Ezequiel 34:1-31
34 Oniay mensahe nen Jehova a sinmabi lamet ed siak:
2 “Anak na too, manpropesiya ka sumpad saray managpastol na Israel. Manpropesiya ka, tan ibagam ed saray managpastol, ‘Oniay inkuan na Soberanon Katawan a Jehova: “Pakaskasi la iray managpastol na Israel,+ a papakanen day inkasikara! Agta say pulok so nepeg a pakanen na sarayan managpastol?+
3 Kakanen yo so taba, isusulong yoy kawes a gawad bagoy karnero, tan papakgeran yoy sankatabaan ya ayep,+ balet agyo papakanen so pulok.+
4 Agyo pinabiskeg iray makapuy odino pinaabig iray mansasakit odino binedberan iray apiley odino impawil iray nitaytayak odino inanap iray abalang;+ noagta inuleyan yo ra ed maruksa tan masebeg a paraan.+
5 Kanian nitaytayak ira lapud andian ira na managpastol;+ nitaytayak ira tan inaakan ira na amin ya atap ya ayep ed uma.
6 Saray karnerok et nanakar-akar ed amin a kapalandeyan tan atagey iran pukdol; nitaytayak iray karnerok diad interon dalin, ya anggapoy manaanap odino manggugunaet a manalmo ed sikara.
7 “‘“Kanian, sikayo ran managpastol, dengel yoy salita nen Jehova:
8 ‘“Unong a mabilay ak,” so imbaga na Soberanon Katawan a Jehova, “lapud saray karnerok et nagmaliw ya eerelen tan kakanen na amin ya atap ya ayep ed uma, ta andian ira na managpastol, tan saray karnerok et ag-inanap na saray managpastol ko, noagta papakanen day inkasikara tan agda pinakan iray karnerok,”’
9 kanian sikayo ran managpastol, dengel yoy salita nen Jehova.
10 Oniay inkuan na Soberanon Katawan a Jehova: ‘Onsumpa ak ed saray managpastol, tan singilen ko ra lapud saray karnerok,* tan ekalen ko ra bilang managpakan* na saray karnerok,+ tan agla pakanen na sarayan managpastol so inkasikara. Iliktar ko iray karnerok manlapud sangi ra, tan agla ra magmaliw a kakanen da.’”
11 “‘Ta oniay inkuan na Soberanon Katawan a Jehova: “Siak a mismo so mananap ed saray karnerok, tan siak so mangasikaso ed sikara.+
12 Asikasoen ko iray karnerok a singa sakey a managpastol ya aromog to la iray nitaytayak a karnero to tan papakanen to ra.+ Diad agew na saray lurem tan makapal a bilunget et iliktar ko ra ed amin a pasen a nitayakan da.+
13 Ipaway ko ra ed saray totoo tan tiponen ko ra manlapud saray dalin tan iyakar ko rad dalin da tan pakanen ko ra ed saray kapalandeyan na Israel,+ diad abay na saray kulos tan amin a pasen a panaayaman ed dalin.
14 Pakanen ko rad maabig a panagpastolan, tan diad atagey iran kapalandeyan na Israel so pankabkaban da.+ Ondukol ira ditan ed maabig a dalin a panagkabkaban,+ tan mangan ira ed maabig a panagpastolan diad kapalandeyan na Israel.”
15 “‘“Siak a mismo so mamakan ed saray karnerok,+ tan siak a mismo so mamarukol ed sikara,”+ so imbaga na Soberanon Katawan a Jehova.
16 “Anapen ko iramay nababalang,+ tiponen ko iramay niyarawi, bedberan ko iramay apiley, tan pabiskegen ko iramay makapuy; balet deralen ko iramay matataba tan mabibiskeg. Panangukom so ipakan kod sikara.”
17 “‘Balet sikayo ran karnerok, oniay inkuan na Soberanon Katawan a Jehova: “Magano ak lan mangukom ed baetan na saray karnero, tan ed baetan na saray kalakian a karnero tan saray kalakian a kanding.+
18 Agni kasi magenap ed sikayo so mangan diad sankaabigan iran panagpastolan? Nepeg yo ni kasin gatin-gatinan iray arum nin panagpastolan yo? Tan kayari yon inumen so malinlinew a danum, kasin dutakan yoy danum diad pangigatin-gatin yo?
19 Nepeg kasin pakanen iray karnerok diad panagpastolan a ginatin-gatinan yo tan painumen ira na danum ya adutakan lapud impangigatin-gatin yo?”
20 “‘Kanian oniay inkuan na Soberanon Katawan a Jehova ed sikara: “Siak a mismo so mangukom ed baetan na mataban karnero tan mabeng a karnero,
21 ta itutulak yo so amin a mansasakit ed panamegley na diking tan takeb yo, tan bubunoen yo ra ed panamegley na saklor yo anggad nitaytayak yo ra ed arum a nasyon.
22 Tan iliktar ko iray karnerok, tan agla ra magmaliw a biktima;+ tan mangukom ak ed baetan na saray karnero.
23 Patalindegen kod sikara so sakey a managpastol,+ say lingkor kon si David,+ tan pakanen to ra. Sikaton mismo so mamakan ed sikara tan sikatoy magmaliw a managpastol da.+
24 Tan siak, si Jehova, so magmaliw a Dios da,+ tan say lingkor kon si David so magmaliw a pangulo ed limog da.+ Siak a mismo, si Jehova, so nansalita.
25 “‘“Tan misipanan ak ed sikara nipaakar ed sakey a sipanan na kareenan,+ tan paandien kod dalin iray masesebeg ya atap ya ayep,+ pian maligen iran makapanayam diad kalawakan tan makaugip ira ed katakelan.+
26 Sikara tan say kaliberliber na pukdol ko et pagmaliwen kon sakey a bendisyon,+ tan papelagen koy uran ed dugan panaon to. Onuran na bendisyon.+
27 Saray kiew ed uma et manbunga, tan say dalin et mamawalay ani,+ tan maligen iran manayam ed dalin. Tan naamtaan da a siak si Jehova sano puteren ko iray pako ra+ tan iliktar ko ra ed saramay mangaaripen ed sikara.
28 Agla ra anamoten na saray nasyon, tan agla ra akmonen na saray atap ya ayep ed dalin, tan manayam ira ed kaligenan, ya anggapoy manaktakot ed sikara.+
29 “‘“Mamawala ak parad sikara na sakey a taneman a bantog,* tan agla ra ompatey lapud eras diad dalin,+ tan agla ra balbalawen na saray nasyon.+
30 ‘Insan naamtaan da a siak, si Jehova a Dios da, et wala ak ed sikara tan sikara so totook, say sankaabungan na Israel,’+ so imbaga na Soberanon Katawan a Jehova.”’
31 “‘Tan sikayo ran karnerok,+ saray karneron aasikasoen ko, totoo kayo labat, tan siak so Dios yo,’ so imbaga na Soberanon Katawan a Jehova.”
Paimanod leksab
^ Odino “bawien kod lima da iray karnerok.”
^ Odino “manag-asikaso.”
^ Literal, “parad sakey a ngaran.”
