Exodo 29:1-46
29 “Oniay nepeg mon gawaen pian napasanto ira diad panlingkor dad siak bilang saserdote: Mangala kay kilaw a kalakian a baka, duaran kalakian a karnero ya anggapoy depekto,+
2 andi-lebaduran tinapay, andi-lebadura iran kurti-singsing a tinapay a nilaokay larak, tan andi-lebadura iran maimpis a tinapay a pinuraporan na larak.+ Pino ya arinan trigo so usaren mo diad panggawam ed saratan
3 tan iyan mo iratan ed sakey a baskit tan iyapay mo iratan ya akakargad baskit,+ tan iyapay mo met so kalakian a baka tan duaran kalakian a karnero.
4 “Ipresentam si Aaron tan saray ananak to diad lolooban na tolda a pantitiponan+ tan ames mo ra.*+
5 Insan alam iray kawes+ tan isulong mod si Aaron so andukey a kawes, say andiay-taklay a latop parad efod, say efod, tan say apis na pagew, tan isinger mon malet so nilagan balkes na efod diad awak to.+
6 Iyan mod ulo to so turbante tan iyan mod tapew na turbante so masanton tanda na dedikasyon;*+
7 tan alam so larak a panaglana+ tan ikalbom ed ulo to tan lanaan mo.+
8 “Insan ipresentam iray ananak to tan sulongan mo ra na andukey iran kawes+
9 tan balkesan mo ra, si Aaron ontan met ed saray ananak to, tan iyan mo so sakbong na ulo ra; tan say inkasaserdote et magmaliw a kien da bilang permanentin ganggan.+ Onia so pangiter moy autoridad ed si Aaron tan saray ananak to pian makapanlingkor ira bilang saserdote.*+
10 “Iyapay mo natan so kalakian a baka diad arapan na tolda a pantitiponan, tan itapew nen Aaron tan saray ananak to iray lima ra ed ulo na baka.+
11 Pakgeran mo so baka diad arapan nen Jehova, diad lolooban na tolda a pantitiponan.+
12 Mangala kay daiset a dala na baka ed gamet mo tan iyan mo itan ed saray saklor na altar,+ tan iyibung mo ed leksab na altar so akeran dala.+
13 Insan alam so amin a taba+ ya akabalkot ed pait, say taba na altey, tan say duaran bato tan say taba na saratan, tan poolan mo iratan pian onasewek diad altar.+
14 Balet say karne na baka ontan met ed katat tan dutak to et poolan mo diad paway na kampo. Satan so apay parad kasalanan.
15 “Insan alam imay sakey a kalakian a karnero, tan itapew nen Aaron tan saray ananak to iray lima ra ed ulo na kalakian a karnero.+
16 Pakgeran mo so kalakian a karnero tan alam so dala to tan iwalsik mo diad amin a diking na altar.+
17 Tegtegteg mo so kalakian a karnero, tan urasan mo iray pait+ tan bikking to, tan pandarasig mon panibaen iray tegteg pati ulo to.
18 Poolan mo so interon kalakian a karnero, a paasewek mo itan diad altar. Satan so apay a popoolan parad si Jehova, sakey ya ambalingit* ya angob.+ Satan so apay a pinoolan parad si Jehova.
19 “Insan alam imay sananey nin kalakian a karnero, tan itapew nen Aaron tan saray ananak to iray lima ra ed ulo na kalakian a karnero.+
20 Pakgeran mo so kalakian a karnero tan mangala kay daiset a dala na satan tan iyan mod kawanan a layag nen Aaron tan ed kawanan a layag na saray ananak to tan ed tangan na kawanan a lima ra tan ed tangan na kawanan a sali ra, tan iwalsik mo so dala diad amin a diking na altar.
21 Insan mangala kay daiset a dala diad altar tan daiset a larak a panaglana+ tan iwalsik mo itan ed si Aaron tan saray kawes to tan ed saray ananak to tan saray kawes da, pian sikato tan saray kawes to tan saray ananak to tan saray kawes da et magmaliw a masanto.+
22 “Insan alam ed kalakian a karnero so taba, say mataban ikol, say taba ya akabalkot ed pait, say taba ed altey, say duaran bato tan say taba na saratan,+ tan say kawanan ya ulpo, ta satan so kalakian a karnero parad inkaturo.*+
23 Mangala ka met na malimpek a tinapay tan kurti-singsing a tinapay a nilarakan tan maimpis a tinapay manlapud samay baskit na andi-lebaduran tinapay a walad arapan nen Jehova.
24 Iyan mo iratan ya amin ed saray lima nen Aaron tan saray lima na ananak to, tan ipayapay mo iratan bilang apay ya ipapayapay diad arapan nen Jehova.
25 Insan alam iratan ed lima ra tan poolan mod altar, diad tapew na apay a popoolan, bilang ambalingit* ya angob ed arapan nen Jehova. Satan so apay a pinoolan parad si Jehova.
26 “Insan alam so pagew na kalakian a karnero parad inkaturo+ a niyapay nisengeg ed si Aaron, tan ipayapay mo itan bilang apay ya ipapayapay ed arapan nen Jehova, tan magmaliw itan a betang mo.
