Esdras 5:1-17
5 Diad saman, saray propetan si Aggeo+ tan si Zacarias+ ya apo nen Ido+ et nampropesiya ed saray Judion walad Juda tan Jerusalem, diad ngaran na Dios na Israel a mangiwawanwan ed sikara.
2 Et ginapoan ya ipaalagey lamet nen Zerubabel+ ya anak nen Sealtiel tan si Jesua+ ya anak nen Jehozadak so abung na Dios+ a walad Jerusalem; tan saray propeta na Dios et kaiba ra tan onsusuporta ed sikara.+
3 Diad satan, linmad sikara si Tatenai a gobernador diad rehyon a walad Nibaliw na Ilog* tan si Setar-bozenai tan saray kakaiba ra, tan intepet da: “Siopay angiganggan ed sikayon ipaalagey iyan abung tan sumpalen iyan istruktura?”*
4 Insan intepet da ni: “Antoy kangaranan na saray lalakin mangipapaalagey ed saya?”
5 Balet babantayan na Dios iray* mamatatken na saray Judio,+ kanian agda ra apatunda anggad agda iya nibalita ed si Dario tan naawat so sulat manlapud ari.
6 Nia so kopya na sulat ya impawit ed kinen Arin Dario a nanlapud si Tatenai a gobernador ed rehyon a walad Nibaliw na Ilog tan si Setar-bozenai tan saray kakaiba to, saray kasandin gobernador diad rehyon a walad Nibaliw na Ilog;
7 et impasabi ray balita ed sikato, tan oniay insulat da:
“Parad si Arin Dario:
“Sigpot a kareenan!
8 Naamtaan komon na ari a linma kamid probinsya* na Juda diad abung na makapanyarin Dios, tan ipapaalagey da iya a manguusar iray angkakabaleg a bato, tan mangiiyan ira na saray kiew ed saray padir. Sayan kimey et panseseetan a gawaen na totoo tan onaaligwas itan lapud saray sagpot da.
9 Insan tinepetan mi ray mamatatken da: ‘Siopay angiganggan ed sikayon ipaalagey iyan abung tan sumpalen iyan istruktura?’*+
10 Tinepet mi met ed sikara so kangaranan da pian nipaamta mid sika, diad ontan et nisulat mi ray kangaranan na lalaki a mangidadaulo.
11 “Oniay ebat dad sikami: ‘Lingkor kami na Dios na tawen tan dalin, tan ipapaalagey mi lamet imay abung a nipaalagey dakdakel lan taon so linmabas, samay impaalagey tan sinumpal na sakey a makapanyarin ari na Israel.+
12 Balet, lapud pinasanok na saray kaamaan mi so Dios na tawen,+ inyawat to rad lima nen Arin Nabucodonosor+ na Babilonia, say Caldeo ya angigeba ed sayan abung+ tan imbantak tod Babilonia iray totoo.+
13 Ingen, diad unonan taon nen Arin Ciro na Babilonia, ingganggan to ya ipaalagey lamet iyan abung na Dios.+
14 Ontan met, impaway nen Arin Ciro ed templo na Babilonia iray balitok tan pilak a pananginan ed abung na Dios ya inala nen Nabucodonosor diad templo ed Jerusalem tan inawit tod templo na Babilonia.+ Inter iratan ed si Sesbazar,*+ samay impasen nen Ciro a gobernador.+
15 Inkuan nen Ciro ed sikato: “Alam irayan pananginan. La ka, iyan mo iraya ed templo a walad Jerusalem, tan nepeg ya ipaalagey lamet so abung na Dios diad datin kawalaan to.”+
16 Et linmay Sesbazar, tan inletneg to ray pundasyon na abung na Dios+ ed Jerusalem; tan ipapaalagey itan manlapu lad saman anggad natan, balet agni asumpal.’+
17 “Natan, no onabobon so ari, wala komon so nagawan imbestigasyon ed pasen a pangiinay kayamanan na ari ditan ed Babilonia, pian naamtaan no talagan ingganggan nen Arin Ciro ya ipaalagey lamet so abung na Dios ed Jerusalem;+ tan ipasabi komon ed sikami na ari so desisyon to nipaakar ed saya.”
Paimanod leksab
^ Odino “diad Trans-Eufrates.”
^ Odino “irayan biga.”
^ Literal, “say mata na Dios da et walad.”
^ Odino “nasasakopan a distrito.”
^ Odino “irayan biga.”
