Ester 2:1-23
2 Kayari na sarayan bengatla, sanen kinmepa lay sanok nen Arin Ahasuero,+ anonotan toy ginawa nen Vasti+ tan samay desisyon sumpad sikato.+
2 Et inkuan na saray personal a lingkor na ari: “Nepeg ya iyanapan so ari na saray kalangweran a magaganan birhen.
3 Tan say ari et manuro komon na totoo diad amin a probinsya* a walad sakop to+ pian amin a magaganan kalangweran a birhen et tiponen ed Susan* a panag-amotan,* diad abung na saray bibii. Imatalek ira komon ed si Hegai+ ya eunoko na ari tan manangasikaso ed saray bibii, tan ondalan irad proseso na pampaganggana.*
4 Tan say kalangweran a bii a talagan nagustoan na ari so magmaliw a reyna a kasalat nen Vasti.”+ Sayan suhestion et agustoan na ari, tan ontan so ginawa to.
5 Diad Susan*+ a panag-amotan* et walay lakin Judio a manngaran na Mardokeo+ ya anak nen Jair ya anak nen Simei ya anak nen Kis a Benjaminita,+
6 ya inala manlapud Jerusalem a kabiangan na saray totoon nibantak a kaiba nen Arin Jeconias*+ na Juda, ya inerel nen Arin Nabucodonosor na Babilonia.
7 Sikato so mangaasikaso ed si Hadasa,* salanti, si Ester ya anak na agi nen ama to,+ ta anggapo lay ama tan ina to. Sayan kalangweran a bii et balibali laman to tan maganggana, tan sanen inatey so ama tan ina to, sikatoy impasen nen Mardokeo a singa anak to.
8 Et sanen inyabawag so salita tan ganggan na ari tan sanen inyakar ed Susan* a panag-amotan* so dakel a kalangweran a bibii diad panangasikaso nen Hegai,+ si Ester et inawit met ed abung* na ari diad kinen Hegai a manangasikaso ed saray bibii.
9 Sayan kalangweran a bii et labalabay nen Hegai tan nala toy pabor* to, kanian inyuksoy ton tampol a sikatoy ondalan ed proseso na pampaganggana*+ pati say dieta to, tan inikdan to met na pitoran apilin lingkor a bibii manlapud abung na ari. Si Ester tan saray bibiin lingkor to et inyalis met nen Hegai ed sankaabigan a pasen diad abung na saray bibii.
10 Anggapoy imbaga nen Ester nipaakar ed baley to+ odino saray kakanayon to, ta binilin nen Mardokeo+ ya agto ipapaamtad siopaman.+
11 Agew-agew a manaakar si Mardokeo diad arap na sular na abung na saray bibii pian amtaen so kipapasen nen Ester tan no antoy nagagawad sikato.
12 Kada kalangweran a bii et walay turno ton onla ed si Arin Ahasuero kayarin nakompleto so 12 bulan a proseso parad saray bibii, ta oniay paraan pian nasumpal so proseso na pampaganggana ed sikara*—anem bulan a puyokan ira na larak a mira+ tan anem bulan ed larak a balsamo+ tan saray nanduruman puyok parad proseso na pampaganggana.*
13 Insan akaparaan la ya onlad ari so sakey a kalangweran a bii, tan antokaman a kerewen to et iter ed sikato sano onlad abung na ari manlapud abung na saray bibii.
14 Sikatoy onla no labi, insan ompawil ed kabuasan diad komaduan abung na saray bibii, diad panangasikaso nen Saasgaz ya eunoko na ari,+ say manangasikaso ed saray onkokomaduan asawan bibii. Sikatoy agmakaonla lamet ed ari likud labat no sikatoy talagan agustoan na ari tan ipatawag to.+
15 Tan sanen si Ester ya anak nen Abihail a pangamaen nen Mardokeo, ya angipasen ed sikato a singa dilin anak to,+ et turno to lay onla ed ari, anggapoy arum a kinerew to likud labat ed samay imbaga nen Hegai ya eunoko na ari, say manangasikaso ed saray bibii. (Diad gapo ni labat et nanaala la nen Ester so pabor na amin a makakanengneng ed sikato.)
16 Si Ester et inawit ed si Arin Ahasuero dimad abung na ari diad komasamplon bulan, salanti, bulan na Tebet,* diad komapiton taon+ na uley to.
17 Et agustoan na ari si Ester nen say arum ni ran bibii, tan nala toy pabor tan panangabobon* to nen say arum ni ran birhen. Kanian inyan na ari so korona* ed ulo to tan ginawa ton reyna+ a kasalat nen Vasti.+
18 Tan angiparaan so ari na baleg a ponsia parad amin a prinsipe to tan saray lingkor to, say ponsia nen Ester. Insan angiproklama na amnestiya ed saray probinsya,* tan angiter na dakel a regalo unong ed pakasarag na ari.
19 Sanen saray birhen*+ et tinipon ed komaduan pankanawnawa, si Mardokeo et akayurong diad puerta na palasyoy ari.
20 Anggapoy imbaga nen Ester nipaakar ed kakanayon to tan say baley to,+ unong ya imbilin ed sikato nen Mardokeo; intultuloy ya inunor nen Ester so imbaga nen Mardokeo, a singa nen wala nid pudir to.+
21 Diad saraman ya agew legan ya akayurong si Mardokeo ed puerta na palasyoy ari, say duaran opisyal na ari tan bantay na puerta a si Bigtan tan Teres et sinmanok tan implano ran pateyen* si Arin Ahasuero.
22 Balet naamtaan iya nen Mardokeo, tan imbaga ton tampol ed si Reyna Ester. Insan akitongtong si Ester ed ari diad ngaran nen Mardokeo.*
23 Kanian inimbestigaan iya tan apaneknekan a tua, tan parehon imbitay ed poste so duaran lalaki; tan diad arapan na ari et insulat iya ed libro na saray agawa ed saraman ya panaon.+
Paimanod leksab
^ Odino “nasasakopan a distrito.”
^ Odino “Susa.”
^ Odino “palasyo; panagsalimbengan.”
^ Odino “tan masahien ira.”
^ Odino “Susa.”
^ Odino “palasyo; panagsalimbengan.”
^ Kabaliksan toy “Kiew a Mirto.”
^ Odino “Susa.”
^ Odino “palasyo; panagsalimbengan.”
^ Odino “palasyo.”
^ Odino “masahien.”
^ Odino “matoor a panangaro.”
^ Odino “so panagmasahe ed sikara.”
^ Odino “tan walay kaiba ton masahe parad saray bibii.”
^ Nengnengen so Apendise B15.
^ Odino “matoor a panangaro.”
^ Odino “turbante.”
^ Odino “saray nasasakopan a distrito.”
^ Odino “saray kalangweran a bibii.”
^ Literal, “idapoy lima ra ed.”
^ Odino “diad biang nen Mardokeo.”
