Jeremias 8:1-22
8 “Diad satan a panaon,” so imbaga nen Jehova, “ipaway dad saray lubok iray pukel na arari na Juda, saray pukel na priprinsipe to, saray pukel na saray saserdote, saray pukel na saray propeta, tan saray pukel na saray manaayam ed Jerusalem.
2 Nitaytayak iratan ed silong na agew tan bulan tan ed amin a bengatla ed tawen a pinabli ra tan nanlingkoran da tan tinumbok da tan inanap da tan nandakmomoan da.+ Ag-iratan natipon, odino nikotkot. Magmaliw iratan a singa tai na ayep ed tapew na dalin.”+
3 “Tan saray nakera ed sayan mauges a pamilya a walad amin a pasen a pangitayakan kod sikara et mas pilien da ni ompatey nen say manbilay,” so imbaga nen Jehova na saray armada.
4 “Tan ibagam ed sikara, ‘Oniay inkuan nen Jehova:
“No natumba ra, ag-ira kasi onalagey lamet?
No manguman so sakey, agmet kasi manguman imay sakey?
5 Akin a sarayan totoo na Jerusalem et mansiasiansian agmatoor ed siak?
Agda itunday pansasaol da;Agda labay so manguman.+
6 Nanimano ak tan tinmalineng ak, balet aliwan duga so panagsalita ra.
Anggapoy anggan sakey a nagbabawi ed kaugsan to odino nantepet na, ‘Anto yay ginawak?’+
Balang sakey et ompapawil ed dalan a tutumboken na karaklan, a singa kabayon maples a mamapaarap ed guerra.
7 Anggan say dulakak ed tawen et amta toy panaon* na iyalis tod arum a pasen;Saray palekpek, mangalimpana, tan taras et amta ray panaon na ipawil da.*
Balet saray totook et agda natalosan so panangukom nen Jehova.”’+
8 ‘Panon yon nibagan: “Marunong kami, tan walad sikami so ganggan* nen Jehova”?
Ta diad tua, say matila* a panagsulat+ na saray eskriba* et inusar labat ed katilaan.
9 Abaingan iray marunong.+
Ataktakot ira tan naerel ira.
Impulisay day salita nen Jehova,Anton karunongan sirin so walad sikara?
10 Kanian iter kod arum a lalaki iray kaasawaan da,Iter kod arum so uma ra;+Ta manlapud sankaabebaan ya anggad sankatageyan, balang sakey et maagum a manaanap na pinabangan to;+Manlapud propeta anggad saserdote, balang sakey et mansasaol.+
11 Tan agda tatambalen a maong so* impakaderal* na biin anak na totook, ya ibabaga ran,“Walay kareenan! Walay kareenan!”
Anta anggapoy kareenan.+
12 Makakalikna ra kasi na baing lapud makapadimlan ginawa ra?
Anggapon balot so nalilikna ran baing!
Agda anggan amtay ombaing!+
Kanian natumba ra ed kawalaan na saray atumba la.
Natiror ira sano dusaen ko ra,’+ so inkuan nen Jehova.
13 ‘Panganggaen ko ra sano tiponen ko ra,’ so imbaga nen Jehova.
‘Anggapoy nakeran bunga ed sengeg na ubas, anggapoy bunga na kiew ya igos, tan nalenes iray bulong.
Tan nabalang da imay inter kod sikara.’”
14 “Akin et akayurong itayo dia?
Mantitipon itayo tan onloob itayo ed saray apadiran a syudad+ tan diman tayo ompatey.
Ta pateyen itayo nen Jehova a Dios tayo,Tan painumen to itayo na nansamal a danum,+Lapud nankasalanan tayo ed si Jehova.
15 Iilaloan tayoy kareenan, balet anggapoy maabig a sinmabi,Iilaloan tayoy panaon na panamaabig, balet walay takot!+
16 Manlapud Dan et narengel so pampunges na saray kabayo to.
Diad panungol na saray kalakian a kabayo to,Yinmegyeg so interon dalin.
Sinmabi ra tan dineral day dalin tan say amin a wadtan,Say syudad tan saray manaayam ditan.”
17 “Ta ibakik ed sikayo iray serpiente,Saray maditan uleg ya agnapaamo,Tan ketketen da kayo,” so imbaga nen Jehova.
18 Agnatambal so paneermen ko;Mansasakit so pusok.
19 Onkekerew na tulong so biin anak na saray totookManlapud arawin dalin:
“Anggapo ta ed Sion si Jehova?
Odino anggapo ta diman so ari?”
“Akin et pinasanok da ak lapud saray imahen da,Lapud sananey a dirios da ya andi-kakanaan?”
20 “Asumpal lay panag-ani, anampot lay tiagew,
Balet agtayo ni niliktar!”
21 Kinmapuy so liknaan ko lapud impakaderal na biin anak na saray totook;+Naermenan ak.
Ataktakot ak.
22 Anggapo tay tambal a balsamo* diad Gilead?+
Odino anggapo tay managtambal diman?+
Akin et agni inmabig so biin anak na saray totook?+
Paimanod leksab
^ Odino “aturon panaon.”
^ Odino “iyalis dad arum a lugar.”
^ Odino “bilin.”
^ Odino “palso.”
^ Odino “sekretaryo.”
^ Odino “paspasaray so panatambal da ed.”
^ Odino “impakapiley.”
^ Odino “puyok a pakainawaan.”
