Deuteronomio 13:1-18
-
No panoy pantrato ed saray apostata (1-18)
13 “No diad limog yo et walay sakey a propeta odino sakey a manpaparles ed panamegley na saray kugip tan ikdan to kayo na tanda odino pasakbay a nagawa ed arapen,
2 tan tinmua so tanda odino pasakbay a sinalita tod sikayo, tan ibabaga ton, ‘Ontumbok itayod arum a dirios,’ saray dirios ya agyo kabat, ‘tan manlingkor itayod saratan,’
3 agyo dedengeley ibabaga na satan a propeta odino managkugip,+ ta susuboken kayo nen Jehova a Dios yo+ pian naamtaan to no kasin inaro yoy Jehova a Dios yo ed interon puso yo tan interon kamarerwa* yo.+
4 Si Jehova a Dios yo so nepeg yon tumboken, sikato so nepeg yon takotan, saray ganggan to so nepeg yon sumpalen, say boses to so nepeg yon dengelen; sikato so nepeg yon panlingkoran tan nepeg yon peketan a malet.+
5 Balet nepeg a pateyen itan a propeta odino satan a managkugip,+ ta inlagyat toy panagrebelde ed si Jehova a Dios yo, ya angipaway ed sikayo ed dalin na Ehipto tan anondon ed sikayo ed abung ya akaaripenan yo. Sinali ton iyarawi kayod dalan ya ingganggan nen Jehova a Dios yo a panakaran yo. Tan nepeg yon ekalen so kaugsan diad limog yo.+
6 “No say agim ya anak nen inam, odino say anak mon laki odino bii odino say pinablim ya asawa odino say sankaapitan a kaulop mo,* et maamot to kan lagyaten ya ikuan ton, ‘Onla ta’n manlingkor ed arum a dirios,’+ saray dirios ya agmo kabat tan agkabat na saray inmuunan atateng mo,
7 ed saray dirios na saray totoon walad kaliberliber yo, balanglan asingger ed sika odino saramay arawi ed sika, manlapud sakey a sampot na dalin ya anggad sananey a sampot na dalin,
8 agka onaabobon ed sikato odino ondedengel ed sikato,+ odino kasian mo odino abageyen mo odino salimbengan mo;
9 noagta sikatoy nepeg mon pateyen.+ Sika so unonan manupak ed sikato pian ompatey, insan amin a totoo so manupak ed sikato.+
10 Tan sikatoy tupaken mo ya anggad ompatey,+ ta sinali to kan iyarawi ed si Jehova a Dios mo, ya angipaway ed sika ed dalin na Ehipto, diad abung ya akaaripenan mo.
11 Insan narengelan itan na interon Israel tan ontakot ira, tan agda lan balot gawaen ed limog yo so mauges a singa satan.+
12 “No bilang ta diad sakey ed saray syudad ya iter ed sikayo nen Jehova a Dios yo a panayaman yo et narengelan yon nibabaga,
13 ‘Wala ray andi-kakanaan a lalaki a pinmaway ed limog yo pian iyarawi da iray manaayam ed syudad da, ya inkuan dan: “Onla tayon manlingkor ed arum a dirios,” saray dirios ya agyo kabat,’
14 nepeg yon imbestigaan iya, ya usisaen yon maong tan mantepet kayo;+ tan no apaneknekan a tua ya agawa ed limog yo iyan makapadimlan bengatla,
15 nepeg yon pateyen ed espada iray manaayam ed satan a syudad.+ Deral yo itan tan amin a wadtan, a pati saray ayayep,+ diad panamegley na espada.
16 Insan yo tiponen ed pegley na plaza so amin ya asamsam ditan tan poolan yoy syudad, tan saray asamsam ditan et onkanan interon apay parad si Jehova a Dios yo. Satan a syudad et magmaliw a permanentin bunton na saray geray. Aglan balot itan nipaalagey.
17 Agyo nepeg ya alaen so antokaman a nigana ed kadederal,*+ pian onkepa so mandarlang a sanok nen Jehova tan kasian tan abageyen to kayo tan parakelen to kayo, unong ya insamba tod saray inmuunan atateng yo.+
18 Ta nepeg yon unoren si* Jehova a Dios yo diad panumpal yod saray ganggan ya iter kod sikayo natan, diad ontan et gagawaen yo so duga ed pakanengneng nen Jehova a Dios yo.+
Paimanod leksab
^ Odino “say kaulop mon singa say dilin kamarerwam.”
^ Odino “ya impagmaliw a sagrado diad pananebel.”
^ Odino “nepeg yon dengelen so boses nen.”
