Isaias 21:1-17
21 Say mensahe sumpad kalawakan na dayat:*+
Onsabi iya a singa maksil a dagem a maples ya ondalan ed interon abalaten,Manlapud kalawakan, manlapud makapataktakot a pasen.+
2 Makapaermen a pasingawey so nipanengneng ed siak:
Say managsaol et mansasaol,Tan say managderal et mandederal.
Tatdang ka, O Elam! Lusob ka, O Media!+
Patundaen ko so amin a panakis lapud sikato.+
3 Kanian pinasyay paneermen ko.*+
Manpapairap akA singa biin manaanak.
Agko sarag so ondengel lapud nagogonigon ak a maong;Agko sarag so onnengneng lapud napapagaan ak a maong.
4 Kinmapuy so pusok; ginmiwgiw ak ed takot.
Say pansirunget a datin pipirawaten ko et nagmaliw a makapataktakot ed siak.
5 Iparaan yoy lamisaan tan iyuksoy yo iray yurongan!
Mangan tan oninum kayo!+
Alagey kayo, sikayo ran prinsipe, lanaan* yo so panagsamper!
6 Ta oniay inkuan nen Jehova ed siak:
“La ka, mangipuesto kay sakey a bantay tan ibagam ed sikato ya ipaamta toy nanengneng to.”
7 Tan anengneng toy sakey a karwahen parad guerra ya iguguyor na saray kabayo,Sakey a karwahen iguguyor na saray asno,Sakey a karwahen iguguyor na saray kamelyo.
Sikatoy maalwar a nambantay tan nanimanon maong.
8 Tan sikatoy inmeyag a singa leon:
“O Jehova, kada agew et mansiasiansia ak ya akaalagey diad tagey na panagbantayan,Tan nilabilabi ak ya akapuesto ed pambabantayan ko.+
9 Nengneng mo no antoy onsasabi:
Lalakin akalugan ed karwahen parad guerra ya iguguyor na saray kabayo!”+
Insan sikatoy nansalita, ya inkuan to:
“Sikatoy naplag la! Say Babilonia et naplag la!+
Atemektemek ed dalin so amin ya imahen na dirios to!”+
10 O totook a ginatin-gatinan a singa ilik,Say produkto* na panag-ilikan ko,+Impakabat ko ed sikayo imay nadngel ko ed si Jehova na saray armada, say Dios na Israel.
11 Say mensahe sumpad Duma:*
Walay sakey ya ontatawag ed siak diad Seir:+
“Managbantay, kumusta iyan labi?
Managbantay, kumusta iyan labi?”
12 Inkuan na managbantay:
“Onsabi so kabuasan, ontan met ed labi.
No walay itepet yo, mantepet kayo.
La kayo labat dia!”
13 Say mensahe sumpad patar a desierto:
Diad katakelan a walad patar a desierto so pansanlabian yo,O grupo na saray managbiahen taga Dedan.+
14 Mangawit kayoy danum parad napgaan,Sikayo ran manaayam ed dalin na Tema,+Tan mangawit kayoy tinapay parad ontatakas.
15 Ta tinmakas ira lapud espada, lapud inuyos ya espada,Lapud apinat a pana, tan lapud inkaruksa na guerra.
16 Ta oniay inkuan nen Jehova ed siak: “Diad loob na sakey taon, singa saray taon na uupaan a trabahador,* mangangga so amin a gloria na Kedar.+
17 Daiset so nakeran managpana a kabiangan ed saray sundalo na Kedar, ta saya so imbagan mismo nen Jehova a Dios na Israel.”
Paimanod leksab
^ Mapatnag a manutukoy ed rehyon na kadaanan a Babilonia.
^ Literal, “pinasyay panotot na balangbang ko.”
^ Odino “larakan.”
^ Literal, “anak a laki.”
^ Kabaliksan toy “Inkamareen.”
^ Odino “a maalwar a binilang a singa gagawaen na sakey ya uupaan a trabahador”; salanti, diad eksakton sakey taon.”
