Esdras 8:1-36
8 Saraya so lider na saray pamilya na kaamaan da tan say listaan na kapolian na saramay akilad siak manlapud Babilonia legan na uley nen Arin Artaxerxes:+
2 diad saray ananak nen Finehas,+ si Gersom; diad saray ananak nen Itamar,+ si Daniel; diad saray ananak nen David, si Hatus;
3 diad saray ananak nen Secanias, salanti, diad saray ananak nen Paros, si Zacarias, tan kaiba to so 150 lalaki a walad listaan;
4 diad saray ananak nen Pahat-moab,+ si Elieho-enai ya anak nen Zerahias, tan kaiba to so 200 a lalaki;
5 diad saray ananak nen Zatu,+ si Secanias ya anak nen Jahaziel, tan kaiba to so 300 a lalaki;
6 diad saray ananak nen Adin,+ si Ebed ya anak nen Jonatan tan kaiba to so 50 lalaki;
7 diad saray ananak nen Elam,+ si Jesaias ya anak nen Atalia, tan kaiba to so 70 lalaki;
8 diad saray ananak nen Sefatias,+ si Zebadias ya anak nen Miguel, tan kaiba to so 80 lalaki;
9 diad saray ananak nen Joab, si Obadias ya anak nen Jehiel, tan kaiba to so 218 lalaki;
10 diad saray ananak nen Bani, si Selomit ya anak nen Josifias, tan kaiba to so 160 lalaki;
11 diad saray ananak nen Bebai,+ si Zacarias ya anak nen Bebai, tan kaiba to so 28 lalaki;
12 diad saray ananak nen Azgad,+ si Johanan ya anak nen Hacatan, tan kaiba to so 110 lalaki;
13 diad saray ananak nen Adonikam,+ saramay naunor, et niay kangaranan da: si Elifelet, Jeiel, tan Semaias, tan kaiba ra so 60 lalaki;
14 tan diad saray ananak nen Bigvai,+ si Utai tan Zabbud, tan kaiba ra so 70 lalaki.
15 Et tinipon ko ra diad gilig na ilog ya onaagus ed Ahava,+ tan taloy agew kamin nankampo diman. Balet sanen inusisak iray totoo tan saray saserdote, anggapoy aromog kon Levita.
16 Kanian impatawag ko ray manunan lalaki a di Eliezer, Ariel, Semaias, Elnatan, Jarib, Elnatan, Natan, Zacarias, tan Mesulam, tan saray managbangat a di Joiarib tan Elnatan.
17 Insan ingganggan ko ra ya onlad si Ido a pangulo diad Casifia. Impaibagak ed si Ido tan ed saray agagi to, saray lingkor ed templo* a walad Casifia, a mangiyakar irad sikami na saray manlingkor ed abung na Dios mi.
18 Lapud walad sikami so lima na Dios mi, angiyakar irad sikami na sakey a lakin makatebek manlapud saray ananak nen Mali+ ya apo nen Levi ya anak nen Israel, salanti, si Serebias,+ tan saray ananak to tan agagi to, 18 lalaki;
19 tan si Hasabias, a kaiba toy Jesaias manlapud saray Merarita,+ saray agagi to tan saray ananak da, 20 lalaki.
20 Tan 220 ed saray lingkor ed templo,* saramay inter nen David tan saray prinsipe parad panaglingkor na saray Levita, ya amin da et tinuro unong ed ngaran da.
21 Insan inyabawag ko a manayunal kami diad ilog Ahava, pian manpaabeba kami diad arapan na Dios mi, pian onkerew kami panangiwanwan to parad biahe mi, parad sikami tan parad ananak mi tan parad amin a kayarian mi.
