Ester 1:1-22
1 Diad saray agew nen Ahasuero* a nanuley ed 127 probinsya*+ manlapud India anggad Etiopia,*
2 diad saramay agew sanen si Arin Ahasuero et akayurong ed trono to diad Susan*+ a panag-amotan,*
3 diad komatlon taon na uley to, sikatoy nampaponsia parad amin a prinsipe to tan saray lingkor to. Say armada na Persia+ tan Media,+ saray gagalangen a totoo, tan saray prinsipe na saray probinsya* et walad arapan to,
4 tan impanengneng tod sikara so kayamanan na maglorian panarian to tan say karlangan tan karakpan na kagalangan to diad loob na dakel ya agew, salanti, 180 agew.
5 Et sanen anampot la irayan agew, say ari et pitoy agew a nampaponsia parad amin a totoon wadman ed Susan* a panag-amotan,* atagey man odino abebay kipapasen da, diad hardin na palasyoy ari.
6 Wala ray kurtina a gawad linen, maabig a klasen abel a kapes, tan telan asul, a saraya et sininger na lubir a gawad maabig a klase na tela tan kolor-ube ya abel* ya inkawing ed pilak iran singsing, tan wala met iray lusek a marmol tan saray dukolan a balitok tan pilak diad datal a porpido,* amputin marmol, perlas, tan andeket a marmol.
7 Inserbi iray alak ed balitok iran kopa;* kada kopa et anggapoy kapara to, tan say intaryan alak na ari et dakdakel, unong ed pakasarag na ari.
8 Diad saman, say totontonen nipaakar ed panag-inum et anggapoy siopaman a nepeg a piliten,* ta inyuksoy na ari ed saray opisyal na palasyo to a gawaen na kada sakey so labay to.
9 Si Reyna Vasti+ et nampaponsia met parad saray bibii diad abung* nen Arin Ahasuero.
10 Diad komapiton agew, sanen malikeliket lay puso na ari lapud alak, imbaga tod sikara di Mehuman, Bizta, Harbona,+ Bigta, Abagta, Zetar, tan Carkas, saray pitoran opisyal ed palasyo a personal a manlilingkor ed si Arin Ahasuero,
11 ya iyakar dad sikato si Reyna Vasti ya akakorona,* pian ipanengneng so inkaganggana to ed saray totoo tan saray prinsipe, ta sikatoy maganggana.
12 Et impasabi na saray opisyal ed palasyo so ganggan na ari, balet talagan aglabay nen Reyna Vasti so onla. Lapud saya et amasnok a maong so ari, tan diad loob to et mandarlang so sanok to.
13 Kanian imbaga na ari ed saray marunong a lalakin walaay pakatalos ed onia ran agawa ed apalabas* (ta diad onian paraan nipapasabi iray pamaakaran na ari ed saramay eksperto ed ganggan tan saray kaso,
14 tan saray sankaapitan ed sikato et si Carsena, Setar, Admata, Tarsis, Meres, Marsena, tan Memucan, say pitoran prinsipe+ na Persia tan Media, a makakapiarap ed ari tan walaay atagey a posisyon ed panarian).
15 Intepet na ari: “Unong ed ganggan, antoy nepeg a gawaen ed si Reyna Vasti lapud agto inunor so ganggan nen Arin Ahasuero ya impasabi ed panamegley na saray opisyal ed palasyo?”
16 Et oniay inkuan nen Memucan diad arapan na ari tan saray prinsipe: “Aliwa labat a sumpad ari so lingon ginawa nen Reyna Vasti,+ noagta sumpad amin a prinsipe tan sumpad amin a totoo diad amin a probinsya* nen Arin Ahasuero.
17 Ta say ginawa na reyna et naamtaan na amin a kaasawaan a bibii, tan mudmoraen da ray kaasawaan da tan ibaga ran, ‘Imbaga nen Arin Ahasuero ya iyakar ed sikato si Reyna Vasti, balet agto labay so onla.’
18 Diad sayan agew, saray prinsesa na Persia tan Media a makaamtad ginawa na reyna et mitongtong ed amin a prinsipe na ari, a mansumpal iya ed pinasyan panagleglemew tan sanok.
19 No onabobon so ari, komon ta sikatoy mangiter na ganggan, tan isulat itan bilang kabiangan ed saray ganggan na Persia tan Media, ya agnayarin kanselaen,+ a si Vasti et agbalot nayarin onasingger lamet ed si Arin Ahasuero; tan say posisyon to bilang reyna et iter komon na ari ed arum a biin magmaong nen say sikato.
20 Et sano narengelan ed interon nasasakopan na ari so ganggan to, amin a kaasawaan a bibii et igalang da ray kaasawaan da, atagey man odino abebay kipapasen da.”
21 Agustoan na ari tan saray prinsipe iyan simbawa, tan ginawa na ari so imbaga nen Memucan.
22 Kanian say ari et angipawit na saray sulat ed amin a probinsya+ to,* unong ed panagsulat* na kada probinsya* tan unong ed sarilin lenguahe na kada baley, pian say kada asawan laki et mansiansian katawan* ed dilin sankaabungan to tan usaren so lenguahe na baley to.
Paimanod leksab
^ Ipapasen bilang si Xerxes I, anak nen Darius the Great (Darius Hystaspis).
^ Odino “nasasakopan a distrito.”
^ Odino “Cus.”
^ Odino “Susa.”
^ Odino “palasyo; panagsalimbengan.”
^ Odino “nasasakopan a distrito.”
^ Odino “Susa.”
^ Odino “palasyo; panagsalimbengan.”
^ Odino “kolor-ube ya abel a gawad bagoy karnero.”
^ Sakey a klase na anawet a bato, say kaslakan a kolor to et magket ya ambalanga, a wala ray batek ton amputi, tan mabmabli.
^ Odino “iran pananginan.”
^ Odino “walad panameget.”
^ Odino “palasyo.”
^ Odino “akaturbante.”
^ Odino “saray paraan.” Literal, “saray panaon.”
^ Odino “nasasakopan a distrito.”
^ Literal, “nasasakopan iran distrito na ari.”
^ Odino “estilo na panagsulat.”
^ Odino “nasasakopan a distrito.”
^ Odino “prinsipe.”
