Ester 9:1-32
9 Diad koma-13 agew na koma-12 bulan, salanti, bulan na Adar,*+ sanen gawaen la may salita tan ganggan na ari,+ diad samay agew ya iilaloan na saray mamubusol ed saray Judio a taloen da ra et abalintuag so kipapasen, tan saray Judio laingen so analo ed saramay mamubusol ed sikara.+
2 Nantitipon iray Judio ed saray syudad da diad amin a probinsya* nen Arin Ahasuero+ pian atakien iramay malabay a mamasakit ed sikara, tan anggapoy anggan sakey ya ayarian toy milaban ed sikara, lapud tinmakot ed sikara so amin a totoo.+
3 Tan amin a prinsipe na saray probinsya,* saray satrapa,+ gobernador, tan saray mangaasikaso ed kimey na ari et ontutulong ed saray Judio, ta tinmakot irad si Mardokeo.
4 Nagmaliw a makapanyari si Mardokeo+ diad abung* na ari, tan sikatoy nakakabat ed amin a probinsya,* lapud tuloytuloy so ibibiskeg na pakayari to.
5 Kinabil na saray Judio so amin a kakabusol da diad panamegley na espada, a pinapatey tan dinederal da ra; ginawa ray labalabay da ed saramay mamubusol ed sikara.+
6 Diad Susan*+ a panag-amotan,* 500 a lalaki so pinatey tan dineral na saray Judio.
7 Pinatey da met si Parsandata, Dalfon, Aspata,
8 Porata, Adalia, Aridata,
9 Parmasta, Arisai, Aridai, tan si Vaisata,
10 saray samploran anak a lalaki nen Haman ya anak nen Hamedata, samay mamubusol ed saray Judio.+ Balet kayari da ran pinatey, ag-ira angala na samsam.+
11 Diad saman ya agew, impasabi ed ari so bilang na saramay pinatey ed Susan* a panag-amotan.*
12 Et inkuan na ari ed si Reyna Ester: “Diad Susan* a panag-amotan* et pinatey tan dineral na saray Judio so 500 a lalaki tan say samploran anak a lalaki nen Haman. Anto balet so ginawa ra ed arum a probinsya* na ari+ ey? Et natan, antoy pirawat mo? Nagamoran mo itan. Tan anto ni labay mon kerewen? Niiter itan ed sika.”
13 Inmebat si Ester: “No onabobon so ari,+ saray Judion walad Susan* et naabuloyan met komon ya onkiwas nabuas unong ed ganggan+ ed sayan agew; tan ibitay komon ed poste iray samploran anak a lalaki nen Haman.”+
14 Kanian ingganggan na ari ya ontan so gawaen. Et sakey a ganggan so inter diad Susan,* tan imbitay so samploran anak a lalaki nen Haman.
15 Saray Judion walad Susan* et nantitipon lamet diad koma-14 ya agew na bulan na Adar+ tan 300 a lalaki so pinatey da ed Susan,* balet ag-ira angala na samsam.
16 Nantitipon met so arum nin Judion walad saray probinsya* na ari tan inyagel day bilay da.*+ Inupot da ray kabusol da,+ a pinatey da so 75,000 ed saramay mamubusol ed sikara; balet ag-ira angala na samsam.
17 Agawa itan diad koma-13 agew na bulan na Adar, tan nampainawa ra diad koma-14 ya agew tan ginawa ra itan ya agew na piesta tan panliliket.
18 Saray Judion walad Susan* et nantitipon diad koma-13 agew+ tan diad koma-14 ya agew,+ tan nampainawa ra diad koma-15 agew tan ginawa ra itan ya agew na piesta tan panliliket.
19 Kanian saray Judion manaayam ed saray syudad diad ararawin distrito et ginawa ra so koma-14 ya agew na bulan na Adar bilang agew na panliliket tan piesta, agew na selebrasyon,+ tan panaon na paniiteran na naakan.+
20 Insulat nen Mardokeo+ irayan agawa tan angipawit na saray sulat ed amin a Judion walad saray probinsya* nen Arin Ahasuero, asingger man odino arawi.
