Ester 3:1-15
3 Kayari na saya, inyatagey nen Arin Ahasuero so posisyon nen Haman+ ya anak nen Hamedata ya Agagita+ tan inikdan toy mas baleg a pakauley nen say arum ni ran prinsipe a kaiba to.+
2 Tan amin a lingkor na ari a walad puerta na palasyo to et ontutuek tan ondadakmomo ed kinen Haman, ta ontan so ingganggan na ari a gawaen ed sikato. Balet aglabay nen Mardokeo so ontuek odino ondakmomo.
3 Kanian saray lingkor na ari a walad puerta na palasyo to et inkuan dad si Mardokeo: “Akin et ibabaliwalam so ganggan na ari?”
4 Inagew-agew dan babagaan si Mardokeo, balet agto ra dedengelen. Insan indalem dad si Haman pian nanengneng no kasin napalampas iyan kagagawa nen Mardokeo;+ ta imbaga tod sikara a sikatoy sakey a Judio.+
5 Sanen anengneng nen Haman ya ag-ontutuek tan ag-ondadakmomod sikato si Mardokeo, pinasyay pasnok to.+
6 Balet agto naawat so ideyan si Mardokeo labat so pateyen* to, ta imbaga rad sikato so nipaakar ed saray kabaleyan nen Mardokeo. Kanian nananap na pankanawnawa si Haman ya upoten so amin a Judio a walad sakop nen Ahasuero, amin a kabaleyan nen Mardokeo.
7 Diad unonan bulan, salanti, bulan na Nisan,* diad koma-12 taon na uley+ nen Arin Ahasuero, ginawa ra so Pur+ (salanti, say Pampapalaranan) ed arapan nen Haman pian naamtaan day agew tan bulan, tan say apili et say koma-12 bulan, salanti, bulan na Adar.*+
8 Et inkuan nen Haman ed si Arin Ahasuero: “Wala ray totoon nitaytayak tan nikayat ed limog na saray totoo+ ed amin a probinsya* a walad sakop mo,+ a midumaan iray ganggan da ed arum a totoo; tan agda uunoren iray ganggan na ari, tan agpankaabigan na ari no paulyanan ira.
9 No onabobon so ari, wala komoy nisulat a ganggan a nepeg iran deralen. Manbayar ak na 10,000 talento* a pilak ed saray opisyal pian iyan ed pasen a pangiinay kayamanan na ari.”*
10 Diad ontan et inekal na ari ed lima to so singsing to a panagtatak+ tan inter tod si Haman+ ya anak nen Hamedata ya Agagita,+ samay mamubusol ed saray Judio.
11 Inkuan na ari ed si Haman: “Say pilak tan sarayan totoo et iter ed sika, tan gawam ed sikara so manepeg ed pakanengneng mo.”
12 Insan impatawag iray sekretaryo na ari+ diad koma-13 agew na unonan bulan. Insulat+ da so amin ya ingganggan nen Haman ed saray satrapa na ari, saray gobernador na saray probinsya,* tan saray prinsipe na nanduruman baley, unong ed panagsulat* na kada probinsya* tan unong ed sarilin lenguahe na kada baley. Insulat itan diad ngaran nen Arin Ahasuero tan tinatakan ed singsing a panagtatak na ari.+
13 Diad panamegley na saray mensahero et impawit iray sulat ed amin a probinsya* na ari, a mangigaganggan ya upoten, pateyen, tan deralen so amin a Judio, amin a kalangweran tan matatken, ugugaw tan bibii, diad sakey agew, diad koma-13 agew na koma-12 bulan, salanti, bulan na Adar,+ tan alaey amin a kayarian da.+
14 Say kopya na sulat et ipaakseb bilang ganggan ed kada probinsya* tan ipakabat ed amin a totoo, pian makapamparaan ira ed satan ya agew.
15 Nanapuran linma iray mensahero+ lapud imbaga na ari; say ganggan et inter met diad Susan*+ a panag-amotan.* Et nan-inuman so ari tan si Haman, balet say syudad na Susan* et agulo.
Paimanod leksab
^ Literal, “pangidapoan na lima.”
^ Nengnengen so Apendise B15.
^ Nengnengen so Apendise B15.
^ Odino “nasasakopan a distrito.”
^ Say sakey a talento et 34.2 kilo. Nengnengen so Apendise B14.
^ Odino posiblin, “Manbayar ak na 10,000 talento pian iyan ed pasen a pangiinay kayamanan na ari parad saramay manumpal ed sayan kimey.”
^ Odino “saray nasasakopan a distrito.”
^ Odino “estilo na panagsulat.”
^ Odino “saray nasasakopan a distrito.”
^ Odino “nasasakopan a distrito.”
^ Odino “nasasakopan a distrito.”
^ Odino “Susa.”
^ Odino “palasyo; panagsalimbengan.”
^ Odino “Susa.”
