Ezequiel 32:1-32
32 Tan diad koma-12 taon, ed unonan agew na koma-12 bulan et oniay mensahe nen Jehova a sinmabi lamet ed siak:
2 “Anak na too, mangansion kay sakey a tagleey* nipaakar ed Faraon ya ari na Ehipto tan ibagam ed sikato,‘Singa ka sakey a mabiskeg tan malangwer a leon na saray nasyon,Balet sinmabi lay anggaan mo.
Singa ka sakey a balbaleg ya ayep ed kadayatan,+ a kikimbogen mo iray ilog mo,Papapiteken moy danum ed panamegley na salim, tan dudutakan mo iray ilog da.’
3 Oniay inkuan na Soberanon Katawan a Jehova:
‘Ibuntok kod sika so iket ko ed panamegley na grupo na dakerakel a nasyon,Tan erelen da kad panamegley na iket ko.
4 Taynanan ta ka ed dalin;Ibasileng ta ka ed uma.
Panayamen kod sika so amin a manok ed tawen,Tan peselen ko iray atap ya ayayep diad interon dalin ed panamegley na laman mo.+
5 Ibantak kod kapalandeyan so laman moTan panoen ko na bangkay mo iray lawak.+
6 Delapen ko so dalin ed panamegley na mabalasubos a dalam ya anggad kapalandeyan,Tan panoen na satan iray kulos.*
7 ‘Tan sano naerep ka la, sakbongan koy tawen tan pabilungeten ko iray bitewen a wadtan.
Saniban ko na lurem so agew,Tan agla onsinag so bulan.+
8 Pabilungeten ko so amin a mangiiter na liwawa ed tawen lapud sika,Tan sakbongan ko na kabilungetan so dalin mo,’ so imbaga na Soberanon Katawan a Jehova.
9 ‘Gonigonen ko so kapusoan na dakel a totoo sano iyakar kod arum a nasyon iray totoom bilang ariripen,Diad saray dalin ya agmo amta.+
10 Pankelkelawen ko iray dakel a totoo,Tan onggiwgiw ed takot iray arari ra sano iwasiwas koy espadak ed arap da.
Onggiwgiw ira ed amin a panaon, ontakot so kada sakey lapud bilay to,Diad agew na kaderal mo.’
11 Ta oniay inkuan na Soberanon Katawan a Jehova:
‘Onsabi ed sika so espada na ari na Babilonia.+
12 Saray dakerakel a totoom et pateyen ko ed panamegley na saray espada na mabibiskeg a sundalo,Amin da et sankaruksaan ed saray nasyon.+
Deralen day ipapasirayew na Ehipto, tan naupot ya amin so dakerakel a totoo to.+
13 Deralen koy amin ya ayayep to a walad abay na dakel a danum to,+Tan ag-iratan napitek lapud anggapo lay onggatin a too odino ayep.’+
14 ‘Diad satan a panaon et palinewen ko iray danudanum da,Tan paagusen kon singa larak iray ilog na saratan,’ so imbaga na Soberanon Katawan a Jehova.
15 ‘Sano say Ehipto et pagmaliwen kon agla napanayaman, sakey a dalin ya amin a wadtan et naandi,+Sano pateyen koy amin a manaayam ditan,Naamtaan da a siak si Jehova.+
16 Sakey iyan kansion a tagleey, tan kansionen iya na totoo;Kansionen iya na bibiin ananak na saray nasyon.
Kansionen da iya lapud Ehipto tan amin a totoo to,’ so imbaga na Soberanon Katawan a Jehova.”
17 Insan diad koma-12 taon, ed koma-15 agew na bulan et oniay mensahe nen Jehova a sinmabi ed siak:
18 “Anak na too, akisan mo iray dakerakel a totoo na Ehipto tan sikatoy ilasur mo ed dalem na dalin, sikato tan saray bibiin ananak na saray mabiskeg a nasyon, a kaiba na saramay onlalasur ed abot.*
19 ‘Mas magana ka ta nen say siopaman? Onlasur ka, tan ondukol kan kaiba na saramay ag-asegat!’
