Deuteronomio 8:1-20
8 “Nepeg a maalwar yon unoren so kada ganggan ya iter kod sikayo natan, pian makapantultuloy kayon manbilay+ tan ondakel tan makaloob kayo tan nakayarian yo so dalin ya insipan nen Jehova ed saray inmuunan atateng yo.+
2 Nonot yo so andukey a dalan diad kalawakan, a ditan et impanakar ka nen Jehova a Dios mo ed loob na 40 taon,+ pian nipasal kan magmaliw a mapaabeba, tan nasubok ka+ pian naamtaan no antoy walad pusom,+ no kasin sumpalen mo iray ganggan to odino andi.
3 Kanian impasal to kan magmaliw a mapaabeba tan inabuloyan to kan naerasan+ tan pinakan to kay mana,+ a satan et agpamilyar ed sika tan ed saray amam, pian nipaamta ed sika ya aliwan tinapay labat so pambilay na too, noagta amin a balikas a manlalapud sangi nen Jehova.+
4 Agdinmaan so kawes ya akasulong ed sika, tan aglinmarag iray salim ed loob na 40 taon.+
5 Kabkabat mod pusom ya ipepetek ka nen Jehova a singa pangipepetek na sakey a too ed anak to.+
6 “Natan et nepeg mon sumpalen iray ganggan nen Jehova a Dios mo diad panakar mod saray dalan to tan diad itakot mod sikato.
7 Ta iyakar ka nen Jehova a Dios mo diad maabig a dalin,+ sakey a dalin a walaay manag-agus iran ilog, saray subol tan aralem iran danudanum ya onaagus ed patar a lawak tan diad mapalandey a rehyon,
8 sakey a dalin na trigo tan sebada, kaubasan, saray kiew ya igos, tan saray prutas a granada,+ sakey a dalin a lapuan na larak na olibo tan dilo,+
9 sakey a dalin a dakdakel so naakan tan agka nakulangay antokaman, sakey a dalin a saray bato ditan et nanlaok na balatyang tan makapanminas ka na gansa diad kapalandeyan ditan.
10 “Sano akapangan tan naksel ka la, nepeg mon idayew si Jehova a Dios mo lapud maabig a dalin ya inter tod sika.+
11 Manalwar ka pian agmo nalingwanan si Jehova a Dios mo a sengegay agmo pakasumpal ed saray bilibilin, ganggan, tan totontonen to ya iter kod sika natan.
12 Sano mangan ka tan napesel ka tan mangipaalagey kay mararakep ya abung tan manayam kad saratan,+
13 sano ondakel iray bakam tan saray karnerom tan ondakel so pilak tan balitok mo tan ondakerakel so amin a bengatlan walad sika,
14 agmo komon aabuloyan a magmaliw a mapaatagey so pusom+ a sengegay pakalingwan mod si Jehova a Dios mo, ya angipaway ed sika ed dalin na Ehipto, manlapud abung ya akaaripenan mo,+
15 ya impanakar to kad baleg tan makapataktakot a kalawakan,+ a wala ray maditan uleg tan alakdan tan amagaan a dalin ya anggapon balot so danum. Pinapaway to so danum manlapud bato+
16 tan pinakan to kay mana+ diad kalawakan, a satan et agpamilyar ed saray amam, pian nipasal kan magmaliw a mapaabeba+ tan nasubok ka pian nagunggonaan kad arapen.+
17 No bilang ta ikuan mod sarilim, ‘Yinmaman ak diad dilin pakayarik tan biskeg ko,’+
18 tandaan mon si Jehova a Dios mo so angiter ed sika na pakayari pian onyaman ka,+ pian nasumpal toy sipanan a sinambaan tod saray inmuunan atateng mo, a singa natan.+
19 “No bilang ta lingwanan moy Jehova a Dios mo tan ontumbok kad arum a dirios tan manlingkor ka tan ondakmomo kad saratan, tasian ko natan ed sikayo a seguradon naderal kayo.+
20 Singa saray nasyon a dederalen nen Jehova ed arapan yo, ontan met so pakaderal yo, lapud agkayo ondengel ed boses nen Jehova a Dios yo.+
