Aggeo 2:1-23
2 Diad koma-21 ya agew na komapiton bulan et sinmabi so mensahe nen Jehova ed panamegley nen propeta Aggeo,+
2 “Ipangasim a tepeten ed si Zerubabel+ ya anak nen Sealtiel, say gobernador na Juda,+ tan ed si Josue+ ya anak nen Jehozadak+ ya atagey a saserdote, tan saray arum nin totoo:
3 ‘Siopa ed sikayo ran akera so akanengneng ed sayan abung* diad datin gloria to?+ Antoy pakanengneng yod saya natan? Agta arawdawi iya no ikompara ed samay dati?’+
4 “‘Balet manpabiskeg ka natan, Zerubabel,’ so imbaga nen Jehova, ‘tan manpabiskeg ka, Josue ya anak nen Jehozadak ya atagey a saserdote.’
“‘Tan manpabiskeg kayo, amin yon totoo ed sayan dalin,’+ so imbaga nen Jehova, ‘tan mankimey kayo.’
“‘Ta wala ak ed sikayo,’+ so imbaga nen Jehova na saray armada.
5 ‘Tandaan yo imay insipan kod sikayo sanen pinmaway kayod Ehipto,+ tan mansiasiansiad sikayo so espirituk.*+ Agkayo ontatakot.’”+
6 “Ta oniay inkuan nen Jehova na saray armada, ‘Maminsan ni—agla manbayag—yegyegen koy tawen tan dalin tan dayat tan amagan dalin.’+
7 “‘Tan yegyegen koy amin a nasyon, tan onloob iray ankabli* a bengatla na amin a nasyon;+ tan panoen koy gloria iyan abung,’+ so inkuan nen Jehova na saray armada.
8 “‘Kien ko so pilak, tan kien ko so balitok,’ so imbaga nen Jehova na saray armada.
9 “‘Diad arapen et magmaliw a mas magloria iyan abung nen samay inmuna,’+ so inkuan nen Jehova na saray armada.
“‘Tan iter koy kareenan ed sayan pasen,’+ so imbaga nen Jehova na saray armada.”
10 Diad koma-24 ya agew na komasiam a bulan, ed komaduan taon nen Dario, oniay mensahe nen Jehova a sinmabi ed si propeta Aggeo:+
11 “Oniay inkuan nen Jehova na saray armada, ‘Ipangasim, tepetan mo ray saserdote nipaakar ed ganggan:+
12 “No walay toon sankaawit tod kawes to so sagradon karne, tan nisapigar toy kawes to ed tinapay odino digo odino alak odino larak odino antokaman a kakanen, magmaliw kasi iratan a sagrado?”’”
Inmebat iray saserdote: “Andi!”
13 Insan intepet nen Aggeo: “No say toon agmalinis lapud impaniwit toy bangkay* et asapigar to so dinanman ed sarayan bengatla, magmaliw kasi itan ya agmalinis?”+
Inmebat iray saserdote: “Magmaliw itan ya agmalinis.”
14 Kanian inkuan nen Aggeo: “‘Ontan met irayan totoo, tan ontan met iyan nasyon ed arapan ko,’ so imbaga nen Jehova, ‘tan ontan so amin a kimey na saray lima ra; antokaman ya iyapay da ditan et agmalinis.’
15 “‘Balet natan, ipangasi yon imanoen iya* manlapud natan a manpatuloy: Sanen agni nitapew so sakey a bato ed sananey a bato diad templo nen Jehova,+
16 antoy kipapasen nensaman? Sano walay onlad bunton na ilik tan manilalo na 20 sukat, 10 labat so naala to: tan sano walay onlad panagpespesan na ubas pian mangalay 50 sukat na alak, 20 labat so naala to;+
17 dineral ko so amin a kimey na saray lima yo ed panamegley na makasinit a petang tan boot+ tan uran a kristal, balet anggapod sikayo so inmasingger ed siak,’ so imbaga nen Jehova.
18 “‘Ipangasi yo, imano yo iya* manlapud natan a manpatuloy, manlapud koma-24 ya agew na komasiam a bulan, manlapud agew a niletneg so pundasyon na templo nen Jehova;+ imano yo iya:
19 Wala ta ni bini ed pasen a panagsimpenan?*+ Say sengeg na ubas, kiew ya igos, kiew a granada, tan kiew ya olibo—agni iratan nambunga, agta ontan? Manlapud sayan agew et mangiter ak na bendisyon.’”+
20 Diad komaduan pankanawnawa et oniay mensahe nen Jehova a sinmabi ed si Aggeo diad koma-24 ya agew na bulan:+
21 “Ibagam ed si Zerubabel a gobernador na Juda, ‘Yegyegen ko so tawen tan say dalin.+
22 Deralen koy trono na saray panarian tan upoten koy biskeg na saray panarian na saray nasyon;+ tan deralen koy karwahe tan saray akakabayo ed saratan, tan natumba iray kabayo tan saray akakabayo, balang sakey ed panamegley na espada na agi to.’”+
23 “‘Diad satan ya agew,’ so imbaga nen Jehova na saray armada, ‘usaren ta ka, sikan aripen ko a Zerubabel+ ya anak nen Sealtiel,’+ so imbaga nen Jehova, ‘tan gawaen ta kan singa singsing a panagtatak, lapud sika so pinilik,’ so imbaga nen Jehova na saray armada.”
Paimanod leksab
^ Odino “templo.”
^ Odino posiblin, “tan sanen manalalagey ed sikayo so espirituk.”
^ Odino “mararakep.”
^ Odino “sakey a kamarerwa.”
^ Odino “nonoten a maong iya.”
^ Odino “nonot yon maong iya.”
^ Odino “abot a panagkargaay ilik?”
