Jeremias 10:1-25
10 Dengel yo so salita nen Jehova ya imbalikas to sumpad sikayo, O sankaabungan na Israel.
2 Oniay inkuan nen Jehova:
“Agyo aaralen so paraan na saray nasyon,+Tan agyo tatakotan iray tanda ed tawen,Lapud saratan so tatakotan na saray nasyon.+
3 Ta saray kustombre na totoo et sakey ya ilusyon.*
Sakey labat itan a kiew a binatang ed katakelan,Tan pinorma na marunong a komikimey diad impangusar tod kagawaan to.+
4 Paparakepen da itan ed panamegley na pilak tan balitok+Tan ipapasak da itan pian agnatumba.+
5 Ag-iratan makasalita a singa panag-abol na manok diad uma a tinanemay pipino;+Kaukolan iran sakbaten, ta ag-ira makaakar.+
Agyo ra tatakotan, ta anggapoy nagawaan dan makapasakit,Anggapo met so nagawaan dan maong.”+
6 Anggapoy mipara ed sika, O Jehova.+
Makapadinayew ka, tan say ngaran mo et magloria tan makapanyari.
7 Siopay ag-ontakot ed sika, O Ari na saray nasyon,+ ta manepeg labat itan?Ta diad amin a marunong a totoo ed saray nasyon tan ed amin a panarian da,Anggapon balot so mipara ed sika.+
8 Anggapoy pakatalos da tan makulangkulang iran amin.+
Say instruksion a manlapud kiew et sakey ya ilusyon.*+
9 Saray pinaimpis a pilak et aalaen dad Tarsis,+ tan say balitok et diad Upaz,Kimey itan na sakey a marunong a komikimey tan sakey a latero.
Say kawes na saratan et asul ya abel tan kolor-ube ya abel.*
Sarayan amin et ginawa na saray eksperton komikimey.
10 Balet si Jehova so tuan Dios.
Sikato so mabilay a Dios+ tan andi-anggaan ya Ari.+
Lapud sanok to et onyegyeg so dalin,+Tan agmakapansiansia ed panangukom to so amin a nasyon.
11 * Oniay ibaga yod sikara:
“Saray dirios ya agnanggawa ed tawen tan dalinSo naandi ed dalin tan ed silong na tawen.”+
12 Sikato so amalsa na dalin ed panamegley na pakayari to,Say angiletneg ed mabunan dalin diad panamegley na karunongan to+Tan say angibilkag ed tawen diad panamegley na pakatalos to.+
13 No iparengel toy boses to,Onungol iray danum ed tawen,+Tan papaatageyen to ray lurem* manlapud saray sampot na dalin.+
Sikatoy mamapawala na kirmat parad* uran,Tan ipapaway toy dagem manlapud saray pasen a panagsimpenan to.+
14 Kada too et kinmiwas ya agmakatunongan tan andiay kakabatan.
Nabaingan so kada latero lapud ginawa ton imahen;+Ta katilaan so ginawa ton metal ya imahen,Tan andian iratan na espiritu.*+
15 Saratan et ilusyon,* sakey a kimey a balbalawen.+
Naandi iratan sano onsabi so agew na pikuentaan ed sikara.
16 Say Apag na Jacob et aliwan singa sarayan bengatla,Ta sikato so nanggawad amin a bengatla,Tan say Israel so baston na tawir to.+
Say ngaran to et Jehova na saray armada.+
17 Alam iray balkot mo,O biin manaayam ed pasen a sasakopen.
18 Ta oniay inkuan nen Jehova:
“Ibasileng* ko iray manaayam ed sayan dalin diad sayan pankanawnawa,+Tan gonigonen ko ra pian nasali ra.”
19 Pakaskasi ak la lapud impakaderal* ko!+
Agla natambal so sugat ko.
Tan inkuan ko: “Talagan sakit ko la ’ya, tan kaukolan kon itepel.
20 Aderal lay toldak, tan apulpultot so amin a lubir na satan.+
Tinaynan ak na ananak ko tan anggapo la ra.+
Anggapo lay mangibuskag ed toldak odino mangitagey ed saray abel na toldak.
21 Ta makulangkulang so ginawa na saray managpastol,+Tan ag-ira nantepet ed si Jehova.+
Kanian ag-ira kinmiwas a walaay aralem a pakatalos,Tan nitaytayak so amin a pulok da.”+
22 Dengel kayo! Walay balita! Nitan la!
Sakey a maksil a panmayegmeg manlapud dalin ed amianen,+Pian saray syudad na Juda et magmaliw ya apaulyanan a pasen, say ayaman na saray ason jakal.+
23 Amtak, O Jehova, ya anggapoy autoridad na too ya uleyan so dalan to.
Agkanepegan na too ya igiya so dilin kupbang to.+
24 Ipetek mo ak, O Jehova, unong ed panangukom mo,Balet aliwan lapud sanok mo,+ pian agmo ak paandien.+
25 Ikalbom pay sanok mo ed saray nasyon ya agmamibidbir ed sika+Tan ed saray pamilyan ag-ontatawag ed ngaran mo.
Ta inupot day Jacob,+On, sikatoy inupot da, anggad naandi la,+Tan ginawa ran agnapanayaman so dalin to.+
Paimanod leksab
^ Odino “andiay kakanaan.”
^ Odino “andiay kakanaan.”
^ Odino “kolor-ube ya abel a gawad bagoy karnero.”
^ Say bersikulo 11 et orihinal a nisulat ed Aramaiko.
^ Odino posiblin, “manggagawa na saray aagusan na.”
^ Odino “sengaw.”
^ Odino “linawa.”
^ Odino “andiay kakanaan.”
^ Odino “Ipalsot.”
^ Odino “impakapiley.”
