Deuteronomio 31:1-30
31 Insan pinmaway si Moises tan imbaga to irayan salita ed interon Israel,
2 ya inkuan tod sikara: “Mantaon ak lay 120 natan.+ Agak la nayarin mangidaulo ed sikayo,* ta inkuan nen Jehova ed siak, ‘Agka makabaliw ed sayan Jordan.’+
3 Si Jehova a Dios yo so ombaliw ed unaan yo, tan sikaton mismo so maneral ed sarayan nasyon diad arapan yo, tan pataynanen yo ra.+ Si Josue so mangidaulo ed sikayo diad ibaliw yo,+ unong ya imbaga nen Jehova.
4 Gawaen nen Jehova ed sikara so singa ginawa tod si Sihon+ tan Og,+ ya arari na saray Amoreo, tan ed dalin da, sanen dineral to ra.+
5 Taloen ira nen Jehova parad sikayo, tan nepeg yon gawaen ed sikara so unong ed interon ganggan ya inter kod sikayo.+
6 Manpakpel tan manpabiskeg kayo.+ Agkayo ontatakot odino onkekebbiew ed arapan da,+ ta si Jehova a Dios yo so miulop ed sikayo. Agto kayo taynanan odino paulyanan.”+
7 Insan tinawag nen Moises si Josue tan oniay inkuan tod sikato diad pakanengneng na interon Israel: “Manpakpel tan manpabiskeg ka,+ ta sika so mangiyakar ed sarayan totoo diad dalin ya insipan nen Jehova ed saray inmuunan atateng da ya iter tod sikara, tan iter mo itan ed sikara bilang tawir da.+
8 Si Jehova so onlad unaan mo, tan sikatoy naynay a miulop ed sika.+ Agto ka taynanan odino paulyanan. Agka ontatakot odino onkekebbiew.”+
9 Insan insulat nen Moises iyan Ganggan+ tan inter tod saray saserdote, saray Levita, a sikara so manag-awit na kaban na sipanan nen Jehova, tan ed amin a mamatatken na Israel.
10 Ingganggan ira nen Moises, ya inkuan to: “Diad kasampotan na kada pitoran taon, diad aturon panaon ed taon na panangibulos,+ legan na Piesta na Saray Alolong,*+
11 sano onarap so interon Israel ed si Jehova+ a Dios yo diad pasen a pilien to, nepeg yon basaen iyan Ganggan pian narengel na interon Israel.+
12 Tipon yo iray totoo,+ saray lalaki, bibii, ugugaw,* tan say dayon walad loob na saray syudad* yo, pian narengel da tan naaralan da so ontakot ed si Jehova a Dios yo tan maalwar dan sumpalen so amin a salita na sayan Ganggan.
13 Insan ondengel iray ananak da ya agni makaamta ed sayan Ganggan+ tan naaralan day ontakot ed si Jehova a Dios yo diad amin ya agew na pambilay yo ed dalin a baliwen yo diad Jordan pian kayarianen yo.”+
14 Insan inkuan nen Jehova ed si Moises: “Magano lay ipatey mo.+ Tawag moy Josue, tan onarap kayon dua* ed tolda a pantitiponan, pian sikatoy turoen ko.”+ Kanian linmay Moises tan Josue tan inmarap irad tolda a pantitiponan.
15 Insan nampanengneng ed tolda si Jehova diad lurem a singa lusek, tan nansiansiad lolooban na tolda imay lurem a singa lusek.+
16 Inkuan natan nen Jehova ed si Moises: “Magano ka lan ompatey,* tan sarayan totoo et onggapon mibiang ed espiritual a prostitusyon ed arum a dirios a walad kaliberliber da diad dalin a laen da.+ Taynanan da ak+ tan sumlangen da so impisipanan kod sikara.+
17 Diad satan a panaon et ondalang so sanok ko ed sikara,+ tan taynanan ko ra+ tan agak onnengneng* ed sikara+ anggad naupot ira. Insan kayarin ondapod sikara so dakerakel a desyang tan gonigon,+ ibaga ran, ‘Agta nagagawa ed sikatayo irayan desyang lapud anggapod sikatayo so Dios tayo?’+
18 Balet diad satan ya agew et siansia nin agak onnengneng lapud amin ya inkauges a ginawa ra diad intumbok dad arum a dirios.+
19 “Natan, isulat yo iyan kansion ya onkana ed sikayo+ tan ibangat yod saray Israelita.+ Ibaga yod sikara ya aralen da iya* pian onkanan tasik sumpad totoo na Israel.+
20 Sano iyakar ko rad dalin ya insipan kod saray inmuunan atateng da+—say dalin a manag-agus so gatas tan dilo+—tan mangan ira anggad napesel ira tan onaligwas* ira,+ diad satan et ontumbok irad arum a dirios tan panlingkoran da iratan tan agda ak respetoen tan sumlangen day sipanan ko.+
21 Sano ondapod sikara so dakel a kadederal tan gonigon,+ sayan kansion so onkanan tasi sumpad sikara (ta agnepeg a lingwanan itan na saray kapolian da), ta amtak la so tendensia ran gawaen+ sakbay ni ya iyakar ko rad dalin ya insipan kod sikara.”
22 Kanian diad saman ya agew et insulat nen Moises itan a kansion tan imbangat tod saray Israelita.
23 Tinuro to* met si Josue+ ya anak nen Nun tan inkuan to: “Manpakpel tan manpabiskeg ka,+ ta sika so mangiyakar ed saray Israelita diad dalin ya insipan kod sikara,+ tan naynay ak a miulop ed sika.”
24 Sanen asumpal lan insulat nen Moises ed sakey a libro so amin a salita na sayan Ganggan,+
25 ingganggan nen Moises iray Levita a manag-awit na kaban na sipanan nen Jehova, ya inkuan to:
26 “Ala yo iyan libro na Ganggan+ tan iyan yod abay na kaban+ na sipanan nen Jehova a Dios yo, tan onkana iyan tasi sumpad sikayo.
27 Ta amtak a mismo so inkarebelyoso yo+ tan inkabenger* yo.+ No panoy inkarebelyoso yod si Jehova legan a mabilay ak nin kaiba yo, insan la lagi kayari na ipatey ko!
28 Tipon yod siak so amin a mamatatken ed saray tribu yo tan saray opisyal yo, ta ibagak iraya ed sikara, tan gawaen kon tasik so tawen tan dalin sumpad sikara.+
29 Ta amtak a no inatey ak la et seguradon mauges so ikiwas yo+ tan taynanan yoy dalan ya ingganggan kon panakaran yo. Tan onsabi ed sikayo so kadederal+ diad kasampotan na saray agew, ta gawaen yo so mauges ed pakanengneng nen Jehova tan sikatoy pasanoken yod saray kimey na saray lima yo.”
30 Insan diad pakadngel na interon kongregasyon na Israel, imbalikas nen Moises iray salita na sayan kansion manlapud gapo ya anggad sampot:+
Paimanod leksab
^ Literal, “ompaway tan onloob.”
^ Odino “Saray Temporaryon Siroman.”
^ Literal, “saray angkekelag.”
^ Literal, “saray puerta.”
^ Odino “ompuesto kayo.”
^ Literal, “ondukol a kaiba iray kaamaan mo.”
^ Literal, “iyamot koy lupak.”
^ Literal, “Iyan yo iya ed saray sangi ra.”
^ Literal, “ontaba.”
^ Mapatnag a manutukoy ed Dios.
^ Literal, “inkaawet na tenger.”
