Exodo 7:1-25
7 Insan inkuan nen Jehova ed si Moises: “Ginawa ta kan singa Dios* ed say Faraon, tan si Aaron a kuyam et magmaliw a propetam.+
2 Nepeg mon ibaga so amin ya iganggan kod sika, tan si Aaron ya agim so mansalita ed Faraon, tan ibulos to iray Israelita manlapud dalin to.
3 Balet siak, abuloyan kon onawet so puso na Faraon,+ tan parakelen ko iray gawaen kon tanda tan milagro diad dalin na Ehipto.+
4 Balet ag-ondengel ed sikayo so Faraon, tan idapok so limak ed Ehipto tan ipaway ko iray dakerakel a totook,* saray Israelita, manlapud dalin na Ehipto diad panamegley na angkakabaleg iran panangukom.+
5 Tan naamtaan na saray Ehipsio a siak si Jehova+ sano iyunat koy limak sumpad Ehipto tan ipaway ko iray Israelita ed limog da.”
6 Ginawa nen Moises tan Aaron so ingganggan nen Jehova ed sikara; ontan so ginawa ra.
7 Si Moises et mantaon na 80, tan si Aaron et mantaon na 83 sanen akitongtong ira ed Faraon.+
8 Inkuan natan nen Jehova ed si Moises tan Aaron:
9 “No ibaga na Faraon ed sikayo, ‘Manggawa kayoy milagro,’ ibagam ed si Aaron, ‘Alam so baston mo tan ibuntok mod arapan na Faraon.’ Magmaliw itan a baleg ya uleg.”+
10 Kanian linmoob si Moises tan Aaron ed kawalaay Faraon tan ginawa ran amin so ingganggan nen Jehova. Imbuntok nen Aaron so baston to ed arapan na Faraon tan saray lingkor to, tan nagmaliw itan a baleg ya uleg.
11 Balet impatawag na Faraon iray makabat a lalaki tan saray managsalamangka, tan onman met so ginawa na saray managmahikon saserdote na Ehipto+ ed panamegley na mahiko ra.+
12 Imbuntok na balang sakey so baston to, tan nagmaliw iratan ya angkakabaleg ya uleg; balet inakmon na baston nen Aaron iray baston da.
13 Balet inmawet nin siansia so puso na Faraon,+ tan agto ra dinengel, unong ya imbaga nen Jehova.
14 Insan inkuan nen Jehova ed si Moises: “Anawet so puso na Faraon.+ Agto labay ya ibulos iray totoo.
15 La ka ed Faraon diad kaimbuasan. Sikatoy onla ed kawalaay danum! Tan alagey ka pian sikatoy abeten mo diad gilig na Ilog Nilo; tan awit mo so baston a nagmaliw ya uleg.+
16 Tan ibagam ed sikato, ‘Si Jehova a Dios na saray Hebreo et imbaki to ak ed sika,+ tan inkuan to: “Ibulos mo iray totook pian makapanlingkor irad siak diad kalawakan,” balet anggad natan et agka ni tinmulok.
17 Oniay inkuan nen Jehova: “Diad saya et naamtaan mo a siak si Jehova.+ Ibasig ko so baston a walad limak diad danum na Ilog Nilo, tan magmaliw itan a dala.
18 Tan ompatey iray sira a walad Nilo, tan ombanget so Nilo, tan agnainum na saray Ehipsio so danum a manlalapud Nilo.”’”
19 Insan inkuan nen Jehova ed si Moises: “Ibagam ed si Aaron, ‘Alam so baston mo tan iyunat moy limam ed tapew na saray danum na Ehipto,+ diad saray ilog, saray kanal,* saray maranum a karikaan,+ tan amin a depositoan na danum, pian magmaliw iratan a dala.’ Niwala so dala ed interon dalin na Ehipto, anggan diad saray kiew tan baton pananginan da.”
20 Tampol a ginawa nen Moises tan Aaron so ingganggan nen Jehova. Intagey to so baston tan imbasig tod danum na Ilog Nilo ed pakanengneng na Faraon tan saray lingkor to, tan amin a danum na ilog et nagmaliw a dala.+
21 Tan inatey iray sira a walad ilog,+ tan binmanget so ilog, tan agnainum na saray Ehipsio so danum a manlalapud Nilo,+ tan niwala so dala ed interon dalin na Ehipto.
22 Balet onman met so ginawa na saray managmahikon saserdote na Ehipto ed panamegley na saray mahiko ra,+ kanian nantultuloy ya inmawet so puso na Faraon, tan agto ra dinengel, unong ya imbaga nen Jehova.+
23 Insan pinmawil so Faraon diad abung to, tan imbaliwala to met iyan anengneng to.
24 Kanian nankokotkot so amin ya Ehipsio diad kaliberliber na Nilo pian walay danum ya inumen da, lapud agda nainum so danum na Nilo.
25 Tan pitoy agew so linmabas kayarin impagmaliw nen Jehova a dala so danum na Ilog Nilo.
Paimanod leksab
^ Literal, “Ginawa ta kan Dios.”
^ Literal, “iray armadak.”
^ Salanti, saray kanal ya aagusan na danum a manlalapud Nilo.
