Esdras 1:1-11
1 Diad unonan taon nen Arin Ciro+ na Persia, pian nasumpal so salita nen Jehova ya impaibaga tod si Jeremias,+ pinakiwas nen Jehova so puso* nen Arin Ciro na Persia a manggawa na proklamasyon ed interon panarian to, ya impaisulat to met,+ a mangibabagan:
2 “Oniay inkuan nen Arin Ciro na Persia, ‘Si Jehova a Dios na tawen et inter tod siak so amin a panarian na dalin,+ tan ingganggan to ak a mangipaalagey na abung to ed Jerusalem,+ diad Juda.
3 Balang sakey ed sikayo a kabiangan na totoo to, niwala komon ed sikato so Dios, tan sikatoy naabuloyan ya onlad Jerusalem, diad Juda, tan ipaalagey to lamet so abung nen Jehova a Dios na Israel—sikato so tuan Dios—a say abung to et walad Jerusalem.*
4 Siopaman a miaayam bilang dayo,+ inerman so kawalaan to, et tulongan komon na saray kakaabay to,* ya ikdan da na saray pilak tan balitok, produkto tan ayayep, pati say boluntaryon apay parad abung na tuan Dios+ a walad Jerusalem.’”
5 Diad saman, saray lider na saray pamilya na kaamaan ed Juda tan Benjamin tan saray saserdote tan saray Levita—balang sakey a say puso to et pinakiwas na tuan Dios—et namparaan ya onla tan ipaalagey lamet so abung nen Jehova a walad Jerusalem.
6 Amin a kakaabay da et tinmulong ed sikara, ya inikdan da ra* na saray kagawaan a pilak tan balitok, produkto, ayayep, tan saray mablin bengatla, likud nid amin a boluntaryon apay.
7 Impaway met nen Arin Ciro iray kagawaan ed abung nen Jehova ya inala nen Nabucodonosor ed Jerusalem tan inyan tod abung na dios to.+
8 Impaway iratan nen Arin Ciro na Persia diad panangasikaso nen Mitredat a tresurero tan binilang to iratan pian iter ed kinen Sesbazar*+ a pangulo na Juda.
9 Niraya so bilang da: 30 singa baskit a pananginan a gawad balitok, 1,000 singa baskit a pananginan a gawad pilak, 29 ya arum nin pananginan,
10 30 angkekelag a balitok a yaong, 410 angkekelag a pilak a yaong, tan 1,000 arum nin kagawaan.
11 Amin a kagawaan a balitok tan pilak et 5,400. Amin iratan et inawit nen Sesbazar sanen inawit tod Jerusalem iramay totoon nibantak+ ed Babilonia.
Paimanod leksab
^ Literal, “espiritu.”
^ Odino posiblin, “samay walad Jerusalem.”
^ Literal, “saray lalaki ed pasen to.”
^ Literal, “a pinabiskeg day lima ra ed panamegley.”