21 Binilin to ra a selebraan dan tinaon so koma-14 ya agew na bulan na Adar, pati say koma-15 agew,
22 lapud diad saraman ya agew et nampainawa iray Judio diad pilalaban ed saray kabusol da tan diad saman a bulan, say panaakis da et asalatan na panliliket tan say paneermen+ da et asalatan na agew na selebrasyon. Nepeg dan selebraan iratan bilang agew na piesta tan panliliket tan panaon na paniiteran na naakan tan pangiter na regalo ed saray mairap-bilay.
23 Tan inmabobon iray Judio ya ituloy so selebrasyon ya inggapo ra tan gawaen so insulat nen Mardokeo ed sikara.
24 Ta si Haman+ ya anak nen Hamedata ya Agagita,+ samay mamubusol ed amin a Judio, et implano ton deralen ira,+ tan ginawa to so Pur,+ salanti, say Pampapalaranan pian nataranta ira tan naderal ira.
25 Balet sanen linmad ari si Ester, say ari et angiter na akasulat a ganggan+ a mangibabagan: “Say mauges a plano tod saray Judio+ et nepeg ya ompawil ed mismon ulo to”; tan sikato tan saray anak ton lalaki et imbitay dad poste.+
26 Kanian sarayan agew et tinawag dan Purim, ya intumbok da ed ngaran a Pur.*+ Kanian nisengeg ed amin a karga na sayan sulat tan samay anengneng na saray Judio nipaakar ed saya tan samay agawad sikara,
27 inobliga day sarili ra tan saray kailalakan da tan amin ya akiulop ed sikara+ a nepeg dan selebraan iyan duaran agew tan sumpalen imay akasulat nipaakar ed saraya diad aturon panaon ed kada taon.
28 Sarayan agew et nepeg a nodnonoten tan selebraan na kada henerasyon, kada pamilya, kada probinsya,* tan kada syudad; tan sarayan agew na Purim et nepeg a mantultuloy ed limog na saray Judio, tan say pannodnonot ed saratan et agnepeg a mangangga ed limog na saray kailalakan da.
29 Insan si Reyna Ester ya anak nen Abihail tan say Judion si Mardokeo et nansulat, ya inusar day amin a pakauley da, pian paletan so komaduan sulat nipaakar ed Purim.
30 Saray sulat, a nankarga na saray salita na kareenan tan katuaan, et impawit nen Mardokeo ed amin a Judio diad 127 probinsya*+ ya uuleyan nen Ahasuero+
31 pian paletan so panselebra ed saray agew na Purim diad aturon panaon na saratan, unong ed ingganggan na Judion si Mardokeo tan si Reyna Ester a gawaen da+ tan unong ed impangobliga rad sarili* ra tan saray kailalakan da a sumpalen,+ kaibay panag-ayunal+ tan masimsimoon a pikakasi.+
32 Tan pinaletan na ganggan nen Ester irayan bengatla nipaakar ed Purim,+ tan insulat itan diad sakey a libro.
Paimanod leksab
^ Nengnengen so Apendise B15.
^ Odino “nasasakopan a distrito.”
^ Odino “nasasakopan a distrito.”
^ Odino “palasyo.”
^ Odino “nasasakopan a distrito.”
^ Odino “Susa.”
^ Odino “palasyo; panagsalimbengan.”
^ Odino “Susa.”
^ Odino “palasyo; panagsalimbengan.”
^ Odino “Susa.”
^ Odino “palasyo; panagsalimbengan.”
^ Odino “nasasakopan a distrito.”
^ Odino “Susa.”
^ Odino “Susa.”
^ Odino “Susa.”
^ Odino “Susa.”
^ Odino “nasasakopan a distrito.”
^ Odino “akilaban ira parad kamarerwa ra.”
^ Odino “Susa.”
^ Odino “nasasakopan a distrito.”
^ Say “Pur” et mankabaliksan na “Pampapalaranan.” Say plural a “Purim,” so nagmaliw a tawag ed piesta na saray Judio a seselebraan diad koma-12 bulan na sagradon kalendaryo. Nengnengen so Apendise B15.
^ Odino “nasasakopan a distrito.”
^ Odino “nasasakopan a distrito.”
^ Odino “kamarerwa.”
