Isaias 39:1-8
-
Saray mensahero a nanlapud Babilonia (1-8)
39 Diad saman, say ari na Babilonia a si Merodac-baladan ya anak nen Baladan et angipawit na saray sulat tan regalo ed si Hezekias,+ ta nadngelan ton sikatoy nansakit tan inmabig la.+
2 Maliket iran pinatuloy nen* Hezekias tan impanengneng tod sikara so pasen a pangiinan toy kayamanan+—saray pilak, balitok, larak a balsamo tan arum nin mablin larak, amin ya armas to, tan amin a walad saray pasen a pangiinan toy kayamanan. Anggapoy bengatlan ag-impanengneng nen Hezekias ed sikara diad abung* to tan diad amin a walad pakauley to.
3 Kayari na satan, linmay propetan Isaias ed si Arin Hezekias tan tinepetan to: “Antoy imbaga na sarayan lalaki, tan iner so nanlapuan da?” Kanian inmebat si Hezekias: “Nanlapu rad arawin dalin, diad Babilonia.”+
4 Tinepet to ni: “Antoy anengneng dad abung mo?”* Inmebat si Hezekias: “Anengneng dan amin so walad abung ko.* Anggapoy bengatlan agko impanengneng ed sikara diad saray pasen a pangiinan koy kayamanan.”
5 Natan, oniay inkuan nen Isaias ed si Hezekias: “Dengel mo so salita nen Jehova na saray armada,
6 ‘Onsabi agew a say amin a walad abung mo* tan amin a tinipon na inmuunan atateng mo anggad sayan agew et awiten ed Babilonia. Anggapon balot so nakera,’+ so inkuan nen Jehova.+
7 ‘Tan arum ed saray magmaliw ya ananak mo et alaen tan magmaliw iran opisyal ed palasyo na ari na Babilonia.’”+
8 Et inkuan nen Hezekias ed si Isaias: “Say salita nen Jehova ya impasabim et maabig.” Insan intuloy to: “Lapud walay kareenan tan kaligenan* legay bilay* ko.”+
Paimanod leksab
^ Literal, “Aliketan ed sikara si.”
^ Odino “palasyo.”
^ Odino “palasyom.”
^ Odino “palasyok.”
^ Odino “palasyom.”
^ Odino “katuaan.”
^ Literal, “legan na saray agew.”
