Esdras 10:1-44
10 Legan a manpipikasi+ tan ipapatua nen Esdras iray kasalanan da, a manak-akis tan akatikleb diad arapan na abung na tuan Dios, nantitipon ed arapan to so baleg a grupo na lalaki, bibii, tan ugugaw ed Israel, ta manak-akis a maong iray totoo.
2 Diad saman, si Secanias ya anak nen Jehiel+ a nanlapud saray ananak nen Elam+ et inkuan tod si Esdras: “Agtayo nanmatoor ed Dios tayo diad impangasawa tayo* na dayon bibii manlapud saray totood kaliberliber a dalin.+ Anggaman ontan, wala ni ilalo na Israel.
3 Natan et misipanan tayo ed Dios+ tayo a pataynanen tayo ray amin a kaasawaan a bibii tan saray inyanak da, unong ed bilin nen Jehova tan saramay mangigagalang ed* ganggan na Dios tayo.+ Onkiwas tayo komon unong ed Ganggan.
4 Alagey ka, ta responsabilidad mo iya, tan wala kamid sika. Manpabiskeg tan kiwas ka.”
5 Diad saman et inmalagey si Esdras tan impansamba to ray papangulo na saray saserdote, saray Levita, tan say interon Israel a gawaen da so unong ed samay imbaga.+ Kanian sikaray nansamba.
6 Et inmalis si Esdras ed abung na tuan Dios tan linmad kuarto* nen Jehohanan ya anak nen Eliasib. Anggano linma diman, sikatoy ag-angan tan ag-inminum na danum, ta paneermenan toy ag-inkamatoor na saray totoon nibantak.+
7 Insan impakabat dad interon Juda tan Jerusalem ya amin iramay datin nibantak et mantitipon diad Jerusalem;
8 tan unong ed simbawa na saray prinsipe tan saray mamatatken, siopaman ya ag-onla diad loob na taloy agew et alaen* so amin a kayarian to, tan sikatoy ekalen ed kongregasyon na saray totoon nibantak.+
9 Kanian amin a lalaki ed Juda tan Benjamin et nantitipon ed Jerusalem diad loob na taloy agew, diad koma-20 agew na komasiam a bulan. Amin a totoo et akayurong diad sular na abung na tuan Dios, a manggiwgiw ira lapud saya tan lapud maksil so uran.
10 Et inmalagey si Esdras a saserdote tan inkuan tod sikara: “Agkayo nanmatoor diad impangasawa yo na dayon bibii,+ kanian inaruman yoy kasalanan na Israel.
11 Et natan, ipatua yoy kasalanan yo ed si Jehova a Dios na saray inmuunan atateng yo tan gawa yoy linawa to. Ibiig yoy inkasikayo ed saray totood kaliberliber a dalin tan ed sarayan kaasawaan yo a dayon bibii.”+
12 Diad saman et inmebat so interon kongregasyon diad maksil a boses: “Nepeg min gawaen so amin ya imbagam.
13 Balet ta dakdakel iray totoo, tan panaoy mamauran. Agnayari manalagey diad paway, tan sayan bengatla et agnasumpal ed sakey odino duaran agew labat, ta pinasyay impanrebelde mi ed saya.
14 Kanian abuloyan mo komon ya irepresenta na saray prinsipe mi so interon kongregasyon;+ tan diad niganan panaon, amin iramay walad syudad mi ya angasawa na dayon bibii et onla ra dia, a kaiba iray mamatatken tan saray ukom ed kada syudad, anggad napakepa mi mandarlang a sanok ed sikami na Dios tayo nisengeg ed sayan bengatla.”
15 Balet, si Jonatan ya anak nen Asael tan si Jazeias ya anak nen Tikva et kinmontra ed saya, tan saray Levita a di Mesulam tan Sabetai+ et sinmuporta ed sikara.
16 Ingen ta ginawa na saramay datin nibantak so apampaknaan; tan si Esdras a saserdote tan saray lider na saray pamilya na kaamaan da, salanti, amin a tinuro unong ed kangaranan da, et binmiig iran nantitipon diad unonan agew na komasamplon bulan pian usisaen iyan bengatla;
17 tan diad unonan agew na unonan bulan et asumpal dan inasikaso so nipaakar ed amin a lalaki ya angasawa na dayon bibii.
18 Tan naamtaan ya arum ed saray ananak na saray saserdote et angasawa na dayon bibii:+ diad saray ananak nen Jesua+ ya anak nen Jehozadak tan saray agagi to, si Maasias, Eliezer, Jarib, tan Gedalias.
19 Balet insipan da* a pataynanen da ray kaasawaan dan bibii, tan lapud nankasalanan ira, mangiyapay ira na kalakian a karnero a manlapud pulok parad kasalanan da.+
20 Diad saray ananak nen Imer,+ si Hanani tan Zebadias;
21 tan diad saray ananak nen Harim,+ si Maasias, Elias, Semaias, Jehiel, tan Uzias;
22 tan diad saray ananak nen Pasur,+ si Elioenai, Maasias, Ismael, Netanel, Jozabad, tan Eleasa.
23 Tan diad saray Levita, si Jozabad, Simei, Kelaias (salanti, Kelita), Petahias, Juda, tan Eliezer;
24 tan diad saray managkansion, si Eliasib; tan diad saray bantay na puerta, si Salum, Telem, tan Uri.
25 Tan diad Israel, diad saray ananak nen Paros,+ si Ramias, Izias, Malkias, Mijamin, Eleazar, Malkias, tan Benaias;
26 tan diad saray ananak nen Elam,+ si Matanias, Zacarias, Jehiel,+ Abdi, Jeremot, tan Elias;
27 tan diad saray ananak nen Zatu,+ si Elioenai, Eliasib, Matanias, Jeremot, Zabad, tan Aziza;
28 tan diad saray ananak nen Bebai,+ si Jehohanan, Hananias, Zabai, tan Atlai;
29 tan diad saray ananak nen Bani, si Mesulam, Maluc, Adaias, Jasub, Seal, tan Jeremot;
30 tan diad saray ananak nen Pahat-moab,+ si Adna, Kelal, Benaias, Maasias, Matanias, Bezalel, Binui, tan Manases;
31 tan diad saray ananak nen Harim,+ si Eliezer, Isiya, Malkias,+ Semaias, Simeon,
32 Benjamin, Maluc, tan Semarias;
33 diad saray ananak nen Hasum,+ si Matenai, Matatah, Zabad, Elifelet, Jeremai, Manases, tan Simei;
34 diad saray ananak nen Bani, si Maadai, Amram, Uel,
35 Benaias, Bedaias, Keluhi,
36 Vanias, Meremot, Eliasib,
37 Matanias, Matenai, tan Jaasu;
38 tan diad saray ananak nen Binui, si Simei,
39 Selemias, Natan, Adaias,
40 Macnadebai, Sasai, Sarai,
41 Azarel, Selemias, Semarias,
42 Salum, Amarias, tan Jose;
43 tan diad saray lalaki ed Nebo, si Jeiel, Matitias, Zabad, Zebina, Jadai, Joel, tan Benaias.
44 Amin iraya et angasawa na dayon bibii,+ tan pinataynan day kaasawaan da kaiba iray ananak da.+
Paimanod leksab
^ Odino “diad impangawit tayod kaabungan tayo.”
^ Literal, “manggiwgiw ed.”
^ Odino “kuarton pananganan.”
^ Odino “isebel.”
^ Literal, “inter da iray lima ra.”
