Ester 8:1-17
8 Diad saman ya agew et inter nen Arin Ahasuero ed si Reyna Ester so abung nen Haman,+ samay mamubusol ed saray Judio;+ tan si Mardokeo et inmarap ed ari, lapud impaamta la nen Ester no antoy relasyon tod sikato.+
2 Et inekal na ari ed lima to so singsing ton panagtatak+ ya inala tod si Haman insan inter tod si Mardokeo. Tan si Mardokeo et ginawa nen Ester a manangasikaso ed abung nen Haman.+
3 Sakey ni, akitongtong lamet si Ester ed ari. Sikatoy dinmakmomo ed salian na ari tan manakis tan akikasid sikato a paandien toy mauges ya epekto na ginawa nen Haman ya Agagita tan samay plano to sumpad saray Judio.+
4 Et inyunat na ari ed kinen Ester so balitok a setro to,+ kanian inmalagey si Ester ed arapan na ari.
5 Inkuan to: “No onabobon so ari tan no agamoran koy pabor to, tan no manepeg iya parad ari tan sikatoy naliliketan ed siak, wala komoy nisulat a ganggan pian nababawi iray sulat na samay nanggaway pakana a si Haman+ ya anak nen Hamedata ya Agagita,+ ya insulat to pian deralen iray Judio diad amin a probinsya* na ari.
6 Ta nitepel ko kasi a nanengneng so mauges a nagawa ed saray kabaleyan ko, tan nitepel ko kasi a nanengneng so kaderal na saray kakanayon ko?”
7 Kanian inkuan nen Arin Ahasuero ed si Reyna Ester tan ed Judion si Mardokeo: “Inter ko lad si Ester so abung nen Haman+ tan impaibitay ko lad poste,+ lapud pakana to ya atakien iray* Judio.
8 Diad ngaran na ari et sarag yo lan isulat so antokaman a manepeg parad saray Judio tan tatakan yo itan diad singsing a panagtatak na ari, ta say ganggan ya insulat diad ngaran na ari tan tinatakan diad singsing ton panagtatak et agnayarin babawien.”+
9 Kanian diad saman et impatawag iray sekretaryo na ari diad komatlon bulan, salanti, bulan na Sivan,* diad koma-23 agew, tan insulat dan amin so ingganggan nen Mardokeo ed saray Judio tan ed saray satrapa,+ gobernador, tan prinsipe na saray probinsya*+ manlapud India anggad Etiopia, a 127 probinsya,* unong ed panagsulat* na kada probinsya* tan unong ed sarilin lenguahe na kada baley tan unong ed panagsulat* tan sarilin lenguahe na saray Judio.
10 Insulat itan nen Mardokeo diad ngaran nen Arin Ahasuero tan tinatakan to diad singsing a panagtatak na ari+ tan impawit to irayan akasulat a ganggan diad panamegley na saray mensahero ya akalugan ed saray kabayo; akalugan ira ed saray maples a kabayon parad panangipatulor na sulat, a pinarakel parad serbisyo na ari.
11 Diad sarayan sulat, inabuloyan na ari a mantitipon iray Judion walad nanduruman syudad tan iyagel day bilay* da tan upoten, pateyen, tan deralen iray armada na dinanman a baley odino probinsya* ya onatakid sikara, kaiba iray bibii tan ugugaw, tan alaen da ray kaykayarian da.+
12 Nagawa iya ed sakey ya agew diad amin a probinsya* nen Arin Ahasuero, diad koma-13 agew na koma-12 bulan, salanti, bulan na Adar.*+
13 Say karga* na sulat et nepeg ya iter bilang ganggan ed amin a probinsya.* Nepeg ya iyabawag itan ed amin a totoo, pian diad satan ya agew et makapamparaan iray Judio ya ombawi ed saray kakabusol da.+
14 Saray mensahero ya akalugan ed kabayon parad panangipatulor na sulat ya uusaren parad serbisyo na ari et nanapura tan mapmaples ya inmalis lapud ganggan na ari. Say ganggan et inter met diad Susan*+ a panag-amotan.*
15 Diad saman et inmalis si Mardokeo ed arapan na ari ya akasulong na asul tan amputi a kawes, walay baleg a korona ton balitok tan balabal a gawad maabig a klase na tela, a kolor-ube ya abel.*+ Tan say syudad na Susan* et maneyag ed liket.
16 Diad saray Judio et walay inawa* tan panliliket tan gayaga tan kagalangan.
17 Tan diad amin a probinsya* tan amin a syudad, inerman makasabi so sulat tan ganggan na ari, et manliliket tan magaygayaga iray Judio, a namponsia tan nanselebra ira. Dakel a totoo ed dalin da so mangibabagan Judio ira,+ lapud tinmakot ira ed saray Judio.
Paimanod leksab
^ Odino “nasasakopan a distrito.”
^ Literal, “lapud inyunat toy lima to sumpad saray.”
^ Odino “nasasakopan a distrito.”
^ Odino “estilo na panagsulat.”
^ Odino “estilo na panagsulat.”
^ Odino “nasasakopan a distrito.”
^ Nengnengen so Apendise B15.
^ Odino “nasasakopan a distrito.”
^ Odino “kamarerwa.”
^ Odino “nasasakopan a distrito.”
^ Odino “nasasakopan a distrito.”
^ Nengnengen so Apendise B15.
^ Odino “nasasakopan a distrito.”
^ Odino “kopya.”
^ Odino “Susa.”
^ Odino “palasyo; panagsalimbengan.”
^ Odino “kolor-ube ya abel a gawad bagoy karnero.”
^ Odino “Susa.”
^ Literal, “liwawa.”
^ Odino “nasasakopan a distrito.”
