Esdras 9:1-15
9 Kayarin agawa iraya, inasinggeran ak na saray prinsipe tan inkuan da: “Saray totood Israel tan saray saserdote tan saray Levita et agda imbiig so inkasikara ed saray totood kaliberliber a dalin tan ed saray makapadimlan kagagawa na saraya,+ salanti, saray Canaanita, Heteo, Perizeo, Jebuseo, Ammonita, Moabita, Ehipsio,+ tan Amoreo.+
2 Inala ra so arum ed saray ananak a bibii na saraya pian magmaliw ya asawa ra tan asawa na ananak dan lalaki.+ Et sikara, a masanton ilalak,*+ et akiulop ed saray totood kaliberliber a dalin.+ Diad sayan ag-inkamatoor, say manunaan a mananumlang et saray prinsipe tan saray kasandin manuley.”
3 Sanen nadngel ko iya, pinilat koy kawes ko tan amagot ak na buek ko tan balbas ko, tan yinmurong ak ya ameneng.
4 Insan amin a mangigagalang ed* saray salita na Dios na Israel et nantitipon ed arapan ko lapud ag-inkamatoor na saray totoon nibantak, legan a manyudyurong ak ya ameneng anggad kasabi pangiyapay na kakanen diad labi.+
5 Tan kasabi oras na pangiyapay na kakanen diad labi,+ inmalagey ak lapud kababaingan ko, a say kawes ko et apilat, tan tinmalimukor ak tan inyunat ko ray limak ed si Jehova a Dios ko.
6 Tan inkuan ko: “O Dios ko, nababaingan ak tan agko nitangway lupak ed sika, O Dios ko, ta dinmakerakel iray lingo mi tan linmagpas lad ulo mi tan angga lad tawen iray kasalanan mi.+
7 Manlapu lad saray agew na inmuunan atateng mi ya anggad sayan agew et dakdakel lay kasalanan mi;+ tan lapud saray lingo mi, sikami, saray arari mi, tan saray saserdote mi et niyawat ed lima na saray arari na arum a dalin, pinapatey kami ed espada,+ inerel kami,+ sinamsaman kami,+ tan niiyan kamid kababaingan, a singa diad sayan agew.+
8 Balet natan, diad antikey a panaon, impatnag moy pabor mo, O Jehova a Dios mi, ya inabuloyan mon walay nakeraan ed sikami tan inikdan mo kami na maligen a pasen* diad masanton pasen mo,+ pian onliwawa ray mata mi, O Dios mi, tan onligsa kami daiset ed impakaaripen mi.
9 Ta anggano ariripen kami,+ agmo kami tinaynan ed impakaaripen mi, O Dios mi; noagta lapud matoor a panangarom ed sikami, agamoran mi so pabor na saray arari na Persia,+ pian onligsa kami lamet a mangipaalagey na abung mo, O Dios mi,+ tan naapiger mi ray geray ditan tan nawalaan kami na padir* ed Juda tan Jerusalem.
10 “Balet natan, O Dios mi, anto kasi nibaga mi kayari na saya? Ta impulisay mi ray ganggan mo,
11 ya inter mod sikami ed panamegley na saray lingkor mon propeta, a mangibabagan: ‘Say dalin a kayarianen yo et marutak a dalin lapud inkarutak na saray totood kaliberliber a dalin, lapud saray makapadimlan kagagawa ra, a pinano da itan na inkarutak da manlapud sakey a sampot anggad sananey a sampot.+
12 Kanian agyo iiter iray ananak yon bibii ed saray ananak dan lalaki, tan agyo aawaten iray ananak dan bibii parad saray ananak yon lalaki;+ tan agkayon balot manggagaway antokaman a mamawalay kareenan tan inkaaligwas da,+ pian ombiskeg kayo tan mangan kayo na maabig iran bengatla na dalin tan kayarianen yo itan ya anggad angga parad saray ananak yo.’
13 Tan diad amin a naeksperiensya mi lapud mauges a ginagawa mi tan lapud kabaleg na kasalanan mi—ta sika, O Dios mi, et agmo kami dinusa unong ed saray lingo mi,+ tan sikami ran wadia et inabuloyan mon makatakas+—
14 sumlangen mi lamet kasi iray ganggan mo tan mikasakey kami ed panamegley na panangasawa* ed saray totoon manggagawa na sarayan makapadimlan bengatla?+ Agka kasi onsanok a maong ed sikami tan sigpot mo kamin deralen, ya anggapoy nakeraan odino makaliktar?
15 O Jehova a Dios na Israel, matunong ka,+ ta sikami ran akeraan et akaliktar anggad sayan agew. Wadia kami natan ed arapan mo bilang makasalanan, anggaman imposible so onarap ed sika nisengeg ed saya.”+
Paimanod leksab
^ Literal, “bini.”
^ Literal, “manggiwgiw ed.”
^ Literal, “sakey a palpal.”
^ Odino “padir a proteksion.”
^ Odino “tan mangasawa odino miasawa kami.”
