Ed si Filemon 1:1-25
1 Siak, si Pablo, a nipriso+ nisengeg ed si Kristo Jesus, kaibak si Timoteo+ ya agi tayo, et nansulat ak ed sika Filemon ya inad-aro min kakimeyan,
2 tan ed si Apia ya agi tayon bii, tan ed si Arquipo+ a kapara tayon sundalo, tan ed kongregasyon a walad abung mo:+
3 Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo.
4 Naynay ak a misasalamat ed Dios ko sano bibitlaen ta ka ed saray pikakasik,+
5 lapud narerengelan ko so nipaakar ed pananisiam tan panangarom ed Katawan a Jesus tan ed amin a masanto.
6 Ipipikasik a say pananisian walad sika tan ed arum so mamakiwas ed sikan bidbiren so amin a maabig a bengatlan inawat tayo diad panamegley nen Kristo.
7 Ta aliketan ak tan aligliwa ak a maong lapud arengelan koy panangarom, ta diad panamegley mo, agi, et linmigsa so kapusoan na saray masanto.
8 Lapud saya, anggano bulobulos ak a mansalita nipaakar ed Kristo ya iganggan kan gawaen no antoy manepeg,
9 mas pilien koy mikasi ed sika base ed aro, lapud amtam met la a siak, si Pablo, et masiken ak la tan natan et nipriso ak nisengeg ed si Kristo Jesus.
10 Mikakasi ak ed sika parad si Onesimo+ ya ana’ko, a singa to ak ama+ legan ak a walad prisoan.*
11 Nensaman et anggapoy kana to ed sika balet natan et makana la ed sika tan ed siak.
12 Sikato, on, sayan inad-arok et papawilen ko lad sika.
13 Agko ni labay komon a paalisen pian anggano anggapo ka dia et sikatoy makapanlingkor ed siak legan ya akapriso ak nisengeg ed maong a balita.+
14 Balet no agmo iyabuloy et agko labay so manggawa na antokaman, pian say panggawam na maong et aliwan lapud apilitan ka labat, noagta lapud labay mon gawaen itan.+
15 Ompan sayan talaga so rason no akin a sikatoy tinmaynan ya agano,* pian sano ompawil ed sika et lawas mo lan nakaiba,
16 ya aliwa lan sakey ya aripen+ noagta mas maabig ni nen say aripen, sakey ya agin inad-aro,+ lalo la ed siak, ingen ta nagkalalo ni ed sika, ta sikatoy aripen mo tan agim ed Katawan.
17 Kanian no ipapasen mo ak a kaaro, sikatoy awat mo a singa ed pangawat mod siak.
18 Ontan met, no wala man so mauges a ginawa tod sika odino walay utang tod sika, siak lay paningilan mo.
19 Siak, si Pablo, so angisulat ed saya: Bayaran ko itan—agko met la kaukolan ya ibagan utang mod siak so bilay mo.
20 On, agi, komon ta naawat ko yan tulong manlapud sika nisengeg ed Katawan; paligsam so pusok nisengeg ed Kristo.
21 Matalek ak a gawaen mo ’ya, kanian nansulat ak ed sika, ta amtak a mas nagkalalo ni so gawaen mo nen saray imbagak.
22 Balet niarum nid satan, mangiparaan ka met komon na pampundoan ko, ta maniilalo ak a diad panamegley na saray pikakasi yo et makapawil ak ed sikayo.*+
23 Manpapakumusta ed sika si Epafras,+ a kaparak a priso nisengeg ed si Kristo Jesus,
24 ontan met iray kakimeyan ko a sikara di Marcos, Aristarco,+ Demas,+ tan Lucas.+
25 Niwala komon so agnaparaan a kaabigan na Katawan tayon Jesu-Kristo ed espiritun ipapatnag yo.
Paimanod leksab
^ Literal, “ya abalor.”
^ Literal, “a sakey oras.”
^ Odino “nibulos ak parad sikayo.”
