Genesis 42:1-38
42 Sanen naamtaan nen Jacob a walay ilik ed Ehipto,+ inkuan tod saray ananak to: “Akin et mannenengnengan kayo labat?”
2 Inkuan to ni: “Nadngelan kon walay ilik ed Ehipto. La kayo diman tan mangaliw kayoy daiset parad sikatayo, pian manbilay tayo ni tan agtayo ompatey.”+
3 Kanian linmad Ehipto so samploran agagi nen Jose+ pian mangaliw na ilik.
4 Balet ag-inabuloyan nen Jacob si Benjamin+ ya agi nen Jose a mila ed arum ya agagi to, ta inkuan ton: “Ompan walay nagawan mauges ed sikato.”+
5 Kanian akiulop iray ananak nen Israel ed saray arum ya oonlan mangaliw, lapud akasabi lay eras diad dalin na Canaan.+
6 Si Jose so walaan na pakauley diad dalin na Ehipto,+ tan sikato so manlalako na ilik ed amin a totoo ed dalin.+ Kanian linmad si Jose iray agagi to tan dinmakmomo ra ed sikato diad dalin.+
7 Sanen anengneng nen Jose iray agagi to, abidbir to ran tampol, balet agto nampabidbir ed sikara.+ Kanian sikatoy masebeg a nansalita ed sikara tan inkuan to: “Iner so nanlapuan yo?” a diad saya et inkuan da: “Nanlapu kami ed dalin na Canaan pian mangaliw na naakan.”+
8 Kanian abidbir nen Jose iray agagi to, balet sikatoy agda abidbir.
9 Tampol ya anonotan nen Jose iray akugip to nipaakar ed sikara,+ tan inkuan tod sikara: “Espiya kayo! Linma kayo dia pian nengnengen yo so mainomay a lusoben iran pasen* na dalin!”
10 Insan inkuan da ed sikato: “Andi, katawan ko, linma dia iray lingkor mo pian mangaliw na naakan.
11 Amin mi et saksakey so ama mi. Matunong kamin totoo. Aliwan espiya iray lingkor mo.”
12 Balet inkuan tod sikara: “Andi! Linma kayo dia pian nengnengen yo iray pasen na dalin a mainomay a lusoben!”
13 Diad saman et inkuan da: “Saray lingkor mo et 12 lalaki a sanaagi.+ Saksakey so ama mi+ a walad dalin na Canaan, tan say sankayugtanan et kaiba natan nen ama mi,+ balet anggapo la imay sakey.”+
14 Ingen ta inkuan nen Jose ed sikara: “Singa imbagak lad sikayo—‘Espiya kayo!’
15 Saya so panubokan ed sikayo: Unong a mabilay so Faraon, agkayo makaalis ed sayan pasen anggad ag-onla dia so sankayugtanan ya agi yo.+
16 Ibaki yo so sakey ed sikayo pian awiten to dia so agi yo legan ya abalor kayo. Diad onian paraan et nasubok iray salita yo no kasin tua so ibabaga yo. Tan no andi, unong a mabilay so Faraon, espiya kayo.”
17 Diad saman et taloy agew to ran inkulong a sankakaiba.
18 Inkuan nen Jose ed sikara diad komatlon agew: “Gawa yo iya tan manbilay kayo, lapud tatakotan ko so Dios.
19 No matunong kayo, itilak yon abalor so sakey ya agi yo diad abung ya akakulongan yo, balet say arum ed sikayo et nayari lan onla tan mangalay ilik pian natempey so eras ed saray sankaabungan yo.+
20 Insan awit yod siak so sankayugtanan ya agi yo pian napaneknekan a napanmatalkan iray salita yo tan agkayo ompatey.” Tan ontan so ginawa ra.
