Amos 6:1-14
6 “Pakaskasi la iramay mataletalek* a walad Sion,Saramay walad palandey na Samaria a maligen so liknaan da,+Saray prominentin totoo na samay manunaan ed saray nasyon,Saramay lalaen na sankaabungan na Israel!
2 Basil kayo ed Calne tan nengneng yo.
Manlapud man et la kayo ed baleg a syudad na Hamat,+Tan la kayo ed Gat na saray Filisteo.
Kasin mas maabig ni ra nen sarayan panarian,*Odino kasin mas maawang ni teritorya ra nen say teritorya yo?
3 Lilingwanan yo ta la so agew na kadederal,+Tan iloloob yo so panuley* na inkaruksa?+
4 Ondudukol irad saray dukolan a garing*+ tan mandukdukol irad saray katri,+A kakanen da iray kalakian a karnero ed pulok tan saray pinataban baka;*+
5 Manggagawa ray kansion ed tanol na arpa,*+Tan mangiimbento ra na saray instrumento, a singa si David;+
6 Yaong so paniinuman day alak,+Tan manpupuyok ira na sankaabigan iran larak,
Balet anggapoy pibabali ra* ed agawan kadederal ed Jose.+
7 Kanian sikara so unonan nibantak ed arum a dalin,+Tan naandi so panliliket na saramay mandukdukol.
8 ‘Say Soberanon Katawan a Jehova et nansamba ed ngaran to,’*+ so imbaga nen Jehova a Dios na saray armada,‘“Makapadimlad siak so ipapasirayew nen Jacob,+Kabkabusol ko iray malet a tori to,+Tan iyawat kod saray kalaban to so syudad tan say amin a wadtan.+
9 “‘“Tan no samploran lalaki so natilak ed sakey ya abung, ompatey met ira lanlamang.
10 Onsabi so sakey a kanayon* pian ipaway to ra tan poolan to ran sansakey. Ipaway tod abung iray pukel da; insan ibaga tod siopaman a walad saray kuarto na abung, ‘Wala ta ni kaibam?’ Tan sikatoy onebat, ‘Anggapo!’ Insan ibaga to, ‘Mandeen ka! Ta aliwa iyan panaon pian bitlaen so ngaran nen Jehova.’”
11 Ta si Jehova so mangigaganggan,+Tan igeba to so baleg ya abung pian magmaliw a bunton,Tan say melag ya abung pian magmaliw a geray.+
12 Kasin diad tapew na baleg a bato so batikan na saray kabayo,Odino kasin ditan so pambakaan na sakey?
Ta impagmaliw yon makasamal a tanaman so inkahustisya,Tan ahenho* so bunga na inkatunong.+
13 Panliliketan yo so andi-kakanaan,Tan ibabaga yon: “Agta nagmaliw kamin makapanyari* diad dilin biskeg mi?”+
14 Kanian iyakar ko so sakey a nasyon sumpad sikayo, O sankaabungan na Israel,’+ so imbaga nen Jehova a Dios na saray armada,‘Tan pairapen da kayo manlapud Lebo-hamat*+ ya anggad Kulos* na Araba.’”
Paimanod leksab
^ Odino “kampante.”
^ Mapatnag a manutukoy ed saray panarian na Juda tan Israel.
^ Literal, “yurongan.”
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
^ Odino “saray kilaw a kalakian a baka.”
^ Odino “nandeles ya instrumento.”
^ Literal, “ag-ira asakitan.”
^ Odino “ed kamarerwa to.”
^ Literal, “lakin agi nen ama to.”
^ Odino “ampait.”
^ Literal, “angala kami na saray saklor parad sikami.”
^ Odino “lolooban na Hamat.”