27 Pasantos mo so pagew na apay ya ipapayapay tan say ulpo na sagradon kabiangan na bagat ya impayapay tan inala manlapud kalakian a karnero parad inkaturo,+ manlapud samay inyapay parad si Aaron tan saray ananak to.
28 Magmaliw itan a kien nen Aaron tan saray ananak to bilang sakey a permanentin ganggan a sumpalen na saray Israelita, ta satan et sagradon kabiangan na bagat, tan magmaliw itan a sagradon kabiangan na bagat ya iter na saray Israelita.+ Satan so sagradon kabiangan na bagat da ed si Jehova manlapud saray bagat dan pandurungoan.+
29 “Saray masanton kawes+ nen Aaron et usaren na saray ananak to+ ya onsublay ed sikato sano nalanaan tan naturo ira bilang saserdote.
30 Pitoy agew ya isulong iratan na samay onsublay ed sikaton saserdote a manlapud saray ananak to tan onloob ed tolda a pantitiponan pian manlingkor ed masanton pasen.+
31 “Alam so kalakian a karnero parad inkaturo tan ilambong mo so karne na satan diad masanton pasen.+
32 Kanen nen Aaron tan saray ananak to+ so karne na kalakian a karnero tan say tinapay a walad baskit diad lolooban na tolda a pantitiponan.
33 Nepeg dan kanen iray bengatlan inkana parad pananakbong pian naturo ra bilang saserdote* tan napasanto ira. Balet ag-iratan nayarin kanen na sakey a toon agmakanepegan,* lapud masanto iratan.+
34 No anggad kabuasan et walay nakeran karne na samay bagat parad inkaturo tan samay tinapay, poolan mo so akera.+ Ag-itan nepeg a kanen, lapud masanto itan.
35 “Oniay gawaen mod si Aaron tan saray ananak to unong ed amin ya ingganggan kod sika. Gawam ed loob na pitoy agew so panurom ed sikara bilang saserdote.*+
36 Inagew-agew kan manbagat na kalakian a baka ya onkanan apay parad kasalanan bilang pananakbong, tan linisan mo so altar manlapud kasalanan diad panggawam na pananakbong parad satan, tan lanaan mo itan pian napasanto itan.+
37 Gawam so pananakbong parad altar ed loob na pitoy agew, tan nepeg mon pasantosen iya pian magmaliw a sankasantosan ya altar.+ Nepeg a masanto so siopaman ya ondiwit ed altar.
38 “Saya so nepeg mon iyapay diad altar: duaran kalakian a karnero a mantaon na sakey, kada agew a manpatuloy.+
39 Iyapay mo imay sakey a kilaw a kalakian a karnero diad kabuasan tan samay sakey a karnero diad pansirunget.*+
40 Kaiba na samay unonan kilaw a kalakian a karnero so kakaplo na sakey sukat ya efa* na pinon arina ya inlaok ed kakapat na sakey hin* a larak na olibo, tan apay ya iinumen a kakapat na sakey hin ya alak.
41 Iyapay mo so komaduan kilaw a kalakian a karnero diad pansirunget* a kaiba met so iyaapay a kakanen tan iinumen a singa diad samay kabuasan. Iyapay mo itan bilang ambalingit* ya angob, sakey ya apay a pinoolan parad si Jehova.
42 Satan so apay a popoolan a regular ya iyapay na amin a henerasyon yo diad lolooban na tolda a pantitiponan ed arapan nen Jehova, a ditan et manpanengneng ak ed sikayo tan mitongtong ak ed sika.+
43 “Manpanengneng ak ditan ed saray Israelita, tan napasanto itan lapud gloriak.+
44 Pasantosen ko so tolda a pantitiponan tan say altar, tan pasantosen ko si Aaron tan saray ananak to+ pian makapanlingkor ira ed siak bilang saserdote.
45 Manayam* ak ed limog na totoo na Israel, tan magmaliw ak a Dios da.+
46 Tan naamtaan da a siak si Jehova a Dios da, ya angipaway ed sikara ed dalin na Ehipto pian manayam ak ed limog da.+ Siak si Jehova a Dios da.
Paimanod leksab
^ Posiblin tutukoyen na saya ya iganggan ira nen Moises a manames.
^ Odino “so masanton korona.”
^ Literal, “so pamanom ed lima nen Aaron tan ed lima na saray ananak ton lalaki.”
^ Odino “makapakepay liknaan; makapakalmay liknaan.” Literal, “makapainawa.”
^ Sayan kalakian a karnero et inyapay sanen aturo si Aaron tan saray ananak to parad inkasaserdote.
^ Odino “makapakepay liknaan; makapakalmay liknaan.” Literal, “makapainawa.”
^ Literal, “pian panoen so lima ra.”
^ Literal, “sakey ya estranghero,” salanti, sakey a toon agkabiangan ed pamilya nen Aaron.
^ Literal, “so pamanom ed lima ra.”
^ Literal, “diad baetan na duaran labi.”
^ Say sakey ya efa et 22 litro. Nengnengen so Apendise B14.
^ Say sakey a hin et 3.67 litro. Nengnengen so Apendise B14.
^ Literal, “diad baetan na duaran labi.”
^ Odino “makapakepay liknaan; makapakalmay liknaan.” Literal, “makapainawa.”
^ Odino “Mantabernakulo.”