20 “‘Kaiba ira ed saramay ompatey ed espada.+ Sikatoy niyawat lad espada; sikatoy igayugoy yo pati say dakerakel a totoo to.
21 “‘Manlapud kaaralman na Lubok* et mansalita ed sikato iray sankabiskegan a sundalo tan saray ontutulong ed sikato. Onlasur ira tan ondukol iran singa samay ag-asegat, a pinatey ed espada.
22 Wadman so Asirya tan say amin a totoo to. Saray ponponan da et walad kaliberliber to, amin da et pinatey ed espada.+
23 Saray ponponan to et niiyan ed kaaralman na abot,* tan say muyong to et akapaliber ed lubok to, pinatey iran amin ed espada, lapud sikaray sengegay takot diad dalin na saray mabilay.
24 “‘Wadman so Elam+ a kaibay amin a dakerakel a totoo to ya akapaliber ed lubok to, a pinatey iran amin ed espada. Linmasur iran ag-asegat diad dalem na dalin, saramay sengegay takot diad dalin na saray mabilay. Akoen da natan so kababaingan da a kaiba iramay onlalasur ed abot.*
25 Sikatoy imparukol dad kawalaan na saramay pinatey, a kaibay dakerakel a totoo to a walad paliber na saray ponponan to. Amin da et ag-asegat, pinatey ed espada, lapud sikaray sengegay takot diad dalin na saray mabilay; tan akoen day kababaingan da a kaiba iramay onlalasur ed abot.* Sikatoy niiyan lad kawalaan na saramay pinatey.
26 “‘Ditan so kawalaan na Mesec tan Tubal+ tan amin a dakerakel a totoo ra.* Saray ponponan da* et akapaliber ed sikato. Amin da et ag-asegat, aduyok na espada, lapud sikaray sengegan na takot ed dalin na saray mabilay.
27 Agta ondukol ira ed kawalaan na saray ag-asegat a mabibiskeg a sundalon inaatey la tan linmasur ed Lubok* ya awit da iray armas dad guerra? Tan iyan da iray espada ra ed silong na ulo ra,* tan saray kasalanan da ed tapew na saray pukel da, lapud sarayan mabibiskeg a sundalo so sengegay takot diad dalin na saray mabilay.
28 Balet sika, natemek ka a kaiba na saramay ag-asegat, tan ondukol kad kawalaan na saramay pinatey ed espada.
29 “‘Wadman so Edom,+ saray arari to tan amin a pangulo to, ya anggaman ed inkabiskeg da et niponpon ira a kaiba na saramay pinatey ed espada; ondukol met ira ed kawalaan na saramay ag-asegat+ tan saramay onlalasur ed abot.*
30 “‘Wadman so amin a prinsipe* ed amianen, kaiba na amin a taga Sidon,+ a linmasur ed kababaingan a kaiba iramay pinatey, anggaman ed takot a pinawala ra lapud inkabiskeg da. Sikaray ondukol ya ag-asegat a kaiba iramay pinatey ed espada tan akoen day kababaingan da a kaiba iramay onlalasur ed abot.*
31 “‘Nanengneng irayan amin na Faraon, tan sikatoy naligliwa lapud amin ya agawa ed dakerakel a totoo to;+ say Faraon tan say interon armada to et pateyen ed espada,’ so imbaga na Soberanon Katawan a Jehova.
32 “‘Lapud say Faraon so sengegan na takot diad dalin na saray mabilay, sikato tan amin a dakerakel a totoo to et nampainawa la a kaiba na saray ag-asegat, kaiba iramay pinatey ed espada,’ so imbaga na Soberanon Katawan a Jehova.”
Paimanod leksab
^ Odino “kansion parad paneermen.”
^ Literal, “Tan napano iray kulos lapud sika.”
^ Odino “lubok.”
^ Odino “lubok.”
^ Odino “lubok.”
^ Odino “lubok.”
^ Literal, “to.”
^ Literal, “to.”
^ Nayarin manutukoy ed saray sundalo a niponpon a kaiba so espada ra, a naikdan na kagalangan ed militar.
^ Odino “lubok.”
^ Odino “lider.”
^ Odino “lubok.”