22 Ambaing ak ya onkerew ed ari na saray sundalo tan lalakin de-kabayoan a manprotekta ed sikami ed saray kakabusol diad dalan, lapud nibaga mi lad ari: “Say lima na Dios mi et walad amin a manaanap ed sikato,+ balet say biskeg tan sanok to et sumpad amin ya ontataynan ed sikato.”+
23 Kanian nanayunal kami tan akikasi kamid Dios mi nipaakar ed saya, tan dinengel toy kerew mi.+
24 Et angibiig ak na 12 manlapud papangulo na saray saserdote, salanti, si Serebias tan Hasabias,+ kaibay 10 ed saray agagi ran lalaki.
25 Tan parad sikara et nansimbang ak na saray pilak, balitok, tan saray kagawaan, say kontribusyon parad abung na Dios mi+ ya inter na ari, saray mananimbawa to, saray prinsipe to, tan amin ya Israelita a wadman.
26 Kanian say inter kod sikara a sinimbang ko et 650 talento* a pilak, 100 a pilak a kagawaan a mankantidad na 2 talento, 100 a talenton balitok,
27 20 angkekelag a balitok a yaong a mankantidad na 1,000 darik,* tan 2 kagawaan a gawad maabig a klase na gansa, masileng ya ambalanga, a mabmablin singa balitok.
28 Insan inkuan kod sikara: “Masanto kayo ed si Jehova,+ tan masanto met iray kagawaan, tan saray pilak tan balitok et boluntaryon apay ed si Jehova a Dios na inmuunan atateng yo.
29 Bantayan yon maong iratan anggad nasimbang yo ed arapan na papangulo na saray saserdote tan Levita tan saray prinsipe na saray pamilya na kaamaan ed Israel a walad Jerusalem,+ diad saray kuarto* na abung nen Jehova.”
30 Tan inala na saray saserdote tan saray Levita iray pilak tan balitok tan saray kagawaan a sinimbang parad sikara, pian iyakar iratan ed Jerusalem diad abung na Dios mi.
31 Diad kaunoran et tinmaynan kamid ilog Ahava+ pian onlad Jerusalem diad koma-12 agew na unonan bulan,+ tan say lima na Dios mi et walad sikami, tan inliktar to kamid lima na kabusol tan ed saramay manatambang ed dalan.
32 Kanian akasabi kamid Jerusalem+ tan taloy agew kamin nansiansia diman.
33 Insan diad komapat ya agew et sinimbang mi ray pilak tan balitok tan saray kagawaan ed abung na Dios mi+ tan impalima mi iratan ed si Meremot+ ya anak nen Urias a saserdote, a kaiba toy Eleazar ya anak nen Finehas, tan kaiba da ray Levita a si Jozabad+ ya anak nen Jesua tan si Noadias ya anak nen Binui.+
34 Amin et binilang tan sinimbang, tan insulat ya amin so belat na saratan.
35 Saramay pinmawil manlapud inkibantak da et angiyapay ira ed Dios na Israel na saray bagat a popoolan, 12 kalakian a baka+ parad interon Israel, 96 a kalakian a karnero,+ 77 kalakian a kordero, tan 12 kalakian a kanding+ bilang apay parad kasalanan; amin iraya et apay a popoolan parad si Jehova.+
36 Insan inter mi ray ganggan na ari+ ed saray satrapa* na ari tan ed saray gobernador diad rehyon a walad Nibaliw na Ilog,*+ tan sinuportaan da ray totoo tan say abung na tuan Dios.+
Paimanod leksab
^ Odino “saray Netineo.” Literal, “saray inter a totoo.”
^ Odino “saray Netineo.” Literal, “saray inter a totoo.”
^ Say sakey a talento et 34.2 kilo. Nengnengen so Apendise B14.
^ Say darik et sakey a balitok a sinsilyo na saray Persiano. Nengnengen so Apendise B14.
^ Odino “saray kuarton pananganan.”
^ Sayan titulo et mankabaliksan na “managprotekta ed saray sakop,” a dia et ontutukoy ed saray gobernador na saray probinsya ed Empiryo na Persia.
^ Odino “diad Trans-Eufrates.”
