Esdras 4:1-24
4 Sanen nadngelan na saray kalaban na Juda tan Benjamin+ ya ipapaalagey na saramay pinmawil manlapud inkibantak da+ so templo nen Jehova a Dios na Israel,
2 inasinggeran dan tampol si Zerubabel tan saray lider na saray pamilya na kaamaan tan inkuan da: “Ibaan mi kayon mangipaalagey; ta mandadayew* kami met ed Dios yo+ tan manbabagat kamid sikato manlapu lad saray agew nen Arin Esar-hadon+ na Asirya, ya angawit ed sikami dia.”+
3 Balet inkuan ed sikara nen Zerubabel, Jesua, tan arum ed saray lider na saray pamilya na kaamaan ed Israel: “Anggapoy pibabali yo ed pangipapaalagey mi ed abung na Dios mi,+ ta sikami labat so mangipaalagey ed satan parad si Jehova a Dios na Israel, unong ya ingganggan ed sikami nen Arin Ciro na Persia.”+
4 Diad saman, saray totood kaliberliber a dalin et didismayaen day* totoo ed Juda tan papakapuyen day liknaan dan mangipaalagey.+
5 Angupa ra na saray mananimbawa a kontrad sikara pian naamper iray plano ra,+ manlapud amin ya agew nen Arin Ciro na Persia ya anggad uley nen Arin Dario+ na Persia.
6 Diad kagapo na uley nen Ahasuero, nanggawa ray sulat a mangaakusa ed saray manaayam ed Juda tan Jerusalem.
7 Tan diad saray agew nen Arin Artaxerxes na Persia, sikara di Bislam, Mitredat, Tabeel, tan arum nin kakaiba to et nansulat ed si Artaxerxes ya ari; impatalos da itan ed lenguahen Aramaiko,+ tan insulat da ed Aramaiko.*
8 * Si Rehum a manunan opisyal na gobierno tan si Simsai ya eskriba et nansulat ed si Arin Artaxerxes sumpad Jerusalem, a mangibabagan:
9 (Nanlapu iya ed si Rehum a manunan opisyal na gobierno tan si Simsai ya eskriba tan saray arum nin kakaiba ra, saray ukom tan saray kasandin gobernador, saray sekretaryo, saray totood Erec,+ saray taga Babilonia, saray manaayam ed Susa,+ salanti, saray Elamita,+
10 tan arum ed saray nasyon ya imbantak tan impanayam na makapanyari tan kagalgalang ya Asenapar* diad saray syudad na Samaria,+ tan saray arum ni diad Nibaliw na Ilog,* tan natan
11 nia so kopya na sulat ya impawit da.)
“Parad si Arin Artaxerxes manlapud saray lingkor mo, saray lalaki ed rehyon a walad Nibaliw na Ilog: Et natan
12 naamtaan komon na ari a saray Judion linma dia a nanlapu ditan et sinmabi lad Jerusalem. Ipapaalagey da lamet so rebelyoso tan mauges a syudad, tan susumpalen da ray padir+ tan aapigeren da ray pundasyon.
13 Natan et naamtaan komon na ari a no nipaalagey lamet iyan syudad tan nasumpal iray padir to, agla ra manbayar na personal a buis da, buis ed saray produkto ra,+ tan buis ed idadalan da ed saray karsada, tan pakabawasan itan ed kayamanan na saray arari.
14 Lapud mangaawat kami na sueldo manlapud palasyo* tan agmanepeg a nanengneng min naandian so ari, nansulat kami pian ipaamta yad ari,
15 pian nasuri imay libro na saray agawad inmuunan atateng mo.+ Nanengneng mod satan a libro tan naamtaan mo a sayan syudad et rebelyoso, a saya et pankaugsan na saray arari tan saray probinsya,* tan nabasa ditan a wala ray mangilalagyat na panagrebelde manlapu la nensaman. Saya so rason no akin ya aderal iyan syudad.+
16 Ipapaamta mid ari a no nipaalagey lamet iyan syudad tan nasumpal iray padir to, naandian ka na pakauley* diad rehyon a walad Nibaliw na Ilog.”+
17 Et angipawit na mensahe so ari ed si Rehum a manunan opisyal na gobierno tan si Simsai ya eskriba tan saray arum nin kakaiba ra a manaayam ed Samaria tan saray arum ni diad rehyon a walad Nibaliw na Ilog:
“Awat yoy panangumustak! Natan,
18 say sulat ya impawit yod sikami et malinlinew ya imbasa* ed siak.
19 Diad ganggan ko et walay nanimbestiga, tan naamtaan a manlapu la nensaman, satan a syudad et onlalaban ed saray arari, tan wala ray rebelyon tan isusumpa ditan.+
20 Wala ray makapanyarin arari ed Jerusalem a nanuley ed interon rehyon a walad Nibaliw na Ilog, tan sikaray pambabayaran na personal a buis, buis ed saray produkto, tan buis ed idadalan ed saray karsada.
21 Natan et mangiter kayo na ganggan ya ontunda lan mankimey irayan lalaki, pian agnipaalagey lamet so syudad anggad anggapoy ganggan ko.
22 Seguroen yon onkiwas kayo ed saya, pian agla lamet naandian so ari.”+
23 Et kayarin nibasa so kopya na sulat nen Arin Artaxerxes ed arapan nen Rehum tan si Simsai ya eskriba tan saray kakaiba ra, nila dan tampol iray Judio diad Jerusalem tan puersaan da ran pinatunda.
24 Diad saman et tinmunda so kimey ed abung na Dios, diad Jerusalem; tan ag-itan intuloy anggad komaduan taon na uley nen Arin Dario na Persia.+
Paimanod leksab
^ Literal, “manaanap.”
^ Literal, “papakapuyen da ray lima na.”
^ Odino posiblin, “insulat itan ed Aramaiko insan impatalos.”
^ Say Esd 4:8 anggad 6:18 et orihinal a nisulat ed Aramaiko.
^ Salanti, si Asurbanipal.
^ Odino “diad Trans-Eufrates.”
^ Literal, “mangakan kami na asin na palasyo.”
^ Odino “saray nasasakopan a distrito.”
^ Literal, “betang.”
^ Odino posiblin, “et impatalos tan imbasa.”