21 Tan inkuan dad balang sakey: “Seguradon nadudusa itayo nisengeg ed agi tayo,+ lapud anengneng tayoy gonigon to* sanen sikatoy mikakasi ed sikatayo, balet agtayo dinengel. Kanian sinmabi ed sikatayo iyan gonigon.”
22 Insan inebatan ira nen Ruben: “Agta imbagak ed sikayon, ‘Agyo sasakitan so ugaw,’ balet agkayo dinmengel?+ Natan, nasisingil lad sikatayo so dala to.”+
23 Balet agda amta a natatalosan itan nen Jose, ta walay managpatalos ed baetan da.
24 Kanian sikatoy inmarawi ed sikara tan nanakis.+ Sanen sikatoy pinmawil tan nansalita lamet ed sikara, inala toy Simeon+ tan binalor to ed arapan da.+
25 Insan ingganggan nen Jose a panoen day ilik iray sako* da, tan ipawil da so kuarta na kada sakey diad dilin sako to tan ikdan da ray abasto ed pambiahe ra. Onia so ginawa parad sikara.
26 Kanian inlugan da iray ilik da ed saray asno ra tan tinmaynan la ra diman.
27 Sanen nilukasan na sakey ed sikara so sako to diad pampupundoan da pian ikdan toy naakan so asno to, anengneng toy kuarta to ed sangab na sako to.
28 Diad saman et inkuan tod saray agagi to: “Impawil day kuartak, tan wadia natan ed loob na sakok!” Insan kinmapuy so kapusoan da tan ginmiwgiw iran nannenengnengan, ya inkuan da: “Anto yay ginawa na Dios ed sikatayo?”
29 Sanen akasabi ra ed si Jacob ya ama ra diad dalin na Canaan, insalaysay dad sikato so amin ya agawa ed sikara, ya inkuan da:
30 “Masebeg a nansalita ed sikami imay katawan ed saman a bansa,+ tan pinalsaan to kamin maneespiya ed saman a bansa.
31 Balet inkuan mi ed sikato, ‘Matunong kamin totoo. Aliwa kamin espiya.+
32 Labindua kamin sanaagi,+ ya ananak nen ama mi. Anggapo la imay sakey,+ tan say sankayugtanan et kaiba natan nen ama mi diad dalin na Canaan.’+
33 Balet inkuan ed sikami na samay katawan ed saman a bansa, ‘Diad saya et naamtaan ko no matunong kayon totoo: Itilak yod siak so sakey ya agi yo.+ Insan kayo mangala na panempey na eras ed saray sankaabungan yo tan la ki la.+
34 Tan iyakar yod siak so sankayugtanan ya agi yo, pian naamtaan kon aliwa kayon espiya, noagta matunong kayon totoo. Insan ipawil kod sikayo so agi yo, tan nayarian yo lay mansaliw ed sayan dalin.’”
35 Sanen ipapaway da lay karga na saray sako ra, nalmo na balang sakey so supot na kuarta to diad sako to. Sanen anengneng na sanaama iray supot na kuarta ra, tinmakot ira.
36 Inkelyaw ed sikara nen Jacob ya ama ra: “Naandian ak na ananak lapud sikayo!+ Anggapo lay Jose,+ tan anggapo met lay Simeon,+ tan natan et alaen yo met si Benjamin! Siak so mangaako ed sarayan amin a bengatla!”
37 Balet inkuan nen Ruben ed ama to: “Nayarian mon pateyen so duaran ana’ko no sikatoy agko nipawil ed sika.+ Ipiam ed siak tan ipawil kod sika.”+
38 Balet, inkuan to: “Agmila ed sikayo so ana’ko, ta inatey lay agi to tan bukbukor to lay atilak.+ No walay mauges a nagawa ed sikato diad pambiahe yo, seguradon ilasur yo ed Lubok*+ iray uban ko diad kaermenan.”+
Paimanod leksab
^ Odino “so makapuy a kipapasen.”
^ Odino “na kamarerwa to.”
^ Odino “iray panagkargaan.”
