Jeremias 19:1-15
19 Oniay inkuan nen Jehova: “La ka, tan mangaliw kay melag a buyog ed managdamili.+ Ipilam so arum ed saray mamatatken ed saray totoo tan mamatatken ed saray saserdote,
2 tan la ka ed Lawak na Anak nen Hinom,+ a walad lolooban na Puerta na saray Langa. Tan iyabawag mo diman iray salita ya ibagak ed sika.
3 Oniay ibagam, ‘Dengel yoy salita nen Jehova, sikayo ran arari na Juda tan sikayo ran manaayam ed Jerusalem. Oniay inkuan nen Jehova na saray armada, say Dios na Israel:
“‘“Maganok lan deralen iyan pasen, tan onalitengteng iray layag na siopaman a makarengel ed satan.
4 Lapud tinaynan da ak+ tan impagmaliw dan agla nabidbir iyan pasen.+ Manbabagat ira dia parad arum a dirios ya agda kabat tan agkabat na inmuunan atateng da tan saray arari na Juda, tan sayan pasen et pinano ray dala na saray andiay kasalanan.+
5 Angipaalagey ira na saray atagey a pasen parad Baal pian poolan da iray ananak dan lalaki bilang interon apay a popoolan parad Baal,+ a satan et agko ingganggan odino sinalita, tan agbalot anggan linmad pusok.”’*+
6 “‘“Kanian onsabi panaon,” so imbaga nen Jehova, “sano sayan pasen et agla tawagen a Tofet odino Lawak na Anak nen Hinom, noagta say Lawak na Panagpateyan.+
7 Deralen ko iray plano na Juda tan Jerusalem ed sayan pasen, tan pateyen ko ra ed espada diad arapan na kakabusol da tan diad lima na saramay malabay a mamatey ed sikara.* Tan saray bangkay da et iter kon kanen na saray manok tan ayayep.+
8 Tan sayan syudad et pagmaliwen kon sakey a pakataktakotan tan balbalawen.* Amin ya ondalan ditan et nataktakot ed nanengneng da tan manngisiw ira lapud amin a salot ditan.+
9 Tan paulyan kon kanen day laman na ananak dan lalaki tan bibii, tan kanen na balang sakey so laman na kapara ton too, lapud nagawan pangubkob tan lapud inkadesperado ra sano paliberan ira na saray kalaban da tan saramay malabay a mamatey ed sikara.”’*+
10 “Insan betag mo so melag a buyog ed arapan na lalakin akila ed sika,
11 tan ibagam ed sikara, ‘Oniay inkuan nen Jehova na saray armada: “Ontan so pametag kod sarayan totoo tan ed sayan syudad, a singa pametag ed pananginan a ginawa na managdamili pian agla itan naapiger; tan iponpon da ed Tofet iray bangkay ya anggad anggapo lay pangiponponan.”’+
12 “‘Ontan so gawaen kod sayan pasen,’ so imbaga nen Jehova, ‘tan ed saray manaayam ditan, pian pagmaliwen kon singa Tofet iyan syudad.
13 Tan magmaliw a marutak a singa say Tofet iray kaabungan na Jerusalem tan kaabungan na saray arari na Juda,+ on, amin a kaabungan a diad atep so pangiyaapayan da na bagat parad amin a bengatla ed katawenan+ tan ditan da iyiibung iray apay ya iinumen parad arum a dirios.’”+
14 Kapawil nen Jeremias a nanlapud Tofet ya angibakian nen Jehova a pampropesiyaan to, sikatoy inmalagey ed sular na abung nen Jehova tan oniay inkuan tod amin a totoo:
15 “Oniay inkuan nen Jehova na saray armada, say Dios na Israel, ‘Deralen ko iyan syudad tan say amin a baley to a singa imbagak, lapud anawet so ulo ra* tan agda labay ya unoren iray salitak.’”+
Paimanod leksab
^ Odino “agbalot linmad kanonotan ko.”
^ Odino “saramay manaanap ed kamarerwa ra.”
^ Literal, “panngisiwan.”
^ Odino “saramay manaanap ed kamarerwa ra.”
^ Literal, “pinaawet day beklew da.”
