Ezequiel 1:1-28
1 Diad koma-30 taon, ed komaliman agew na komapat a bulan, sanen kaibak iray totoon nibantak ed arum a dalin,+ diad abay na ilog Kebar,+ alukasan so katawenan tan anengneng ko ray pasingawey na Dios.
2 Diad komaliman agew na bulan, salanti, diad komaliman taon na inkibantak nen Arin Jehoiakin+ ed arum a dalin,
3 sinmabi so mensahe nen Jehova ed si Ezequiel* ya anak nen Buzi a saserdote legan a sikatoy walad abay na ilog Kebar ed dalin na saray Caldeo.+ Diman et niwalad sikato so pakayari* nen Jehova.+
4 Sanen ninmengneng ak, naimanok a walay onsasabin makmaksil a dagem+ a nanlapud amianen, tan walay sakey a makapal a lurem tan makalaram ya apoy*+ ya apaliberan na masmasnag a liwawa, tan manlapud pegley na apoy et walay singa mankirlap a metal.*+
5 Diad pegley na satan et walay singa apatiran mabilay a pinalsa,+ tan say itsura da et singa too.
6 Balang sakey et walaan na apatiran lupa tan apatiran payak.+
7 Maptek iray sali ra, tan singa dapan na kilaw a baka iray dapan da, tan masilesileng iratan a singa kaliwawa na pinasileng a gansa.+
8 Walaan ira na lima na too diad silong na saray payak da diad apatiran diking da, tan sikaran apat et walaan na saray lupa tan saray payak.
9 Mandidiwitan iray nguro na saray payak da. Ag-ira ompeyes sano onalis ira; balang sakey et diretson onabante.+
10 Oniay itsura na saray lupa ra: Lupa na too ed arap, lupa na leon+ ed kawanan, lupa na baka+ ed kawigi, tan lupa na agila+ ed beneg.+
11 Ontan so itsura na saray lupa ra. Saray payak da et akabuskag a patagey. Kada sakey et walaay duaran payak a mandidiwitan tan duaran payak a manasakbong ed saray laman da.+
12 Balang sakey et diretson onabante. Onla rad inerman a pangipaarapan na espiritu ed sikara.+ Ag-ira ompeyes sano onalis ira.
13 Tan say itsura na saray mabilay a pinalsa et singa mandarlang a ngalab, tan wala ray singa maliwliwawan apoy a manpapawilpawil ed nanleleetan na saray mabilay a pinalsa, tan walay onkikidyam a kirmat a manlalapud apoy.+
14 Tan sano onla tan ompawil iramay mabilay a pinalsa, singa kirmat so kapeles da.
15 Legan kon nenengnengen iramay mabilay a pinalsa, naimanok a walay dalig ed dalin diad abay na kada mabilay a pinalsan walaay apatiran lupa.+
16 Say inkagawa na saray dalig et onkikidyam a singa baton crisolito, tan nampaparay itsura na saratan ya apat. Say inkagawa ra et singa sakey a dalig ya akabenlag ed sakey met a dalig.
17 Sano onaandar iratan et nayarian day onarap ed anggan iner ed apatiran direksion, ya ag-ira onliko.
18 Atagtagey so gilig-gilig* da kanian makapataktakot iratan, tan napno na saray mata so gilig-gilig na saratan ya apat.+
19 Sano onalis iray mabilay a pinalsa, mibansag ed sikara iray dalig, tan sano mamaatagey manlapud dalin iray mabilay a pinalsa, mamaatagey met iray dalig.+
20 Onla ra ed pangipaarapan ed sikara na espiritu, diad inerman a laen na espiritu. Saray dalig et mamaatagey a kabansag da, ta say espiritu ya onkikiwas ed saray mabilay a pinalsa* et wala met ed saray dalig.
21 Sano ombuat ira, ombuat met iray dalig; tan sano ontunda ra, ontunda met iratan; tan sano mamaatagey ira manlapud dalin, saray dalig et mamaatagey a kabansag da, ta say espiritu ya onkikiwas ed saray mabilay a pinalsa et wala met ed saray dalig.
22 Diad tagey na kauloan na saray mabilay a pinalsa et walay singa sakey a datal a mankidyam a singa makapadinayew a kristal,* a walad tagey na kauloan da.+
23 Diad silong na satan a datal et akaunat* iray payak da ed sakey tan sakey. Kada sakey et walaan na duaran payak a manakbong ed sakey a diking, tan duaran payak a manakbong ed sananey a diking na laman da.
24 Sanen nadngel koy ungol na saray payak da, singa itan ungol na manag-agus a danudanum, singa ungol na Makapanyarin-amin.+ Sano onkurang ira, singa itan ungol na sakey ya armada. Sano ontunda ra, iyabeba da iray payak da.
25 Walay boses a manlalapud tagey na datal a walad tagey na kauloan da. (Sano ontunda ra, iyabeba da iray payak da.)
26 Diad tapew na datal a walad tagey na kauloan da et walay singa baton safiro,+ tan kaparpara itan na sakey a trono.+ Diad trono ed tagey, walay akayurong a say itsura to et singa too.+
27 Walay anengneng kon singa mankirlap a metal,+ singa apoy ya onliliwawa manlapud awak to a patagey; tan manlapud awak to a paleksab et walay anengneng kon singa apoy.+ Maliwliwawa ed kaliberliber to
28 a singa kaliwawa na sakey a bunlalakaw+ ed lurem sano agew a mauran. Ontan so kasnagan na liwawa a walad kaliberliber. Singa itan nengneng na gloria nen Jehova.+ Sanen anengneng ko itan, dinmakmomo ak, tan nadngel koy boses na sakey a mansasalita.
Paimanod leksab
^ Kabaliksan toy “Pinabiskeg na Dios.”
^ Literal, “lima.”
^ Impanlaokan a balitok tan pilak.
^ Odino “tan kirmat.”
^ Diad Ingles, rim.
^ Literal, “say espiritu na mabilay a pinalsa.”
^ Literal, “yelo.”
^ Odino posiblin, “ninmatnat ya akaunat.”
