Ester 6:1-14
-
Pinagalangan na ari si Mardokeo (1-14)
6 Diad saman a labi et agmakaugip so ari. Kanian impaala toy libron akasulatan na saray agawa ed saraman a panaon,+ tan imbasa itan ed ari.
2 Naamtaan ya akasulat ditan imay imbaga nen Mardokeo nipaakar ed si Bigtana tan Teres, samay duaran opisyal ed palasyo na ari tan bantay na puerta, a namplanon mamatey* ed si Arin Ahasuero.+
3 Et intepet na ari: “Kasin pinagalangan tan tinumangan lay Mardokeo lapud saya?” Inmebat iray personal a lingkor na ari: “Anggapo ni ginawa parad sikato.”
4 Nagugunoyan et inkuan na ari: “Siopay walad sular?” Diad saman, si Haman et linmad paway a sular+ na abung* na ari pian mitongtong ed ari ya ibitay si Mardokeo ed samay poste ya imparaan to parad sikato.+
5 Inkuan na saray lingkor na ari: “Si Haman,+ manalalagey dimad sular.” Kanian imbaga na ari: “Paloob yo.”
6 Kaloob nen Haman, intepet na ari ed sikato: “Antoy nepeg a gawaen parad samay toon labay na ari a napagalangan?” Diad saya et inkuan nen Haman ed inkasikato: “Wala ta ni arum a mas labay na ari a napagalangan nen say siak?”+
7 Kanian inkuan nen Haman ed ari: “Parad samay toon labay na ari a napagalangan,
8 pangalam ira komon na kawes ya isusulong na ari+ tan sakey a kabayo a luluganan na ari, a walay parakep ed ulo na satan.
9 Tan samay kawes tan kabayo et imatalek komon ed sakey ed saray gagalangen a prinsipe na ari, tan nepeg dan isulong so kawes ed samay toon labay na ari a napagalangan tan paluganen dad kabayo diman ed plaza na syudad. Nepeg dan ikelyaw ed unaan to: ‘Onia so gagawaen parad samay toon labay na ari a napagalangan!’”+
10 Et tampol ya imbaga na ari ed si Haman: “Apuram sirin! Mangala kay kawes tan kabayo, tan satay imbagam et gawam ed Judion si Mardokeo ya akayurong ed puerta na palasyoy ari. Agmo aabuloyan ya agnasumpal so amin ya imbagam.”
11 Kanian inala nen Haman imay kawes tan kabayo, tan insulong tod si Mardokeo+ so kawes tan pinalugan tod kabayo diman ed plaza na syudad tan inkelyaw to ed unaan to: “Onia so gagawaen ed toon labay na ari a napagalangan!”
12 Kayari na satan, pinmawil si Mardokeo ed puerta na palasyoy ari, balet si Haman et nanapuran sinmempet ed abung to, a maer-ermen tan akasakbong so ulo to.
13 Sanen inistorya nen Haman ed si Zeres+ ya asawa to tan ed amin a kakaaro to so amin ya agawad sikato, inkuan ed sikato na saray marunong a lalaki tan si Zeres ya asawa to: “No si Mardokeo, ya akaimaton ed inggapoy kadederal mo, et nanlapud kapolian na saray Judio,* agka manalod sikato; seguradon naderal ka ed arapan to.”
14 Legan iran mitotongtong ed sikato, saray opisyal ed palasyo na ari et sinmabi tan inawit dan tampol si Haman ed ponsia ya imparaan nen Ester.+
Paimanod leksab
^ Literal, “mangidapoy lima.”
^ Odino “palasyo.”
^ Literal, “nanlapud bini na saray Judio.”
