Amos 2:1-16
2 “Oniay inkuan nen Jehova,‘“Lapud amitlon impanrebelde* na Moab,+ tan lapud amipat, agko itan babawien,Ta pinoolan to ray pukel na ari na Edom pian magmaliw a dena.
2 Kanian mangiyakar ak na apoy ed Moab,Tan upoten na satan iray malet a tori na Keriot;+Ompatey so Moab legan na panggugulo,Sano walay oneyag parad guerra tan ontanol so tambuyog.+
3 Ekalen kod sikato imay manuuley*Tan pateyen kon kaiba to so amin a prinsipe to,”+ so inkuan nen Jehova.’
4 Oniay inkuan nen Jehova,‘Lapud amitlon impanrebelde na Juda,+ tan lapud amipat, agko itan babawien,Ta impulisay day ganggan* nen Jehova,Tan agda sinumpal iray totontonen ya inter to;+Noagta imbalang met ira na saray katilaan a tinumbok na inmuunan atateng da.+
5 Kanian mangiyakar ak na apoy ed Juda,Tan upoten na satan iray malet a tori na Jerusalem.’+
6 Oniay inkuan nen Jehova,‘Lapud amitlon impanrebelde na Israel,+ tan lapud amipat, agko itan babawien,Ta ilalako ra so matunong a too a kasalat na pilak,
Tan say mairap-bilay a kasalat na sakey paris a sandalyas.+
7 Igagatin dad dabok so ulo na saray pakaskasi,+Tan sinaraan day dalan na saray mauyamo.+
Parehon bii so inakdolan na sanama,Kanian papabandayen day masanton ngaran ko.
8 Diad abay na kada altar+ et dudukolan da iray sinamsam dan kawes a garantiya ed utang;+Tan say alak ya ininum da ed abung* na saray dirios da et inala rad saramay impanmulta ra.’
9 ‘Balet siak so aneral ed samay Amoreo a walad arapan da,+A say kaatagey to et singa saray sedro tan say kabiskeg to et singa saray kiew a roble;*
Dineral ko ray bunga to ed tagey tan saray lamot to ed leksab.+
10 Impaway ta kayod dalin na Ehipto,+Tan 40 taon ya inwanwan ta kayod kalawakan,+Pian nakayarian yo so dalin na Amoreo.
11 Pinilik so arum ya ananak yo bilang propeta+Tan arum ed saray kalangweran yon lalaki bilang Nazareo.+
Agta tua itan, O totoo na Israel?’ so imbaga nen Jehova.
12 ‘Balet papainumen yoy alak iray Nazareo,+Tan ingganggan yo iray propeta: “Agkayo manpropropesiya.”+
13 Kanian temeken ta kayo ed kawalaan yo,A singa kariton a napnoy pagey a temeken toy antokaman a nadalan to.
14 Anggapoy nabatikan na samay maples ya ombatik,+Agnapansiansia na samay mabiskeg so pakayari to,Tan anggapoy sundalo a niliktar toy bilay* to.
15 Agmakapansiansia imay managpana ed kawalaan to,Agmakaliktar imay mabatik,Tan agniliktar na sundalon akakabayo so bilay* to.
16 Anggan saramay sankakpelan* ed saray sundaloEt ombatik a lakseb ed satan ya agew,’+ so imbaga nen Jehova.”
Paimanod leksab
^ Odino “impanggaway krimen.”
^ Literal, “ukom.”
^ Odino “bilin.”
^ Odino “templo.”
^ Sakey iyan klase na angkabaleg a kiew. Diad Ingles et oak.
^ Odino “kamarerwa.”
^ Odino “kamarerwa.”
^ Odino “saramay walaay mabiskeg a puso.”
