Esdras 6:1-22
6 Diad saman et angiganggan si Arin Dario, tan nanimbestiga ra diad kawalaan na daan iran dokumento,* a dia iiyan iray kayamanan ed Babilonia.
2 Tan walay aromog a lukot diad panag-amotan ed Ecbatana, diad probinsya* na Media, tan oniay mensahen akasulat ditan:
3 “Diad unonan taon nen Arin Ciro, oniay ingganggan to nipaakar ed abung na Dios ed Jerusalem:+ ‘Nepeg ya ipaalagey lamet so abung a pangiyapayan da na saray bagat, tan iletneg iray pundasyon to; say katagey to et 60 kasiko,* say kalapar to et 60 kasiko,+
4 a walaay taloran dasig na angkakabaleg a bato ya impantatapewan tan sakey dasig na saray kiew;+ tan say gastosen et nepeg ya alaen ed abung na ari.+
5 Ontan met, saray balitok tan pilak a pananginan ed abung na Dios ya inala nen Nabucodonosor ed templo a walad Jerusalem tan inawit tod Babilonia+ et nepeg ya ipawil, pian niyakar iratan ed pasen da diad templo ed Jerusalem tan niiyan ed abung na Dios.’+
6 “Natan sikayo, Tatenai a gobernador na rehyon a walad Nibaliw na Ilog,* Setar-bozenai, tan saray kakaiba yo, saray kasandin gobernador diad rehyon a walad Nibaliw na Ilog+—arawi kayo ditan.
7 Agyo pibabalian so kimey ed abung na Dios. Ipaalagey lamet na gobernador na saray Judio tan saray mamatatken na saray Judio so abung na Dios diad datin kawalaan to.
8 Ontan met, saya so ganggan ko a gawaen yo parad sarayan mamatatken na saray Judio diad pangipaalagey lamet ed abung na Dios: Saray gastosen a manlapud pananginay kayamanan na ari,+ samay buis ya akolekta diad rehyon a walad Nibaliw na Ilog, et iter yon tampol ed sarayan lalaki tan nepeg a tuloytuloy tan regular itan.+
9 Tan antokaman so nakaukolan—saray kilaw a kalakian a baka+ pati saray kalakian a karnero+ tan kordero+ parad apay a popoolan ya iyapay ed Dios na tawen, say trigo,+ asin,+ alak,+ tan larak,+ unong ya ibabaga na saray saserdoten walad Jerusalem—et nepeg a seguroen a tuloytuloy a niiter ed sikara diad kada agew,
10 pian mantultuloy iran makapangiyapay na saray apay a makapaliket ed Dios na tawen tan ipikasi day pankaabigan na ari tan saray anak ton lalaki.+
11 Ingganggan ko met a no walay siopaman a manumlang ed sayan ganggan, sakey a biga so ekalen ed abung to tan sikatoy ibitay ditan,* tan say abung to et gawaen a kasilyas na publiko* lapud insumlang to.
12 Tan komon ta samay Dios, a pinansiansia to ditan so ngaran to,+ et itumba toy siopaman ya ari tan totoo a mangitagey na lima to pian sumlangen iyan ganggan tan deralen so abung na Dios a walad Jerusalem. Siak, si Dario, so mangigaganggan ed saya. Nepeg a sumpalen iyan tampol.”
13 Insan si Tatenai a gobernador na rehyon a walad Nibaliw na Ilog, si Setar-bozenai,+ tan saray kakaiba ra et ginawa ran tampol so amin ya ingganggan nen Arin Dario.
14 Tan saray mamatatken na saray Judio et intultuloy day angipaalagey tan inmaligwas itan,+ ya apakiwas ira ed saray propesiya nen Aggeo+ a propeta tan si Zacarias+ ya apo nen Ido; asumpal dan impaalagey itan diad ganggan na Dios na Israel+ tan diad ganggan nen Ciro+ tan Dario+ tan Arin Artaxerxes na Persia.+
15 Asumpal day abung diad komatlon agew na bulan na Adar,* diad komanem a taon na uley nen Arin Dario.
16 Insan saray Israelita, saray saserdote, saray Levita,+ tan say arum nin datin nibantak et malikeliket dan sinelebraan so inagurasyon* na sayan abung na Dios.
17 Tan angiyapay ira na 100 a kalakian a baka, 200 a kalakian a karnero, 400 a kordero parad inagurasyon na sayan abung na Dios, tan 12 kalakian a kanding bilang apay parad kasalanan na interon Israel, unong ed bilang na tribu na Israel.+
18 Tan tinuro da ray saserdote ed grupo ra tan saray Levita ed grupo ra parad panaglingkor ed Dios diad Jerusalem,+ unong ed samay akasulat ed libro nen Moises.+
19 Tan saramay datin nibantak et sinelebraan day Paskua diad koma-14 ya agew na unonan bulan.+
20 Amin a saserdote tan Levita et nilinisan day inkasikara,+ kanian amin ira et malinis; amakger iray ayep ya ibabagat ed Paskua parad amin a datin nibantak, parad saray kapara ran saserdote, tan parad inkasikara.
21 Insan angan iramay Israelitan pinmawil manlapud inkibantak, pati say balang sakey ya akilad sikara tan samay imbiig toy inkasikato ed inkarutak na saray nasyon ed dalin pian dayewen* si Jehova a Dios na Israel.+
22 Malikeliket da met a sinelebraan so Piesta na Andi-lebaduran Tinapay+ diad loob na pitoy agew, ta pinaliket ira nen Jehova tan pinakiwas toy puso na ari na Asirya pian paboran ira,+ kanian sinuportaan to ra* ed kimey diad abung na tuan Dios, say Dios na Israel.
Paimanod leksab
^ Literal, “abung na saray rekord.”
^ Odino “nasasakopan a distrito.”
^ Manga 26.7 metro (87.6 piye). Nengnengen so Apendise B14.
^ Odino “na Trans-Eufrates.”
^ Odino posiblin, “panagtambakay basura; bunton na saray tai na ayep.”
^ Odino “tan sikatoy ipasak ditan.”
^ Nengnengen so Apendise B15.
^ Odino “impangidedika.”
^ Literal, “anapen.”
^ Literal, “pinabiskeg toy lima ra.”
