Ezequiel 15:1-8
-
Jerusalem, anggapoy kakanaan a sengeg na ubas (1-8)
15 Oniay mensahe nen Jehova a sinmabi lamet ed siak:
2 “Anak na too, antoy pandumaan na kiew a nanlapud sengeg na ubas tan say arum a kiew, odino say sanga a nanlapud saray kiew ed katakelan?
3 Kasin nausar ed kimey so palitek a naala ed satan? Odino makala kasi ed satan iray totoo na gawaen dan palpal a pangisabitan na kagawaan?
4 Nibuntok itan ed apoy pian pansunglor, tan upoten na apoy so biek tan biek a nguro na satan, tan napoolan so pegley. Nausar ni kasi itan natan parad antokaman a kimey?
5 Anggan sanen agni itan apoolan, agla itan nausar parad antokaman. Agta mas nagkalalon ag-itan nausar no inupot lay apoy tan apoolan la?”
6 “Kanian oniay inkuan na Soberanon Katawan a Jehova: ‘Singa say kiew a nanlapud sengeg na ubas ed pegley na saray kiew ed katakelan, a satan et imbuntok kod apoy pian pansunglor, ontan met so gawaen kod saray manaayam ed Jerusalem.+
7 Onsumpa ak ed sikara. Akaliktar ira ed apoy, balet apoy so mangupot ed sikara. Tan naamtaan yo a siak si Jehova, sano onsumpa ak ed sikara.’”+
8 “‘Tan satan a dalin et gawaen kon agla napanayaman,+ lapud ag-ira nanmatoor,’+ so imbaga na Soberanon Katawan a Jehova.”
