Esdras 3:1-13
3 Kasabi na komapiton bulan,+ sanen saray Israelita* et wala la rad syudad da, nantitipon ira a walaay pankakasakey diad Jerusalem.
2 Si Jesua+ ya anak nen Jehozadak tan saray kapara ton saserdote tan si Zerubabel+ ya anak nen Sealtiel+ tan saray agagi to et kinmiwas tan impaalagey da so altar na Dios na Israel, pian makapangiyapay ira ditan na saray bagat a popoolan, unong ya akasulat ed Ganggan nen Moises+ a too na tuan Dios.
3 Kanian impaalagey day altar diad datin kawalaan to, anggano natatakot irad saray totood kaliberliber a dalin,+ tan ginapoan day mangiyapay ed si Jehova na saray bagat a popoolan ditan, saray bagat a popoolan diad kabuasan tan labi.+
4 Insan da sinelebraan so Piesta na Saray Alolong* unong ya akasulat,+ tan inagew-agew iran angiyapay na niganan bilang na saray bagat a popoolan unong a kakaukolanen ed kada agew.+
5 Kayari na satan et angiyapay ira na saray regular ya apay a popoolan+ tan saray iyaapay legan na balon bulan+ tan saramay iyaapay legan na amin a sagradon panaon na piesta+ nen Jehova, pati saramay nanlapud siopaman a mabulos ya angiter na boluntaryon apay+ parad si Jehova.
6 Manlapud samay unonan agew na komapiton bulan+ et ginapoan day mangiyapay ed si Jehova na saray bagat a popoolan, anggaman agni niletneg so pundasyon na templo nen Jehova.
7 Angiter ira na kuarta ed saray managtabas na bato+ tan ed saray marunong a komikimey,+ pati naakan tan iinumen tan larak ed saray taga Sidon tan Tiro ta aawiten da ray troso na sedro a manlalapud Lebanon paonlad Joppe+ ya ipapadalan dad dayat, diad impangiyabuloy nen Arin Ciro na Persia.+
8 Diad komaduan taon na insabi rad abung na tuan Dios ed Jerusalem, diad komaduan bulan, si Zerubabel ya anak nen Sealtiel, si Jesua ya anak nen Jehozadak tan saray arum nin agagi ra, saray saserdote tan saray Levita, tan amin iramay pinmawil ed Jerusalem manlapud inkibantak da+ et ginapoan day kimey; saray Levita a mantaon na 20 a patagey et tinuro ra bilang manangasikaso ed kimey diad abung nen Jehova.
9 Kanian si Jesua, saray ananak tan agagi ton lalaki, tan si Kadmiel tan saray ananak ton lalaki, saray ananak na Juda, et naniiba pian mangidaulo ed saramay mankikimey ed abung na tuan Dios, ontan met iray kailalakan nen Henadad,+ saray ananak dan lalaki tan saray agagi ra a Levita.
10 Sanen inletneg na saray managpaalagey so pundasyon na templo nen Jehova,+ saray saserdote ya akakawes na parad templo tan de-awit na trumpeta,+ tan saray Levita ya ananak nen Asaf a de-awit na saray piangpiang, et inmalagey pian idayew si Jehova unong ed imbilin nen Arin David na Israel.+
11 Tan ginapoan day mangansion na sublayan+ diad panangirayew tan pisasalamat ed si Jehova, “ta sikatoy maomaong; say matoor a panangaro to ed Israel et mansiansia ya anggad angga.”+ Tan amin a totoo et inmeyag a maksil diad panangirayew ed si Jehova lapud niletneg la so pundasyon na abung nen Jehova.
12 Dakel ed saray saserdote, Levita, tan lider na saray pamilya na kaamaan—saray mamasiken ya akanengneng ed samay datin abung+—et nanakis a maksil sanen anengneng day pundasyon na sayan abung a niletneg, legan a makmaksil ya oneeyag ed liket so arum.+
13 Kanian agnibiig na totoo no dinay tanol na panliliket tan tanol na akis, ta oneeyag a makmaksil iray totoo kanian sankarengel itan anggan diad arawi.
