Habacuc 3:1-19
3 Say pikakasi nen propeta Habacuc a nibalikas ed saray kansion a tagleey:*
2 O Jehova, nadngelan ko so nipaakar ed sika.
Pandinayewan ko, O Jehova, iray kimey mo.
Bilayen mo itan diad kapegleyan na saray taon!*
Ipaamtam itan diad kapegleyan na saray taon.*
Nonoten mo komon ya ipatnag so panangasi legan na panggugulo.+
3 Pinmaway so Dios manlapud Teman,Say Masanton Dios manlapud Palandey Paran.+ (Selah)*
Say katawenan et asakbongan na katagyan to;+Say dalin et napno na dayew to.
4 Say kasnagan to et singa liwawa na agew.+
Duaran sinag na liwawa so ompapaway ed lima to,A ditan so akaamotan na biskeg to.
5 Walad unaan to so salot,+Tan ontutumbok ed saray sali to so mangapoy-apoy ya inagem.
6 Sikatoy tinmunda tan niyakayak toy dalin.+
Diad linggis to et ginmiwgiw iray nasyon.+
Abuybuyak iray andi-anggaan a kapalandeyan,Tan dinmakmomo iray abayag lan niletneg a pukdol.+
Kayarian to ray basbas nensaman.
7 Anengneng kon walay panggugulo diad saray tolda na Cusan.
Ginmiwgiw iray abel na tolda diad dalin na Midian.+
8 Kasin sumpad saray ilog, O Jehova,Kasin sumpad saray ilog so mandarlang a pasnok mo,
Odino kasin sumpad dayat so sanok mo?+
Ta linmugan ka ed saray kabayom;+Saray karwahem so analo.*+
9 Akapaway tan akaparaan lay panam.
Apabtangan iray baston* ed panamegley na sakey a samba.* (Selah)
Pinalduam so dalin ed panamegley na saray ilog.
10 Binmikotkot ed sakit iray kapalandeyan sanen anengneng da ka.+
Inmagus so danum lapud maksil ya uran.
Inmungol so danum ed kaaralman.+
Intagey na satan iray lima to.
11 Tinmunda so agew tan bulan diad atagey ya ayaman da.+
Pinmaway a singa liwawa iray panam.+
Mankidyam a singa kirmat so gayang mo.
12 Niliber moy interon dalin lapud sanok mo.
Ginagatinan* mo ray nasyon lapud pasnok mo.
13 Pinmaway ka parad kilalaban na saray totoom, pian niliktar mo imay nilanaan mo.
Tinemek mo imay lider* ed abung na mauges.
Niparungtal itan manlapud pundasyon ya anggad toktok.* (Selah)
14 Dinuyok moy ulo na saray sundalo to diad panamegley na armas to*Sanen dinmagsa ra pian itayak da ak.
Panliketan dan maong so masekreton paneral ed sakey a napapairap.
15 Indalan mo iray kabayom diad dayat,Diad madaluyon tan maawang a danum.
16 Nadngel ko tan ginmiwgiw so loob ko;*Ginmiwgiw iray bibil ko lapud mensahe.
Linmoob ed saray pukel ko so kabubulok;+Manggiwgiw iray bikking ko.
Balet mareen kon aalagaren so agew na gonigon,+Ta onsabi iya ed saray totoon linmusob ed sikami.
17 Anggaman agmanrosas so kiew ya igos,Tan agmanbunga iray kaubasan;Anggaman anggapoy bunga ed kiew ya olibo,Tan agmamawala na naakan iray uma;*
Anggaman naandi ed pukokan iray karnero,Tan anggapo la ray baka ed saray kuwadra;
18 Manliket ak nin siansia ed si Jehova;Manggayaga ak ed Dios na kilalaban ko.+
19 Say Soberanon Katawan a Jehova so biskeg ko;+Gawaen ton singa sali na ulsa iray salikTan panakaren to ak ed saray atagey a pasen.+
Paimanod leksab
^ Odino “saray kansion parad paneermen.”
^ Odino posiblin, “diad panaon mi.”
^ Odino posiblin, “diad panaon mi.”
^ Odino “kililiktar.”
^ Odino posiblin, “iray pana.”
^ Odino posiblin, “Nibalikas iray samba na saray tribu.”
^ Literal, “Inilik.”
^ Literal, “ulo.”
^ Literal, “beklew.”
^ Literal, “na saray baston to.”
^ Literal, “tan ginmiwgiw so eges ko.”
^ Odino “iray nibalbalitang ya uma.”