Genesis 13:1-18
13 Insan tinaynan nen Abram so Ehipto tan linmad Negeb,+ sikato tan say asawa to tan amin a kayarian to, tan kaiba toy Lot.
2 Walaan si Abram na dakerakel ya ayayep, pilak, tan balitok.+
3 Sikatoy nankampo ed nanduruman pasen sanen sikatoy nambiahe manlapud Negeb ya anggad Bethel, anggad akasabi ed samay pasen ya angipaalageyan toy tolda to ed baetan na Bethel tan Ai,+
4 diad pasen a datin nanggawaan toy altar. Diman et tinmawag si Abram ed ngaran nen Jehova.
5 Natan si Lot, a kaiba nen Abram ed pambiabiahe, so walaan met na saray karnero, baka, tan saray tolda.
6 Kanian agla ra makapanayam ya amin ed saksakey a pasen; dinmakel a maong iray kaykayarian da kanian agla ra nayarin manayam a sankakaiba.
7 Lapud saya et nankokolkol iray managkomponi na ayayep nen Abram tan managkomponi na ayayep nen Lot. (Diad saman a panaon, saray Canaanita tan Perizeo et manaayam ed satan a dalin.)+
8 Kanian inkuan nen Abram ed si Lot:+ “Ipangasim, agta komon mankokolkol, tan saray totook tan totoom, ta sanaagi itayo.
9 Agta walad arapan mo so interon dalin? Ipangasim, ombiig ka ed siak. No onla kad kawigi, onla ak met ed kawanan; balet no onla kad kawanan, onla ak met ed kawigi.”
10 Kanian tinmangwa si Lot tan anengneng ton say interon distrito na Jordan+ ya anggad Zoar+ et sakey a pasen a nasasalog a maong (antis a dineral nen Jehova so Sodoma tan Gomorra), a singa say hardin nen Jehova+ tan singa say dalin na Ehipto.
11 Insan pinili nen Lot so interon distrito na Jordan, tan inyalis nen Lot ed bukig so kampo to. Kanian nansian iran dua.
12 Nanayam si Abram ed dalin na Canaan, balet nanayam si Lot diad kawalaan na saray syudad ed distrito.+ Diad saman et sikatoy angipaalagey na tolda ya asingger ed Sodoma.
13 Natan, saray lalaki ed Sodoma et mauges tan grabe so pankakasalanan da ed si Jehova.+
14 Inkuan nen Jehova ed si Abram, kayarin sinmian si Lot ed sikato: “Tangwa ka, ipangasim, tan diad kawalaan mo et nengneng ka ed amianen tan abalaten, bukig tan sagur,
15 lapud say interon dalin a nanenengneng mo et iter kod sika tan ed ilalak mo* bilang sakey a permanentin kayarian.+
16 Tan pagmaliwen kon singa karakel na dabok na dalin so ilalak mo,* a no walay siopaman a makayarin mamilang ed dabok na dalin et nabilang met sirin so ilalak mo.*+
17 Alagey ka, liber moy dalin diad interon karukey tan kaawang na satan, ta sika so pangiteran ko ed satan.”
18 Kanian nanayam si Abram ed saray tolda. Diad saginonor et sikatoy nanayam ed kawalaan na angkakabaleg iran kiew ed Mamre,+ a walad Hebron,+ tan sikatoy nanggaway altar diman parad si Jehova.+
