ pian naliketan tan nigloria ak,’+ so inkuan nen Jehova.”
9 “‘Dakel so iilaloan yo balet daiset labat so naaawat yo; tan sanen angisempet kayo ed abung yo, pinaandik lanlamang itan.+ Antoy rason?’ so imbaga nen Jehova na saray armada. ‘Lapud ageraygeray so abung ko, balet okupado kayon mangaasikaso ed dilin abung yo.+
10 Kanian ag-inter ed sikayo na tawen so linaew to, tan ag-inter ed sikayo na dalin so bunga to.
11 Tan inyakar koy kelang ed dalin, ed saray kapalandeyan, ed ilik, balon alak, larak, saray ontutubo ed dalin, saray totoo, saray ayayep, tan amin a kimey na saray lima yo.’”
12 Dinmengel si Zerubabel+ ya anak nen Sealtiel,+ tan si Josue ya anak nen Jehozadak+ ya atagey a saserdote, tan saray arum nin totoo, ed boses nen Jehova a Dios da tan ed salita nen propeta Aggeo, lapud sikatoy imbaki nen Jehova a Dios da; tan tinmakot iray totoo lapud si Jehova.
13 Insan oniay mensahen inter nen Aggeo, say mensahero nen Jehova, ed saray totoo unong ed ingganggan ed sikato nen Jehova: “‘Wala ak ed sikayo,’+ so imbaga nen Jehova.”
14 Kanian pinakiwas nen Jehova+ si Zerubabel ya anak nen Sealtiel, say gobernador na Juda,+ tan si Josue+ ya anak nen Jehozadak ya atagey a saserdote, tan saray arum nin totoo; tan linma ra tan ginapoan dan ipaalagey lamet so abung na Dios dan si Jehova na saray armada.+
15 Agawa iya diad koma-24 ya agew na komanem a bulan ed komaduan taon nen Arin Dario.+
Paimanod leksab
^ Kabaliksan toy “Inyanak Legan na Piesta.”
^ Odino, “ipaalagey lamet.”
^ Odino, “templo.”
^ Odino “Nonot yon maong.”
^ Odino “Nonot yon maong.”
