Ezequiel 41:1-26
41 Insan inyakar to ak ed paway a santuaryo,* tan sinukat to iray lusek ed gilig, say sakey et walad kawigi tan say sakey et walad kawanan, anemiran kasiko* so kalapar na kada sakey a lusek.
2 Say kalapar na lolooban et samploran kasiko, tan saray padir ed gilig* na lolooban et limaran kasiko ed sakey a pagpag tan limaran kasiko ed sananey a pagpag. Sinukat to so karukey na satan, 40 kasiko, tan say kalapar na satan et 20 kasiko.
3 Insan sikatoy linmad loob* tan sinukat toy lusek ed gilig na lolooban, duaran kasiko so kakapal na satan, tan say kalapar na lolooban et anemiran kasiko. Saray padir ed gilig na lolooban et* pitoran kasiko.
4 Insan sinukat toy kuarto ya akaarap ed paway a santuaryo, tan 20 kasiko itan ed karukey tan 20 kasiko ed kalapar.+ Tan imbaga tod siak: “Saya so Sankasantosan.”+
5 Insan sinukat toy padir na templo, tan anemiran kasiko so kakapal na satan. Say kalapar na saray kuarto ed gilig ya akapaliber ed templo et apatiran kasiko.+
6 Saray kuarto ed gilig et taloran grado ed katagey, a nantatapewan iratan, tan walay 30 kuarto ed kada grado. Wala ray kapa-kapa ed paliber na padir na templo a pansuporta ed saray kuarto ed gilig, kanian ag-iratan akapeket ed padir na templo.+
7 Diad kada pagpag na templo et walay kinmurban dalanan* a paawang no onsegep so sakey diad saray kuarto ed tagey.+ Paawang iray kuarto diad kada grado manlapud sankaabebaan ya anggad sankatageyan a grado diad idalan ed pegley a grado.
8 Anengneng kon walay niyatagey ya entablado ed interon templo, tan say sukat na saray pundasyon na saray kuarto ed gilig ya anggad suyok et sakey a tanubong ya anemiran kasiko ed karukey.
9 Say kalapar na padir diad bandad paway na saray kuarto ed gilig et limaran kasiko. Walay bakantin espasyo* ed abay na saray kuarto a kabiangan na templo.
10 Diad nanleetan na templo tan saray kuarton pananganan*+ et walay espasyo a 20 kasiko so kalapar to ed kada pagpag.
11 Walay lolooban diad nanleetan na saray kuarto ed gilig tan say bakantin espasyo ed amianen tan sakey nin lolooban diad abalaten. Say kalapar na bakantin espasyo et limaran kasiko ed paliber.
12 Say paalagey a walad bandad sagur ya akaarap ed bakantin espasyo et 70 kasiko ed kalapar tan 90 kasiko ed karukey; say padir ed paliber na paalagey et limaran kasiko ed kakapal.
13 Sinukat toy templo, tan 100 a kasiko itan ed karukey. Say bakantin espasyo, say paalagey,* tan saray padir na satan et 100 a kasiko met ed karukey.
14 Say kalapar na arap na templo ed bandad bukig tan say bakantin espasyo et 100 a kasiko.
15 Sinukat toy karukey na paalagey ya akaarap ed bakantin espasyo ed beneg, pati saray balkonahe na paalagey ed nantupag a pagpag, tan 100 a kasiko itan.
Sinukat to met so paway a santuaryo, say loob a santuaryo,+ tan saray balkonahe ed sular,
16 ontan met ed saray entrada na puerta, saray bintana a saray hamba ra et pamelag manlapud loob,+ tan saray balkonahe a walad saratan a taloran pasen. Diad abay na entrada na puerta et wala ray nipalkap a tabla+ manlapud datal ya anggad saray bintana; tan saray bintana et asakoban.
17 Asukat so tagey na lolooban, diad loob na templo tan diad paway tan ed interon akapaliber a padir.
18 Wala ray kerubin+ tan kiew a palma a niyukit ed satan,+ a diad baetan na kada duaran kerubin et walay sakey a kiew a palma, tan kada kerubin et walaay duaran lupa.
19 Say lupay too et akaarap ed kiew a palma ed sakey a diking, tan say lupay leon* et akaarap ed kiew a palma ed sananey a diking.+ Niyukit iratan ed onian paraan diad interon templo.
20 Manlapud datal ya anggad tagey na lolooban et wala ray niyukit a kerubin tan kiew a palma diad padir na santuaryo.
21 Kuadrado iray lusek na puerta* na santuaryo.+ Diad arap na masanton pasen* et walay singa
22 altar a gawad kiew+ a taloran kasiko ed katagey tan duaran kasiko ed karukey. Walaan itan na saray poste ed suyok, tan say leksab* to tan saray gilig to et gawad kiew. Insan inkuan tod siak: “Saya so lamisaan a walad arapan nen Jehova.”+
23 Say paway a santuaryo tan say masanton pasen et walaan na duaran puerta.+
24 Sarayan puerta et walaan na duaran napeyes a kapot, duara ed kada puerta.
25 Wala ray niyukit a kerubin tan kiew a palma ed saray puerta na santuaryo, a singa saramay walad padir.+ Wala met so tarong a gawa ed kiew diad arap na balkonahe ed paway.
26 Wala met iray bintana a saray hamba ra et pamelag manlapud loob+ tan saray niyukit a kiew a palma diad nantupag a diking na balkonahe, ontan met ed saray kuarto ed gilig na templo tan ed saray tarong.
Paimanod leksab
^ Literal, “ed templo.” Diad kapitulo 41 tan 42, sayan balikas et manutukoy ed paway a santuaryo (Masanto) odino say interon santuaryo (say templo a kaiba la so Masanto tan Sankasantosan).
^ Tutukoyen na saya so andukey a kasiko. Nengnengen so Apendise B14.
^ Literal, “saray gilig.”
^ Salanti, diad santuaryo ed loob, odino Sankasantosan.
^ Literal, “Say kalapar na lolooban et.”
^ Mapatnag a manutukoy ed saray palimpek a takayan.
^ Mapatnag a manutukoy ed mainget a dalanan diad paliber na templo.
^ Odino “saray kuarto.”
^ Salanti, say paalagey ed sagur na santuaryo.
^ Odino “mabiskeg tan malangwer a leon.”
^ Literal, “so lusek na puerta.” Mapatnag a manutukoy iya ed lolooban ya ompugta ed Masanto.
^ Mapatnag a manutukoy ed Sankasantosan.
^ Literal, “karukey.”
