Jeremias 28:1-17
-
Si Jeremias sumpad palson propetan si Hananias (1-17)
28 Diad saman met lanlamang a taon, diad gapo na uley nen Arin Zedekias+ na Juda, diad komapat a taon, ed komaliman bulan, oniay imbaga ed siak nen propeta Hananias ya anak nen Azur a taga Gibeon+ diad abung nen Jehova ed arapan na saray saserdote tan amin a totoo:
2 “Imbaga nen Jehova na saray armada, say Dios na Israel, ‘Puteren koy pako na ari na Babilonia.+
3 Duay taon* manlapud natan, ipawil kod sayan pasen so amin a kagawaan ed abung nen Jehova ya inala nen Arin Nabucodonosor na Babilonia tan inawit tod Babilonia.’”+
4 “‘Tan ipawil kod sayan pasen si Jeconias+ ya anak nen Jehoiakim,+ say ari na Juda, tan amin ya inerel ed Juda ya inawit ed Babilonia,’+ so imbaga nen Jehova, ‘ta puteren koy pako na ari na Babilonia.’”
5 Insan inmebat si propeta Jeremias ed si propeta Hananias diad arapan na saray saserdote tan amin a totoo ya akaalagey ed abung nen Jehova.
6 Oniay inkuan nen propeta Jeremias: “Amen!* Ontan komon so gawaen nen Jehova! Sumpalen komon nen Jehova iray salita ya impropesiyam, ya ipawil tod sayan pasen iray kagawaan ed abung nen Jehova ya inawit ed Babilonia tan amin a totoon nibantak diman!
7 Balet, ipangasim a dengelen iyan mensahe ya ibagak ed sika tan ed amin a totoo.
8 Nampropesiya nensaman iray propeta ya akadkauna nen say siak tan say sika, nipaakar ed dakel a dalin tan saray makapanyarin panarian, nipaakar ed guerra, kadederal, tan salot.*
9 No kareenan so ipropropesiya na propeta tan ontua so imbaga to, naamtaan a talagan imbaki nen Jehova itan a propeta.”
10 Diad saman et inala nen propeta Hananias so pako ed beklew nen propeta Jeremias tan pinuter to.+
11 Insan oniay imbaga nen Hananias ed arapan na amin a totoo: “Oniay inkuan nen Jehova, ‘Singa oniay pamuter kod pako nen Arin Nabucodonosor na Babilonia ed beklew na amin a nasyon diad loob na duay taon.’”+ Insan inmalis lay propeta Jeremias.
12 Kayarin pinuter nen propeta Hananias so pako ed beklew nen propeta Jeremias, oniay mensahe nen Jehova a sinmabi ed si Jeremias:
13 “La ka tan ibagam ed si Hananias, ‘Oniay inkuan nen Jehova: “Saray kiew a pako so pinuter mo,+ balet saray balatyang a pako so onsalat ed saratan.”
14 Ta oniay inkuan nen Jehova na saray armada, say Dios na Israel: “Iyan kod beklew na sarayan amin a nasyon so balatyang a pako, pian manserbi ra ed si Arin Nabucodonosor na Babilonia, on, sikato so panserbian da.+ Anggan saray atap ya ayayep et iter kod sikato.”’”+
15 Insan oniay imbaga nen propeta Jeremias ed si propeta Hananias:+ “Ipangasim, dengel ka, Hananias! Agka imbaki nen Jehova, balet impanmatalek mo irayan totoo ed tila.+
16 Kanian oniay inkuan nen Jehova, ‘Ekalen ta kad tapew na dalin. Ompatey kad sayan taon, ta inlagyat moy panagrebelde sumpad si Jehova.’”+
17 Kanian inatey si propeta Hananias ed saman a taon, diad komapiton bulan.
