Ester 5:1-14
5 Diad komatlon agew,+ si Ester et nansulong na kawes na reyna tan inmalagey diad loob a sular na abung* na ari, diad petek na abung na ari, legan ya akayurong so ari ed trono to diman ed abung na ari diad petek na lolooban.
2 Sanen anengneng na ari si Reyna Ester ya akaalagey ed sular, aliketan ed sikato, tan inyunat tod kinen Ester so balitok a setron sankabembenan to.+ Insan inmasingger si Ester tan diniwit toy nguro na setro.
3 Intepet na ari ed sikato: “Anto man, Reyna Ester? Antoy labay mon kerewen? Anggan* kapaldua na panarian ko et niiter ed sika!”
4 Inmebat si Ester: “No onabobon so ari, komon ta say ari a kaiba toy Haman+ et onla natan ed ponsia ya imparaan ko parad sikato.”
5 Kanian inkuan na ari ed saray totoo to: “Ibaga yod si Haman ya onla dian tampol, unong ed kerew nen Ester.” Diad ontan, say ari tan si Haman et linmad ponsia ya imparaan nen Ester.
6 Legan iran oniinum na alak, inkuan na ari ed si Ester: “Antoy pirawat mo? Nagamoran mo itan! Tan antoy labay mon kerewen? Anggan* kapaldua na panarian ko et niiter ed sika!”+
7 Inmebat si Ester: “Say pirawat ko tan say labay kon kerewen et,
8 No agamoran koy pabor na ari tan no onabobon so ari ya ipagamor so pirawat ko tan iter so kerew ko, komon ta say ari tan si Haman et onla nabuas ed ponsia ya iparaan ko parad sikara; tan nabuas ko la ibagad ari no antoy labay kon kerewen.”
9 Diad saman ya agew, si Haman et malikeliket ya inmalis tan maligligsay puso to. Balet sanen anengneng toy Mardokeo diad puerta na palasyoy ari tan naimano ton ag-inmalagey tan agginmiwgiw diad arapan to, pinasyay pasnok to ed kinen Mardokeo.+
10 Balet pinokpokan nen Haman so sarili to tan linma lad abung to. Insan to impatawag iray kakaaro to tan si Zeres+ ya asawa to.
11 Et inlastog nen Haman so dakdakel a kayamanan to, say amayamay ya anak ton lalaki,+ tan no panon ya inyatagey na ari so posisyon to tan say impangitandoro tod sikato nen saray prinsipe tan saray lingkor na ari.+
12 Inkuan ni nen Haman: “Aliwan satan labat, anggapo lay arum ya inimbitaan nen Reyna Ester a kaiba na ari noag siak labat diad samay ponsia ya imparaan to.+ Imbitado ak lamet nabuas a kaiba to tan say ari.+
13 Balet agak nin siansia kontento ed sarayan amin anggad nanenengneng koy Judion Mardokeo ya akayurong ed puerta na palasyoy ari.”
14 Kanian inkuan nen Zeres ya asawa to tan amin a kakaaro to: “Manpagawa kay sakey a poste a 50 kasiko* so katagey to. Tan diad kaimbuasan, ibagam ed ari ya ibitay da ditan si Mardokeo.+ Insan la kad ponsia a kaiba na ari tan manliket ka diman.” Agustoan nen Haman iyan suhestion kanian nampagawa na poste.
Paimanod leksab
^ Odino “palasyo.”
^ Odino “Anggan parad.”
^ Odino “Anggan parad.”
^ Manga 22.3 metro (73 piye). Nengnengen so Apendise B14.
