Ed si Hebreo 3:1-19
3 Lapud saya, masanton agagi, a kabiangan ed saray atawag ya onlad tawen,+ nodnonot yo imay bibidbiren* tayon apostol tan atagey a saserdote—si Jesus.+
2 Sikatoy matoor ed Dios ya anuro ed sikato,+ no panon a si Moises et matoor met legan a manlilingkor ed interon abung* na Dios.+
3 Ta sikatoy* ipapasen a makanepegan na mas baleg a gloria+ nen si Moises, lapud samay nanggawa na abung et mas papagalangan nen say mismon abung.
4 Kada abung et walay nanggawa, balet say nanggawa na amin a bengatla et say Dios.
5 Natan si Moises et matoor a lingkor ed interon abung na Dios, a satan et paneknek* ed saray bengatlan ipakabat diad saginonor,
6 balet si Kristo et matoor ya anak+ a mangaasikaso ed abung na Dios. Sikatayo so abung To,+ no bembenan tayon malet anggad kasampotan so inkakpel* tayo tan say ilalo ya ipapasirayew tayo.
7 Kanian, unong ya imbaga na masanton espiritu,+ “Natan, no dedengelen yoy boses to,
8 agyo papaaweten so puso yo a singa samay agawa sanen pinasanok ak a maong na saray inmuunan atateng yo, a singa ed samay agew a sinubok da ak diad kalawakan,+
9 a diad satan et sinubok da ak, anggaman anengneng da ray ginawak ed loob na 40 taon.+
10 Lapud saya et apasnokan ak ed sayan henerasyon tan inkuan ko: ‘Naynay ya onaarawi puso ra, tan agda tutumboken iray dalan ko.’
11 Kanian diad sanok ko et insambak: ‘Ag-ira onloob ed painawak.’”+
12 Manalwar kayo, agagi, ompan walad sikayo so nawalaay mauges a puso ya andiay pananisia diad iyaarawi tod mabilay a Dios;+
13 balet itultuloy yon pasesegen so sakey tan sakey diad kada agew, legan a tatawagen ni itan a “Natan,”+ pian anggapod sikayoy magmaliw ya anawet so puso to lapud mapalikdon pakayari na kasalanan.
14 Ta nibaga a talagan mibibiang itayo ed Kristo no bembenan tayon malet anggad kasampotan so panagmatalek a walad sikatayo manlapud gapo.+
15 Unong a nibaga la, “Natan, no dedengelen yoy boses to, agyo papaaweten so puso yo a singa samay agawa sanen pinasanok ak a maong na saray inmuunan atateng yo.”+
16 Ta siopa ray akadngel, ingen ta pinasanok dan maong so Dios? Agta amin iramay pinmaway ed Ehipto ya indaulo nen Moises?+
17 Tan siopa ray sengegan no akin ya apasnokan so Dios ed loob na 40 taon?+ Agta saramay nankasalanan, ya inaatey diad kalawakan?+
18 Tan siopa iramay insamba na Dios ya agmakaloob ed painawa to? Agta saramay aliwan matulok?
19 Kanian anengneng tayo ya ag-ira akaloob lapud anggapoy pananisia ra.+
Paimanod leksab
^ Odino “iyaabawag.”
^ Ontutukoy iya ed nasyon na Israel.
^ Salanti, si Jesus.
^ Odino “pantasi.”
^ Odino “bulos a panagsalita.”
