Ezequiel 46:1-24
46 “Oniay inkuan na Soberanon Katawan a Jehova: ‘Say puerta diad loob a sular ya akaarap ed bukig+ et nepeg ya akakapot+ ed loob na anemiran agew a panagkimey,+ balet nepeg a lukasan itan diad agew na Sabaton tan diad agew na balon bulan.
2 Manlapud paway et onloob so pangulo diad dalan ed balkonahe na puerta,+ tan sikatoy onalagey ed abay na lusek ed puerta. Iyapay na saray saserdote so interon apay ton popoolan tan saray bagat ton pandurungoan, tan sikatoy ondakmomo diad entrada na puerta, insan sikatoy ompaway. Balet agnepeg ya ikapot so puerta anggad labi.
3 Saray totoo ed sayan dalin et ondakmomo met ed arapan nen Jehova diad satan a puerta legan na saray Sabaton tan saray balon bulan.+
4 “‘Say interon apay a popoolan a nepeg ya iyapay na pangulo ed si Jehova diad agew na Sabaton et anemiran andiay depekton kalakian a kordero tan sakey ya andiay depekton kalakian a karnero.+
5 Say apay a kakanen et sakey efa* parad kalakian a karnero tan antokaman a sarag ton iter parad saray kalakian a kordero, tan sakey hin* a larak ed kada efa.+
6 Diad agew na balon bulan, say apay et sakey ya andiay depekton kilaw a kalakian a baka ed pulok, anemiran kalakian a kordero, tan sakey a kalakian a karnero; nepeg ya andiay depekto iratan.+
7 Say nepeg ton iyapay bilang apay a kakanen et sakey efa parad kilaw a kalakian a baka, sakey efa parad kalakian a karnero, tan antokaman a nasarag to parad saray kalakian a kordero. Tan sikatoy mangiyapay na sakey hin a larak ed kada efa.
8 “‘Sano onloob so pangulo, sikatoy ondalan ed balkonahe na puerta, tan ditan met so pawayan to.+
9 Tan sano saray totoo ed sayan dalin et onloob a mandayew diad arapan nen Jehova legan na saray piesta,+ saramay onloob ed puerta diad amianen+ et nepeg ya ompaway ed puerta diad abalaten,+ tan saramay onloob ed puerta diad abalaten et nepeg ya ompaway ed puerta diad amianen. Anggapoy nepeg ya ompawil ed puerta a nilooban to, ta nepeg iran ompaway diad puerta a walad petek da.
10 Nipaakar ed pangulo a walad limog da, sikatoy nepeg ya onloob sano onloob ira, tan sikatoy nepeg ya ompaway sano ompaway ira.
11 Legan na saray piesta tan saray panaon na piesta, nepeg a say apay a kakanen et sakey efa parad kilaw a kalakian a baka, sakey efa parad kalakian a karnero, tan antokaman a sarag ton iter parad saray kalakian a kordero, tan sakey hin a larak ed kada efa.+
12 “‘No say pangulo et mangitarya na interon apay a popoolan+ odino saray bagat a pandurungoan bilang boluntaryon apay parad si Jehova, nepeg ya ilukas parad sikato so puertan akaarap ed bukig, tan itarya to so interon apay ton popoolan tan saray bagat ton pandurungoan a singa gagawaen to diad agew na Sabaton.+ Kapaway to, nepeg ya ikapot so puerta.+
13 “‘Diad kada agew et nepeg kan mangitarya na andiay depekton kalakian a kordero a mantaon na sakey, bilang interon apay a popoolan parad si Jehova.+ Gawam iya a kinabuasan.
14 Kaiba na satan et nepeg mon itarya a kinabuasan so kakanem na efa bilang apay a kakanen, tan kakatlo na hin a larak ya iwalsik ed pinon arina bilang regular ya apay a kakanen parad si Jehova. Saya so manbayag a ganggan.
15 Kinabuasan dan itarya so kalakian a kordero, apay a kakanen, tan larak bilang say regular ya interon apay a popoolan.’
16 “Oniay inkuan na Soberanon Katawan a Jehova: ‘No say pangulo et mangiter na regalo ya ipatawir tod kada sakey ed saray anak ton lalaki, magmaliw itan a kayarian na saray anak ton lalaki. Satan so kayarian ya impatawir ed sikara.
17 Balet no ikdan toy regalo so sakey ed saray aripen to manlapud tawir to, nakayarian itan na aripen anggad taon na panangibulos;+ insan itan nipawil ed pangulo. Say tawir labat na ananak to so magmaliw a permanentin kayarian da.
18 Agnepeg ya alaen na pangulo so antokaman a tawir na totoo diad pamataynan ed sikara diad dalin da. Say iter ton tawir ed saray ananak to et manlapud mismon kayarian to, pian anggapo ed saray totook so napataynan ed dalin to.’”
19 Insan inyakar to ak ed lolooban+ a walad abay na puertan mamaarap ed saray masanton kuarto a pananganan* na saray saserdote, a saratan et akaarap ed amianen,+ tan anengneng ko ditan so sakey a pasen diad beneg ed bandad sagur.
20 Inkuan tod siak: “Saya so pasen a panlambongan na saray saserdote ed apay parad impakasumlang tan apay parad kasalanan, tan panlutoan day apay a kakanen,+ pian anggapoy awiten dad paway a sular tan agda niyalis so kasantosan ed* totoo.”+
21 Inyakar to ak diad paway a sular tan indalan to ak diad apatiran suyok na sular, tan akanengneng ak na sakey a sular diad kada suyok na paway a sular.
22 Diad apatiran suyok na sular et wala ray angkekelag a sular, 40 kasiko* ed karukey tan 30 kasiko ed kalapar. Nampaparay kabaleg na sarayan apat.*
23 Wala ray tambib* ed paliber na sarayan apat, tan diad leksab na sarayan tambib et nanggawa ra na saray pasen a panlambongan na saray apay.
24 Insan inkuan tod siak: “Sarayan pasen so panlalambongan na saray manlilingkor ed templo ed bagat na saray totoo.”+
Paimanod leksab
^ Nengnengen so Apendise B14.
^ Nengnengen so Apendise B14.
^ Odino “saray masanton kuarto.”
^ Literal, “agda napasantoy.”
^ Tutukoyen na saya so andukey a kasiko. Nengnengen so Apendise B14.
^ Odino “Nampaparay kabaleg na sarayan apat tan say inkagawa ra ed saray suyok.”
^ Odino “dasig.”
