Ezequiel 29:1-21
29 Oniay mensahe nen Jehova a sinmabi ed siak diad komasamplon taon, ed koma-12 agew na komasamplon bulan:
2 “Anak na too, iyarap moy lupam ed Faraon ya ari na Ehipto, tan manpropesiya ka sumpad sikato tan interon Ehipto.+
3 Ibagam irayan salita: ‘Oniay inkuan na Soberanon Katawan a Jehova:
“Onsumpa ak ed sika, O Faraon ya ari na Ehipto,+Say baleg ya ayep ed dayat, ya akarukol ed saray kulos na Nilo* a kien to,+Sika ya angibagay, ‘Kayarian ko so Ilog Nilo.
Ginawak iya parad siak.’+
4 Balet mangiyan ak na saray taga ed pangam tan papeketen kod siksik mo iray sira a walad ilog mon Nilo.
Isakbit ta kad ilog mon Nilo ontan met ed amin a sira ed Nilo ya akapeket ed siksik mo.
5 Taynanan ta kad desierto, sika tan say amin a sira a walad ilog mon Nilo.
Nabaktar kad uma, tan anggapoy mangala odino mangiponpon ed bangkay mo.+
Ipakan ta kad saray atap ya ayayep ed dalin tan manomanok ed tawen.+
6 Insan naamtaan na amin a manaayam ed Ehipto a siak si Jehova,Lapud singa ra sakey a piraso na dayami* ya agmakatulong ed sankaabungan na Israel.+
7 Sanen binembenan da ka, abuyak ka,Tan apiley so takeb da lapud sika.
Sanen inusar da kan saklay, aputer ka,Tan pinagiwgiw moy sali* ra.”+
8 “‘Kanian oniay inkuan na Soberanon Katawan a Jehova: “Iyakar kod sika so sakey ya espada,+ tan pateyen ko ray totoom tan ayayep mo.
9 Say dalin na Ehipto et magmaliw ya aderal tan agla napanayaman a pasen;+ tan naamtaan da a siak si Jehova, lapud inkuan mo,* ‘Kayarian ko so Ilog Nilo; siak so nanggawa ed satan.’+
10 Kanian onsumpa ak ed sika tan say ilog mon Nilo, tan say dalin na Ehipto et pagmaliwen kon aderal tan amagaan, sakey a dalin ya agla napanayaman,+ manlapud Migdol+ anggad Siene+ ya anggad ketegan na Etiopia.
11 Anggapoy too odino ayep ya onggatin ditan,+ tan ag-itan panayaman ed loob na 40 taon.
12 Diad loob na 40 taon, say dalin na Ehipto et pagmaliwen kon lalon agnapanayaman nen saray dalin ya agpanaayaman, tan saray syudad to et lalon agnapanayaman nen saray syudad ya agpanaayaman;+ tan itaytayak ko iray Ehipsio ed saray nasyon tan dalin.”+
13 “‘Ta oniay inkuan na Soberanon Katawan a Jehova: “Kayari na 40 taon, tiponen ko iray Ehipsio manlapud saray totoo ya angitayakan ed sikara;+
14 ipawil ko ray inaripen ya Ehipsio ed dalin na Patros,+ diad dalin a nanlapuan da, tan diman et magmaliw iran abebbeban panarian.
15 Magmaliw ya abebbeba so Ehipto nen say arum a panarian tan agto la uleyan so arum a nasyon,+ tan paraiseten ko ran maong pian agda la napatulok so arum a nasyon.+
16 Sikatoy agla panmatalekan na sankaabungan na Israel,+ noagta mangipanonot labat iya ed kasalanan da diad inkerew day tulong ed saray Ehipsio. Tan naamtaan da a siak so Soberanon Katawan a Jehova.”’”
17 Oniay mensahe nen Jehova a sinmabi ed siak diad koma-27 a taon, ed unonan agew na unonan bulan:
18 “Anak na too, impansagpot a maong nen Arin Nabucodonosor*+ na Babilonia so armada to sumpad Tiro.+ Ayangyangan so kada ulo, tan naukisan so kada takeb. Balet anggapo lanlamang so agunggona to tan say armada to diad impansagpot tod Tiro.
19 “Kanian oniay inkuan na Soberanon Katawan a Jehova, ‘Iter kod si Arin Nabucodonosor* na Babilonia so dalin na Ehipto,+ tan alaen toy kayamanan na satan tan samsamen toy dakel a kayarian na satan; tan magmaliw itan a tumang parad armada to.’
20 “‘Iter kod sikato so dalin na Ehipto bilang bayar ed impansagpot to sumpad sikato,* lapud kinmiwas ira parad siak,’+ so imbaga na Soberanon Katawan a Jehova.
21 “Diad satan ya agew et patuboen koy sakey a saklor parad sankaabungan na Israel,*+ tan ikdan ta kay pankanawnawan mansalita ed limog da; tan naamtaan da a siak si Jehova.”
Paimanod leksab
^ Diad sayan bersikulo tan ontumbok iran bersikulo, say “Nilo” et manutukoy ed ilog tan saray irigasyon to.
^ Literal, “sakey a tanubong.”
^ Literal, “balangbang.”
^ Literal, “to.”
^ Literal, “Nabucodorosor,” sananey ya espeling.
^ Literal, “Nabucodorosor,” sananey ya espeling.
^ Salanti, sumpad Tiro.
^ Odino “ikdan ko na biskeg so sankaabungan na Israel.”
