Ezequiel 24:1-27
24 Oniay mensahe nen Jehova a sinmabi lamet ed siak diad komasiam a taon, ed komasamplon agew na komasamplon bulan:
2 “Anak na too, isulat mo iyan petsa,* sayan mismon agew. Nilusob na ari na Babilonia so Jerusalem diad sayan mismon agew.+
3 Tan mangibalikas kay sakey a proverbio* nipaakar ed rebelyoson sankaabungan, tan nipaakar ed sikara et oniay ibagam:
“‘Oniay inkuan na Soberanon Katawan a Jehova:
“Itapew mo so kaldero* ed apoy tan kargaan moy danum.+
4 Iyan mo ditan iray ategteg a karne,+ amin a maabig a karne,Say ulpo tan say takeb; panom itan na sankaabigan iran pukel.
5 Pilim so sankaabigan a karnero ed pulok,+ tan mangiyan kay dakel a kiew diad silong na kaldero.
Ilambong mo ditan iray tinegteg, tan ilutom ditan iray pukepukel.”’
6 “Kanian oniay inkuan na Soberanon Katawan a Jehova:
‘Pakaskasi lay syudad a managpaagus na dala,+ say alatian a kaldero, ya agni nakalan na lati!
Sansakey mon ipaway so amin a tegteg;+ agmo pipilien no dinan so alaen mo.
7 Ta say dala na satan et walad dalem to;+ inkalbo to itan ed tapew na baleg a bato.
Agto itan inkalbo ed dalin pian natabonan na dabok.+
8 Pian nipatnag so sanok ko diad pangidapok na panamales,Inyan koy dala to ed tapew na masileng a baleg a batoPian ag-itan natabonan.’+
9 “Kanian oniay inkuan na Soberanon Katawan a Jehova:
‘Pakaskasi lay syudad a managpaagus na dala!+
Mangilusbo ak na dakel ya itutungo.
10 Buntonan mo na kiew tan parlangan mo,Lambong mon maong so karne, iyibung moy digo, tan paulyan mon natektek iray pukel.
11 Itapew mod ngalab so kaldero ya anggapoy karga pian ompetang itan,Pian say gansa a walad satan et ompetapetang.
Natunaw ed dalem na satan iray dutak,+ tan naandi so lati.
12 Makapaingongot tan makapabanal,Ta agnaekal so makapal a lati.+
Ibuntok mod apoy itan a latian a kaldero!’
13 “‘Arutakan ka lapud mabanday a kagagawam.+ Sinali ta kan linisan, balet agka nalinisan ed karutakan mo. Agka nalinisan anggad ag-onkepay sanok kod sika.+
14 Siak a mismo, si Jehova, so nansalita. Seguradon nagawa itan. Sano onkiwas ak et agko pugeran so inkasiak, agak manermen, tan agko pagbabawian.+ Ukomen da ka unong ed saray dalan mo tan saray pidedeneng mo,’ so imbaga na Soberanon Katawan a Jehova.”
15 Tan oniay mensahe nen Jehova a sinmabi lamet ed siak:
16 “Anak na too, alaen kod sika imay pinablim+ diad sakey labat a bakbak. Agka nepeg a manermen;* odino onakis odino onlua.
17 Agmo ipaparengel so pannangis mo, tan agmo gagawaen iray ritual ed panag-ermen parad inatey.+ Ibedber moy turbante ed ulom,+ tan isulong moy sandalyas mo.+ Agmo sasanibay balbas* mo,+ tan agmo kakanen so tinapay ya inter ed sika na arum.”*+
18 Insan diad kabuasan et nansalita ak ed saray totoo, tan diad labi et inatey so asawak. Kanian diad kaimbuasan et ginawak so niganggan ed siak.
19 Oniay ibabaga na totoo ed siak: “Agmo ta ibaga no antoy kabaliksan ed sikami na sarayan gagawaen mo?”
20 Oniay inyebat kod sikara: “Oniay inkuan nen Jehova ed siak,
21 ‘Ibagam ed sankaabungan na Israel: “Oniay inkuan na Soberanon Katawan a Jehova, ‘Maganok lan pabandayen so santuaryok,+ say sengegan na pampapasirayew yo, say bengatlan papablien yo tan pilalek na puso yo.* Saray ananak yon lalaki tan bibii a tinaynanan yo et ompatey ed espada.+
22 Insan gawaen yoy singa ginawa nen Ezequiel. Agyo saniban iray balbas yo tan agyo kanen so tinapay ya inter ed sikayo na arum.+
23 Niiyan ed ulo yo iray turbante yo tan nisulong ed sali yo iray sandalyas yo. Agkayo manermen odino onakis. Imbes, naderal kayo lapud saray kasalanan yo,+ tan manugaog kayo ed balang sakey.
24 Si Ezequiel so nagmaliw a tanda parad sikayo.+ Singa ginawa to, ontan met so gawaen yo. Sano nagawa itan, naamtaan yo a siak so Soberanon Katawan a Jehova.’”’”
25 “Tan sika, anak na too, diad agew ya ekalen kod sikara so panag-amotan da—say marakep a bengatlan panliliketan da, say bengatlan pinabli ra, say pilalek na puso* ra—pati saray ananak dan lalaki tan bibii,+
26 ibalita itan ed sika na sakey ya akatakas.+
27 Diad satan ya agew et biswaten moy sangim tan mansalita ka ed samay akatakas, tan agka la magmaliw ya emel.+ Magmaliw kan sakey a tanda ed sikara, tan naamtaan da a siak si Jehova.”
Paimanod leksab
^ Literal, “so ngaran na agew.”
^ Odino “panangiyaliling.”
^ Odino “kaldero a baleg so sangab to.”
^ Odino “Agmo nepeg a tapoken so pagew mo.”
^ Odino “bandad tagey a bibil.”
^ Literal, “so tinapay na saray totoo.”
^ Odino “tan aabageyen na kamarerwa yo.”
^ Odino “kamarerwa.”
