Saray Gawa na Saray Apostol 17:1-34
17 Natan et nambiahe ra a dinmalan ed Amfipolis tan Apolonia tan akasabi rad Tesalonica,+ a diman et walay sinagoga na saray Judio.
2 Kanian unong a niyugali la nen Pablo+ et sikatoy linmoob diman, tan diad taloran nantutumbokan a sabaton et sikatoy akikatunongan ed sikara manlapud Kasulatan,+
3 ya impaliwawa tan pinaneknekan tod panamegley na saray sulsulat a say Kristo et kaukolan a manirap+ tan onoli manlapud inaatey,+ ya inkuan to: “Saya so Kristo, sayan Jesus ya ipupulong kod sikayo.”
4 Lapud saya et nagmaliw a mananisia so arum ed sikara tan akila rad si Pablo tan Silas,+ tan ontan met so ginawa na dakerakel a Griego a mandadayew ed Dios, a kaiba so dakel a maimpluensyan bibii.
5 Balet lapud angimon iray Judio,+ tinipon da so pigaran mauges a lalaki ya akar-akar labat ed tindaan, tan anugyop ira na sakey a grupo tan ginulo ray syudad. Nilooban day abung nen Jason tan inanap day Pablo tan Silas pian awiten da rad saray magulon totoo.
6 Sanen agda ra aromog, inggayugoy day Jason tan say pigaran agagi pian awiten da rad saray manuley na syudad, ya iyeeyag da: “Wadia la iramay lalakin manggugulo ed mundo,+
7 tan sayan Jason so amarawes ed sikara. Susumpaen na sarayan amin a totoo iray ganggan na Cesar, ya ibabaga ran walay sananey ya ari, si Jesus.”+
8 Agulo iray totoo tan saray manuley na syudad sanen nadngel da iraya;
9 tan sanen akala la ray magenap a garantiya* ed si Jason tan ed arum ni ra, imbulos da ra.
10 Diad saman a labi et tampol ya imbaki na saray agagi si Pablo tan Silas diad Berea. Kasabi ra et linmoob irad sinagoga na saray Judio.
11 Magmaong so kanonotan na saray Judio ed Berea nen saramay walad Tesalonica, ta akaparaan a maong so nonot dan angawat ed salita, a maalwar dan uusisaen so Kasulatan ya inagew-agew pian naseguro da no kasin tua iray nadngel da.
12 Kanian dakel ed sikara so nagmaliw a mananisia, ontan met ed dakel a gagalangen a Griegon bibii tan pigaran lalaki.
13 Balet sanen akabatan na saray Judio ed Tesalonica a say salita na Dios et inyabawag met nen Pablo diad Berea, linma ra met diman pian sugsogan tan guloen iray totoo.+
14 Diad saman et tampol a pinaonla na saray agagi si Pablo anggad baybay,+ balet tinmilak ni si Silas tan si Timoteo.
15 Balet saramay angipatnubang ed si Pablo et akila ya anggad Atenas, tan kayari to ran binilin a patumboken da lan tampol ed sikato si Silas tan Timoteo,+ sinmipot la ra.
16 Natan legan ya aalagaren ira nen Pablo diad Atenas, sikatoy naalipanesan diad impakanengneng tod syudad a napno na saray idolo.
17 Kanian sikatoy akikatunongan ed saray Judio tan ed arum nin totoo a mandadayew ed Dios diad sinagoga tan diad saramay inagew-agew a nababanaan tod tindaan.
18 Balet akisuppiatan ed sikato so pigara ed saray pilosopon Epicureo tan Estoico, tan ibabaga na arum: “Antoy ibabaga na sayan malabir?” Say imbaga na arum: “Sikatoy singa sakey a managpulong na agkabat iran dirios.” Imbaga da iya ta iyaabawag toy maong a balita nipaakar ed si Jesus tan say kioli.+
19 Kanian sikatoy inerel da tan inyakar dad Areopago,* ya inkuan da: “Ibagam pad sikami no anto iyan balon bangat a sasalitaen mo?
20 Ta wala ray ibabagam a duma ed pakadngel mi, tan labay min naamtaan no antoy kabaliksan na saraya.”
21 Diad tua, amin a taga Atenas tan saray dayon manaayam* diman et anggapoy arum a panguusaran day libren panaon da noag say pangibaga odino pandengel na balon bengatla.
22 Inmalagey natan si Pablo ed pegley na Areopago+ tan inkuan to:
“Lalakin taga Atenas, nanenengneng kod amin a gagawaen yo a mas matakot kayo ed saray dirios* nen say arum.+
23 Singa bilang, legan ya ondadalan ak tan iimanoen kon maong iray dadayewen yo, anengneng koy sakey ya altar a walay akasulat ‘Parad Sakey a Dios ya Agkabat.’ Kanian samay agyo kabat a dadayewen yo, saya so ipupulong kod sikayo.
24 Say Dios a nanggawa na mundo tan amin a bengatlan wadia, say Katawan na tawen tan dalin,+ et agmanaayam ed saray templo a ginawa na lima;+
25 tan agto met nakaukolan a sikatoy panserbian na totoo a singano walay nakaukolan to,+ lapud sikaton mismo so mangiiter ed amin a totoo na bilay tan linawa+ tan amin a bengatla.
26 Tan manlapud sakey a too+ et ginawa toy amin a nasyon na totoo pian manayam diad interon dalin,+ tan inggeter to iray aturon panaon tan saray ketegan na panayaman na totoo,+
27 pian anapen day Dios. Ta sikatoy naromog da no sikatoy pansagpotan dan anapen.+ Diad tua et sikatoy ag-arawi ed balang sakey ed sikatayo.
28 Ta lapud sikato et walay bilay tayo tan onggagalaw itayo tan wala itayo, a singa imbaga na arum ed saray manag-anlong ed limog yo, ‘Ta ananak to itayon amin.’
29 “Kanian lapud ananak itayo na Dios,+ agtayo nepeg ya isipen a say Dios et singa balitok odino pilak odino bato, singa sakey a bengatlan inukit lapud dunong tan desinyo na too.+
30 Tua ya inabuloyan na Dios ya onlabas iray panaon a saray totoo et anggapoy amta rad sikato;+ balet iyaabawag tod amin a totoo natan ed inerman a pasen a nepeg day magbabawi.
31 Ta inggeter to so sakey ya agew pian ukomen+ toy mundo diad patas a paraan ed panamegley na toon tinuro to, tan sikatoy angiter na garantiya ed amin a totoo diad impamaoli tod sikato manlapud inaatey.”+
32 Natan sanen nadngel da so nipaakar ed kioli na saray inaatey, sikatoy binalaw na arum,+ balet imbaga na arum: “Dengelen mi ka lamet ed saya diad arum a pankanawnawa.”
33 Kanian tinaynan la ra nen Pablo,
34 balet akilad sikato so pigaran lalaki tan nagmaliw iran mananisia. Kaiba ra met si Dionisio, a huis ed korte na Areopago, tan sakey a biin manngaray Damaris, tan arum ni ra.
Paimanod leksab
^ Odino “akala la ray piyansa.”
^ Sakey a pukdol diad Atenas nensaman, a pantitiponan met na atagey a korte.
^ Odino “ombibisita.”
^ Odino “mas relihyoso kayo.”
